«Չնայած պարբերաբար կատարվող փոփոխություններին, դժգոհողներ լինում են». Պետության կողմից տրամադրվող սայլակների մասին
«Նախորդ տարվա ընթացքում պետության կողմից տրամադրվող սայլակներից դժգոհող շահառուների թիվը նվազել է: Աշխատանքի և սոցիալական հարցերի նախարարության ենթակայության տաղ գործող «Հանգրվան» ՊՈԱԿ-ը 2014-ին ստացել է միայն 4 բողոք, ի տարբերություն նախորդ տարիների, երբ ամսական կտրվածքով 3-5 բողոք էր ստացվում»: Panorama.am-ի հետ զրույցում ասաց «Հանգրվան» ՊՈԱԿ-ի տնօրեն Վահան Զուրաբյանը:
«Բողոքները գնալով քչանում են, ինչն էլ խոսում է որակի մասին»,- նշեց նա:
Այսօր կայացած ասուլիսի ժամանակ «Ունիսոն» ՀԿ գործադիր տնօրեն Արմեն Ալավերդյանը բողոքեց պետության կողմից տրմադրվող սայակների որակից. «Որակն ահավոր է: Ես մի անգամ քիչ էր մնում մեծ վնասվածք ստանայի, քանի որ կոտրվեց»:
Վ. Զուրաբյանի խոսքով, Ա. Ալավերդյանն այս տարվա ընթացքում իրենց ներկայացրել է սայլակի տեխնիկական բնութագիր, որում մասնավորապես նշված է եղել. «Առնվազն վերջին 15 տարիների ընթացքում նախարարության կողմից տրված լավագույն սայլակն է ֆունկցիոնալության առումով: Չնայած հարմար է, բայց որակի առումով կաղում է, ամուր, ձիգ չէ, ամեն տեղից ճռռում է, տպավորությունն այնպիսին է, որ կարող է ամեն րոպե քանդվել»:
ՊՈԱԿ-ի տնօրենն ասաց, որ 2013 թվականին աշխատանքի և սոցիալական հարցերի նախարարի հրամանով սայլակների բաշխում իրականացնում է «Հանգրվան» ՊՈԱԿ-ը, որը նաև սայլակների չափորոշիչների գնահատում է իրականացնում:
«Մենք աշխատում ենք շահառուների հետ՝ հարցնելով իրենց կարծիքը, թե ինչ հավելյար ֆունկցիաներ կցանկանան, որ ունենան սայլակները: Այդ կարծիքների հիման վրա, ինչպես նաև բարեգործական, հասարակական կազմակերպությունների հետ համագործակցելով, միջազգային փորձը, չափորոշիչները հաշվի առելով մշակել ենք ISO ստանդարներին համապատասխանող տեխնիկական բնութագիր: Այդ բնութագիրը կրկին ուղարկել ենք հասարակական կազմակերպություններին, հաշվի առել իրենց առաջարկությունները: Վերջնական արդյունքում ստացած բնութագիրն ուղարկել ենք նախարարությունը, որով էլ իրականացվում է գնումների գործընթացը»,- մանրամասնեց Վ. Զուրաբյանը:
Նա նաև նշեց, որ տեխնիկական բնութագիրը պարբերաբար փոփոխությունների է ենթարկվում, քանի որ ամեն անգամ բաժանելիս հարցնում են շահառուի կարծիքը, թե ինչ առաջարկություններ ունեն՝ ավելի հարմարավետ, բազմաֆունկցիոնալ սայլակ ունենալու համար:
«Իհարկե, չի բացառվում, որ դժգոհողներ լինեն, քանի որ ոչ բոլորի պահանջները կարելի է բավարարել, բայց մենք փորձում ենք հնարավորինս տեխնիկապես հարմար և որակյալ սայլակներ տրամադրել շահառուներին»,- շեշտեց Վ. Զուրաբյանը:
Ըստ նրա, մրցույթը հաղթող ընկերությունների հետ իրենք մշտապես կապի մեջ են լինում, քանի որ մեկ տարի պարտավոր են խնդիրների առաջացման դեպքում վերանորոգել սայլակները:
2014 թվականին ՊՈԱԿ-ը տրամարդել է 647 սայլակ: