Գագիկ Ծառուկյանն ընդունել է աթլետիկայի եվրոպական ֆեդերացիայի նախագահ Սվեին Առնե Հանսենին
ՀԱՕԿ-ի նախագահ Գագիկ Ծառուկյանն ընդունել է աթլետիկայի եվրոպական ֆեդերացիայի նախագահ Սվեին Առնե Հանսենին և գլխավոր քարտուղար Քրիստիան Միլցին: Հանդիպման ընթացքում կողմերը քննարկել են Հայաստանում աթլետիկայի զարգացման ուղղությամբ տարվող աշխատանքների ու աթլետիկական վազքուղու բացակայության մասին հարցերը: Սվեին Առնե Հանսենը հայտնել է, որ իր գլխավորած ֆեդերացիան, հաշվի առնելով, որ ՀԱՕԿ-ը Գագիկ Ծառուկյանի գլխավորությամբ վայելում է միջազգային օլիմպիական հանրության անվերապահ վստահությունը, պատրաստ է համատեղ ջանքերով լրացնել այդ բացը: ՀԱՕԿ-ի նախագահը, իր հերթին, հայտնել է, որ պատրաստ է ներդրումներ կատարել, որպեսզի ծրագիրն իրականություն դառնա: Այս մասին տեղեկացնում է ՀԱՕԿ-ի պաշտոնական կայքը:
Շնորհակալություն հայտնելով ջերմ ընդունելության համար՝ Եվրոպայի աթլետիկայի ֆեդերացիայի նախագահը նշել է, որ բարձր է գնահատում Գագիկ Ծառուկյանի անձնական մեծ ներդրումը հայկական սպորտի զարգացման բնագավառում և քաջատեղյակ է այն ահռելի աշխատանքին, որը վերջին 10 տարվա ընթացքում իրականացրել է ՀԱՕԿ-ի նախագահը:
Երևանը եվրոպական միակ քաղաքն է, որը չունի աթլետիկական վազքուղի: «Մենք այսօր հանդիպել ենք ձեր երիտասարդ մարզիկների հետ, վստահաբար կարող եմ ասել, որ նրանք շատ մեծ ներուժ ունեն: Աթլետիկական վազքուղու առկայությունը խիստ կարևոր է: Պարոն Ծառուկյան, հաշվի առնելով այն մեծ հարգանքն ու վստահությունը, որը դուք ունեք միջազգային օլիմպիական ընտանիքում, մենք ցանկություն ունենք ձեզ հետ միասին ներդրումներ կատարել ընդհանուր այս գործի համար: Բացի այդ, Հայաստանի ազգային օլիմպիական կոմիտեն ԵՎՕԿ-ի առանցքային դերակատարներից է, և այդ մասին բազմիցս հայտարարել է նաև Պատրիկ Հիկեն: Ուստի մենք վստահ ենք, որ ձեր աջակցության շնորհիվ մեզ կհաջողվի այս ծրագիրը հաջողությամբ կյանքի կոչել»,- ասել է նա:
ՀԱՕԿ-ի նախագահ Գագիկ Ծառուկյանը հայտնել է, որ իր կողմից պատրաստ է գործադրել բոլոր ջանքերը՝ սպորտի զարգացմանը միտված յուրաքանչյուր նախաձեռնություն կյանքի կոչելու համար: Հայրենական սպորտի ղեկավարը ներդրումներ կատարելու պատրաստակամություն է հայտնել:
«Մենք շատ ուրախ ենք, որ նրանք եկել են մեր երկիր՝ զարգացնելու աթլետիկան: Հայաստանի օլիմպիական կոմիտեն պատրաստ է իր աջակցությունը ցուցաբերել: Մեր գործունեությունը սպորտի զարգացումն է, պետք է հնարավորություն ստեղծենք, որ մեր երիտասարդները կարողանան մարզվել: Հարգելով նրանց այս քայլը՝ մենք պարտավոր ենք աջակցել և միասնական այդ գաղափարը կյանքի կոչել»,- ասել է Գագիկ Ծառուկյանը:
Հանդիպման ավարտին Սվեին Առնե Հանսենին, ի նշան երախտագիտության, Գագիկ Ծառուկյանին Եվրոպայի աթլետիկայի ֆեդերացիայի կողմից հատուկ հուշանվեր է հանձնել: ՀԱՕԿ-ի նախագահը ևս մեկ անգամ վստահեցրել է, որ կանի առավելագույնը՝ նախաձեռնությունը մինչև վերջ կյանքի կոչելու համար:
Սվեին Առնե Հանսենն ու Քրիստիան Միլցը Գագիկ Ծառուկյանի ուղեկցությամբ շրջել են Դավթաշենում կառուցված օլիմպական ավանում: Եվրոպայի աթլետիկայի ֆեդերացիայի նախագահը հայտնել է, որ 50 տարի սպորտի ոլորտում է և իր գործունեության ընթացքում երբևէ նման կառույց չի տեսել: