Ձեր վստահելի աղբյուրը

«Որ ասեմ մեր դպրոցում քանի աշակերտ կա, կծիծաղեք կամ չեք հավատա»: Աճարկուտի հիմնական դպրոցի տնօրեն Արտակ Վարդումյանը դժվարությամբ արտասանելով ասում է, որ գյուղի դպրոցում այս տարի ընդամենը յոթ աշակերտ ունեն, նախորդ տարի ինն էին:

«Արդեն երեք-չորս տարի է, այսպիսի ահավոր վիճակ է, բայց մինչ այդ նորմալ քանակով աշակերտներ ենք ունեցել: Կյանքը վատացել է, մարդիկ՝ գնացել: Գրեթե բոլոր գյուղերում էլ աշակերտների թիվը պակասել է: Իսկ մեր գյուղում ավելի խիստ է կրճատվել»,- Panorama.am-ի թղթակցին ասաց տնօրենն ու ընդգծեց, որ ուշադրությունը մայրաքաղաքի դպրոցների նկատմամբ շատ մեծ է, իսկ գյուղերի դպրոցներին այդքան ուշադրություն չեն հատկացնում, ինչի հետևանքն էլ ստեղծված իրավիճակն է:

«Փոքր դպրոցների նկատմամբ փոքր ուշադրությունն հանգեցնում է շատ մեծ խնդիրների: Ես նույնիսկ երեք-կոմպլեկտ դասարան ունեմ»,- ասաց Վարդումյանը: Տնօրենը կոմպլեկտավորմանը ստիպված է գնում, քանի որ ֆինանսավորում չկա: «Իհարկե, իրենք էլ մեղավոր չեն, այսքան երեխայի համար դժվար է պահել: Բայց ամեն դեպքում, ուզում է երեք աշակերտ էլ լինի, դպրոցը պետք է պահել: Եթե ուզում ենք ազգը պահենք, պիտի դպրոց ունենանք»,- ասաց նա:

Աճարկուտի 9-ամյա դպրոցում կա ընդամենը 2 դասարան՝ առաջին, երկրորդ և երրորդ դասարաններն են՝ եռակոմպլեկտ, չորրորդ դասարան չունեն, հինգերորդ և յոթերորդ դասարաններն են երկկոմպլեկտ, վեցերորդ, ութերորդ և իներորդ դասարան ևս դպրոցը չունի. «Տարի է եղել առհասարակ առաջին դասարանցի չենք ունեցել»:

«Խնդիրը այ էս կոմպլեկտավորումն է: Դասաժամերը սովորական ծրագրերով ենք անցնում: Ուսուցիչը ստիպված դասաժամը բաժանում է երեք մասի, 15 րոպե է հատկացնում ամեն մի դասարանին: Ըստ ուսումնական նյութի, դե լինում են դեպքեր, որ տարբերվում են հատկացված րոպեների քանակները: Եթե ուսումնական նյութը բարդ է, ավելի երկար է պարապում: Խնդիրն այն է, որ դասաժամի ընթացքում այն երեխաներն, ում հետ այդ պահին ուսուցիչը չի զբաղվում, զրուցում են, խանգարում միմյանց: Ինչքան էլ ուսուցիչը լավը լինի, երեխաները մեկ է, իրենց երեխայությունն անելու են»,- նշեց նա և նկատեց, որ այդ ժամանակը դասարանում երեխաները ճիշտ չեն օգտագործում:

Վարդումյանը նաև նկատեց, որ ահռելի է տարբերությունը մեկ նյութի և միանգամից երեք նյութի շուրջ ընթացող դասաժամերի միջև:

Աճարկուտի դպրոցը հինգ ուսուցիչ և մեկ ուսուցչի օգնական ունի, մեծ է նաև մասնագետների խնդիրը: «Հայոց լեզուն, օրինակ, մասնագետ չունի: Վանաձորից եկած քիմիայի լաբորանտն է պարապում: Մի 15 տարի նա ստիպված Հայոց լեզու և գրականություն է պարապում: Մենք պահանջը ժամանակին ներկայացրել ենք կրթության վարչություն, բայց վարչությունն էլ մեղք չունի: Ժամաքանակն ու դասարանները քիչ են, մանկավարժն էլ չի ցանկանում այստեղ գալ: Տրանսպորտի խնդիր էլ կա: Նման պայմաններն էլ վատ են անդրադառնում ուսումնական պրոցեսը բարձր մակարդակի վրա դնելուն»,- ցավով ասաց նա:

Դպրոցի տնօրենի խոսքով՝ խնդիրները շատ են. «Միակ ցանկությունս այն է, որ գոնե չկոմպլեկտավորենք դասարանները: Նույնիսկ հովանավորներ չկան, որ գոնե իրենք ֆինանսավորեն, դասարանն առանձնացնենք: Ստիպված օգտագործում եմ ուսուցչի օգնականի դասաժամը, որ օրական գոնե մի դասարան առանձնացեմ տնայինների վրա աշխատելու կամ դժվար դասերը ավելի լավ բացատրելու համար»:

Հիմնական դպրոցն ավարտելուց հետո աշակերտներն ուսումը շարունակում են հարևան գյուղերում գտնվող միջնակարգ դպրոցներում: Գյուղապետ Ռաֆիկ Օհանյանը մեզ հետ զրույցում ասաց, որ երեխաները գնում են կամ Ծաղկավան, կամ Սարիգյուղ: Առավոտյան մեքենա կա, որ երեխաներին տանում է և հետ բերում:

Գյուղում այս պահին 50 ծուխ կա, Աճարկուտը մոտ 250 բնակիչ ունի:

 Նախորդող հրապարակում՝

Հրանտ Մաթևոսյանի անվան դպրոցը մի դասարանացու աշակերտներ ունի