«Հայը լինելով աշխարհով մեկ սփռված ժողովուրդ` այսօր չունի համահայկական կրթօջախ»
«Այսօր Հայաստանում և Սփյուռքում չկան արդի շնչին ու զարգացումներին համապատասխանող դպրոցներ: Մեր դպրոցներն իրենց մակարդակով չեն համապատասխանում համաշխարհային կրթական չափանիշներին: Հայը լինելով աշխարհով մեկ սփռված ժողովուրդ` այսօր չունի համահայկական կրթօջախ: Սա լուրջ մտահոգություն է, հարց է, թե հայ ժողովուրդն ի՞նչ առանցքի շուրջ պետք է համախմբվի, այս սերունդն ինչ ունի փոխանցելու հաջորդ սերունդներին: Եթե չունենք փոխանցելու բան, հաջորդ սերունդը բարոյազրկվելու է: 21-րդ դարի բուռն զարգացումների մեջ մեր ազգի գոյատևման խնդիրը կրթության առանցքի շուրջ համախմբվելն է»,- ասուլիսում նման տեսակետ հայտնեց Մեսրոպ քահանա Արամյանը:
Նա մի նախաձեռնողական խմբի անդամ է, ովքեր ջանում են Կիպրոսում 2005 թվականին փակված Մելքոնյան կրթական հաստատությանում հիմնել հենց այդ համահայկական կրթօջախը: Այս օրերին խումբը Հայաստանում է` քննարկելու վարժարանի վերաբացման հարցը:
«Մեր ուսումնասիրությունները, դիտարկումները ցույց են տվել, որ Մելքոնյան հաստատությունն իր դարավոր ավանդույթներով ունի լավագույն հիմքեր, որպեսզի համահայկական այդ դպրոցը հենց այդ տարածքի վրա բացվի»,- ասաց նա:
Կիպրոսում գործող Մելքոնյան դպրոցը հիմնադրվել է 1926թ: Մելքոնյան վարժարանի տեղում հիմա ժամանակավորապես գործում է հունական դպրոց: Այն հայ ժողովրդի սեփականությունն է, այժմ տնօրինում է Հայ բարեգործական ընդհանուր միությանը, որն էլ տարածքը հանել է վաճառքի: Նախաձեռնող խմբի անդամ շվեյցարաբնակ Արդեն Շելեֆյանն ասաց, որ տարածքն այսօր վիճելի է, Միությունը իրեն հատուկ պատճառներով փակել է դպրոցն այն դեպքում, երբ 2004 թվականին դեռ 250 աշակերտ ուներ:
Նախաձեռնողական խումը դիմել է Հայաստանում և Սփյուռքում բնակվող գործարարներին, ովքեր համաձայնվել են ֆինանսական օգնություն ցույց տալ իրենց` կրթահամալիրը վերաբացելու համար: Մեսրոպ քահանան ասաց, որ այն վերաբացելու համար այս պահին ունեն բավական լուրջ դրամական հիմք, սակայն իրավաբանական կարգավիճակի հարցը դեռ լուծված չէ: «Դեռևս Հայ բարեգործական ընդհանուր միությանն է, բայց բանակցությունների արդյունքում կլուծենք: Թող այն լինի միության սեփականությունը, բայց տա տնօրինման այդ մարդկանց, ովքեր կրթական ծրագիր են ուզում իրականացնել»,- ասաց քահանան:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին