«Գազային ՕՊԵԿ-ը» կանխատեսում է գազի պահանջարկի աճ. Ռուսաստանն ու Իրանը մտադիր են մեծացնել առաջարկը
Թեհրանում նախօրեին կայացել է Գազ արտահանող երկրների ֆորումի (GECF) 3-րդ գագաթաժողովը՝ 9-ի մասնակցությամբ երկրի ղեկավարների: Ֆորումը ոչ պաշտոնապես անվանում են նաև «Գազային ՕՊԵԿ», որին բաժին է ընկնում գազի համաշխարհային արտահանման 70%-ով:
Ռուսաստանի նախագահ Վլադիմիր Պուտինը կոչ է արել գազի պահանջարկի աճին զուգընթաց մեծացնել հեղուկ գազի առաքման ծավալները և նոր գազամուղների կառուցման ուղղությամբ ակտիվ քայլեր կատարել՝ միաժամանակ հավելելով, որ Ռուսաստանը մտադիր է 2014թ-ի արդյունահանած 578 մլրդ խմ գազի փոխարեն, 2035թ-ին արդյունահանման ծավալները հասցնել 885 մլրդ խմ-ի: Այս մասին փոխանցում է «Գազետա.ռու»-ն:
Պուտինի այս հայտարարությունը տարակուսանք է առաջացրել փորձագիտական շրջանակների մոտ: East European Gas Analysis ղեկավար Միխաիլ Կորչեմնիկի խոսքով՝ Ռուսաստանը չի տիրապետում նման ֆինանսական ռեսուրսների, որպեսզի միաժամանակ կարողանա կառուցել «Սիբիրի ուժը», «Հյուսիսային հոսք-2» և «Թուրքական հոսք»-ը և դրան զուգահեռ ավելացնի հեղուկ գազի արտադրությունը մինչև 60 մլն տոննայի:
«Գազային ՕՊԵԿ-ի» մասնակից երկրները միակարծիք են մեկ հարցում բնական գազի պահանջարկը որպես լավագույն վառելիքի կշարունակի աճել: Կանխատեսումների համաձայն 2040թ-ին գազի պահանջարկը կավելանա 32%-ով՝ հասնելով մոտ 5 տրլն խմ, այն դեպքում երբ այժմ տարեկան պահանջարկը կազմում է 3.7 տրլն խմ:
Գազ արտահանող երկրների ֆորումի առթիվ Ռուսաստանի և Իրանի ղեկավարների հանդիպումը նշանավորվել է մի շարք կարևոր հարցերի շուրջ համաձայնություն կնքելով: Մասնավորապես երկու երկրների Երկաթուղային ընկերությունների միջև համաձայնություն է ձեռք բերվել Գարմսար-Ինչե Բուրուն երկաթուղային հատվածում էլիկտրաֆիկացման ծրագրի նախագծման և շինարարության շուրջ:
Ռուսաստանը և Իրանը քննարկել են նաև գազի սվոպ գործարք իրականացնելու մասին հարցը: Ավելի վաղ շրջանառվում էր, դա ենթադրում է ռուսական գազի առաքում Իրանի Հյուսիսային շրջաններ, փոխարենը Ռուսաստանը Իրանի հարավում գտնվող հանքահորերից պետք է ստանա գազ և հնարավորություն ունենա դրանք արտահանել պակիստանյան և հնդկական շուկաներ: ՌԴ-ի էներգետիկայի նախարարը հայտարարել է, որ սվոպ գործարքի մասին խոսվել է զուտ որպես առաջարկ և մանրակրկիտ քննարկման անհրաժեշտություն կա:
Պայմանավորվածություն է ձեռք բերվել նաև Իրանի վառելիքաէներգետիկ ոլորտում ռուսական ընկերությունների կողմից ներդումներ կատարելու:
Հարկ է նշել, որ Իրանը մտադիր է պատժամիջոցների վերացումից հետո ակտիվորեն ներգրավվել միջազգային գազային գործընթացներում՝ պլանավորելով դառնալ գազի համաշխարհային շուկայի ամենամեծ խաղացողը: Նման հայտարությամբ օրեր առաջ հանդես է եկել Իրանի նավթարդյունաբերության փոխնախարար Հուսեյն Ամիրա Զամանինիան՝ ընդգծելով, որ Իրանը իր առաձ խնդիր է դրել 2020թ-ին արդյունահանման ծավալները տարեկան հասցնել 474.5 մլրդ խմ: