Ձեր վստահելի աղբյուրը

«Հուշարձանների տարածքում կարելի է կազմակերպել ցանկացած միջոցառում, եթե այն չի աղճատում, չի նվաստացնում հուշարձանը, չի աղտոտում հուշարձանի տարածքը»,- Panorama.am-ի հետ զրույցում ասաց մշակույթի նախարարության «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրեն Վլադիմիր Պողոսյանը:

Ըստ նրա, հուշարձանների տարածքում միջոցառումներ անցկացնելը բխում է «Պատմամշակութային արգելոց թանգարանների և պատմական միջավայրի պահպանության ծառայություն» ՊՈԱԿ-ի մասին կառավարության որոշումից (2003 թ. մարտի 7, N 312-Ն), որի համաձայն՝ «Կազմակերպության գործունեության առարկան և նպատակներն են պետական սեփականություն հանդիսացող պատմական, հնագիտական, ճարտարապետական անշարժ հուշարձանախմբերի, հուշարձանների համալիրների, պատմական և բնապատմական միջավայրի, պատմամշակութային հողերի, տեղանքապատկերների (լանդշաֆտների), մշակութային այլ արժեքների պահպանությունը, ուսումնասիրումը, հանրահռչակումը և օգտագործումը»:

«Հանրահռչակման, օգտագործման հետ կապված հասկանում ենք, որ պետք է միջոցառումներ իրականացվեն հուշարձանների տարածքում: Իսկ միջոցառումները սովորաբար ուղեկցվում են երաժշտությամբ, վերջանում են շամպայնի կամ կոնյակի մեկ բաժակով»,- «բացատրեց» Վ. Պողոսյանը:

Հունիսի 14-ին «հանրահռչակմանն» ուղղված մի միջոցառում է անցկացվել «Զվարթնոց» պատմամշակութային արգելոց-թանգարանում, որի մասին, ի դեպ, ֆեյսբուքյան օգտատերերից մեկը նախօրեին գրել է. «Տուրիստներիս հետ ճանապարհին մտանք Զվարթնոց տաճար: Մուտքի մոտ գունավոր նկարագրեցի, տրամադրեցի որ հայերի համար բացառիկ մշակութային կոթողա ու բացառիկ սրբավայր: Մտանք ներս ու ի՞նչ. պարզվումա Զվարթնոց տաճարի տարածքը վարձով են տվել մի հատ արտասահմանյան ընկերության՝ կորպորատիվ party անցկացնելու համար: Էդ փառթին երեկ էր, բայց էնտեղ փառթիի աշխատողներից դեռ լիքը խմած մարդիկ կային, … Պատկերացնու՞մ եք՝ եկեղեցին վարձով են տվել ինչ-որ պոռնո party անելու համար»:

Նշենք, որ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ- կայքում կարդում ենք. «… հուշարձանի հանրահռչակումը և օգտագործումը իրականացվում են ոչ միայն մշակութային, այլ նաև` բաց և փակ միջոցառումների միջոցով: Ի դեպ, բաց և փակ միջոցառումներ իրականացվում են նաև այլ արգելոց-թանգարաններում, և այդ միջոցառումների քաղաքականությունը որոշում է «Պահպանության ծառայություն» ՊՈԱԿ-ը` համաձայնեցնելով լիազոր մարմնի հետ: Ս. թ. հունիսի 7-ին և 14-ին «Զվարթնոց» պատմամշակութային արգելոց-թանգարանում նախանշված միջոցառումների և աշխատանքային օրերի փոփոխությունների մասին նախապես հայտարարություն է տարածվել: Տեղեկացվել է, որ հունիսի 7-ի փոխարեն արգելոց-թանգարանը կաշխատի հունիսի 9-ին, հունիսի 14-ի փոխարեն` հունիսի 16-ին»:

Վ. Պողոսյանի տեղեկացմամբ, հունիսի 14-ին «Զվարթնոց» պատմամշակութային արգելոց-թանգարանում միջոցառում է կազմակերպել հայկական մի ընկերություն, որին մասնակցել են նաև մեծաթիվ ռուսախոսներ. «Մրցանակաբաշխություն է եղել, պատվոգրեր են հանձնել»:

«Միջոցառման համար տեղադրել են վրաններ: Հետո դրանք ապամոնտաժողներն են եղել կիսաանդրավարտիքներով»,- ասաց ՊՈԱԿ-ի տնօրենը: Նա հավելեց, որ ցանկացած միջոցառում, ինչպես նաև հունիսի 14-ինը, անցկացվում է բացառապես ՊՈԱԿ կանոնադրության համաձայն: