Ձեր վստահելի աղբյուրը

Ո՞ւմ է պետք այն թեքահարթակը, որն ինձ ոչ մի տեղ չի տանում և կամ այն տրանսպորտը, որով ես ոչ մի տեղ հասնել չեմ կարող… Այս մասին հնչեց այսօր ԲՀԿ քաղխորհրդի ներկայացուցիչների և հաշմանդամություն ունեցող անձանց շահերը ներկայացնող մի շարք հասարակական կազմակերպությունների ներկայացուցիչների հանդիպմանը:

Ներկաներից մեկը, ով նշեց, որ ուղիղ երեսուն տարի առաջ ստացել է հաշմանդամության կարգ, ընդգծեց` հաշմանդամությունը վեր է քաղաքականությունից կամ կուսակցական պատկանելությունից.

«Սա երկրի արժանապատվության խնդիրն է, որտեղ մենք ուզում ենք ապրել լիարժեք քաղաքացու նման: Խնդիրներն այնքան շատ են, անտարբերությունն էլ ավելի... Արդյո՞ք արտակարգ իրավիճակ չէ, երբ մարդը տանը ծերանում է: Սակայն ամենալուրջ խնդիրը, որ մենք կարևորում ենք, հասարակական գիտակցության փոփոխությունն է, կարծրատիպերի վերացումը»,- հայտարարեց նա:

Արձագանքելով վերջինիս ելույթին` ԲՀԿ քարոզչության պատասխանատու, ԲՀԿ խմբակցության քարտուղար Նաիրա Զոհրաբյանը հայտարարեց, որ «Հաշմանդամություն ունեցող անձանց իրավունքների պաշտպանության և սոցիալական ներառման մասին» օրենքի նախագիծը դեռևս շրջանառության մեջ չի դրվել, ինչը նշանակվում է, որ իրենք դեռ ժամանակ ունեն լսելու հաշմանդամություն ունեցող անձանց առաջարկությունները օրենքի վերաբերյալ, որովհետև նրանցից լավ ոչ ոք չի կարող աշխատել այդ օրենքի վրա:

Վարդան Օսկանյանը նշեց, որ հաշմանդամություն ունեցող անձանց խնդիրները` անմատչելի միջավայր, չհարմարեցված փոխադրամիջոցներ, զբաղվածություն և այլն ԲՀԿ-ն միշտ բարձրաձայնել է Ազգային Ժողովում և եթե նույնիսկ մայիսի 5-ին իրենք հաջողության չհասնեն ու քաղաքային իշխանությունը չվերցնեն, ապա դա որևէ կերպ չի խաթարի այդ գործընթացը.

«Դժբախտաբար իրավիճակն այնպիսին է, որ ԲՀԿ-ն խորհրդարանում մեծամասնություն չունի, որպեսզի հանրությանը հուզող հարցերը տանի մինչև վերջ.... բայց եթե ունեցանք քաղաքային իշխանություն, ապա այդ բոլոր հարցերը լուծվելու են ձեզ հետ միասին` խոստանում եմ»,- նշեց նա:

«Թույլ լսող երեխաների» հասարակական կազմակերպության նախագահը բարձրաձայնեց հաշմանդամության ցածր թոշակի խնդիրը` նշելով, որ 12 հազար դրամը, որ տալիս է պետությունը, այնքան չնչին գումար է, որ մարդ դրանով ամսվա կեսը կարող է միայն չոր հաց գնել ու բոլորովին տկլոր ապրել: Նա հնչեցրեց նաև, որ կոնկրետ իր ոլորտի մասով ընդհանրապես խայտառակ իրավիճակ է ձևավորվել, քանի որ երեխաներին տրվող լսողական սարքերը ուղղակի խայտառակություն են: Ամեն ինչում նա մեղադրեց ` ՀՀ ԱՍՀՆ հաշմանդամների և տարեցների հիմնահարցերի վարչության պետ Ջեմմա Բաղդասարյանին, «ով հաշմանդամություն ունեցող անձանց խնդիրները դիտարկում է, մեղմ ասած, մատների արանքով ու որևէ բան նրանց կյանքում չի փոխվում»:

Մեկ այլ հկ ներկայացուցիչն էլ հայտարարեց, որ այսօր ցայտնոտային իրավիճակ է ձևավորվել Հայաստանում, որովհետև մոտ վեց-ութ ամիս է հանրապետություն սայլակ չի ներկրվում և հաշմանդամություն ունեցող անձանց համար սայլակ գտնելն այսօր խնդիր է: Նա հորդորեց ԲՀԿ-ականներին այս խնդիրը բարձրաձայնել ԱԺ-ում, քանի որ առաջիկա ամիսներին խնդրի լուծումը տեսանելի չէ` ներկրող դեռ պետք է տենդերով ճանաչվի.

«Մայիսի 5-ից հետո Էլինար Վարդանյանը կկապվի ձեզ հետ, կլուծենք սայլակներ Հայաստան տեղափոխելու խնդիրը... ընդամենը երկու շաբաթ է մնացել, ուղղակի որպեսզի խնդիրը չկապվի ընտրությունների հետ ու չշահարկվի, մենք խոստանում ենք սայլակները տեղափոխելու հարցը լուծել երկու շաբաթ անց»,- արձագանքեց Նաիրա Զոհրաբյանը:

Ի դեպ, հանդիպմանը սայլակով ներկա անձինք նշեցին, որ պետության տված սայլակները բանի պիտանի չեն, երկրորդ օրը շարքից դուրս են գալիս: Այնպես որ հարցի լուծումը նաև ճկունություն է ենթադրում ու որակի շեշտադրում, այլ ոչ թե ուղղակի արհեստական խնդրի լուծում ցուցադրելը:

Նշենք, հաշմանդամություն ունեցող անձինք հանդես եկան մի շարք առաջարկություններով, դրանց թվում ամենից շատը հնչեց հաշմանդամություն ունեցող անձանց հարկերից ազատելը, ձեռներեցությամբ զբաղվելու համար արտոնյալ վարկեր տրամադրելը և այլն:

Նախորդիվ` 
«Ցավոք, մեր հասարակությունը դեռ չի հասել այն մակարդակին, որ չտեսնի սայլակը». Օսկանյանը` հաշմանդամության խնդրի մասին