Հանձնաժողովի անդամի ու վստահված անձի ինստիտուտը պետք չէ նույնացնել. Տիգրան Մուկուչյանը` Լևոն Զուրաբյանին
Ընտրական գործընթացի ժամանակ ընտրական հանձնաժողովի անդամի և առավել ևս հանձնաժողովի նախագահի լիազորությունները միանգամայն տարբերվում են վստահված անձանց լիազորություններից: Այդ մասին Panorama.am-ի թղթակցի հետ զրույցում ասաց Կենտրոնական ընտրական հանձնաժողովի նախագահ Տիգրան Մուկուչյանը` մեր խնդրանքով մեկնաբանելով Հայ ազգային կոնգրես կուսակցության փոխնախագահ, ԱԺ-ում համանման խմբակցության ղեկավար Լևոն Զուրաբյանի հայտարարությունները:
Հիշեցնենք, օրերս Զուրաբյանը «Ֆեյսբուքյան ասուլիս» հաղորդման ժամանակ պատասխանելով Panorama.am-ի հարցին, ասել էր, որ տեղամասերում հանձնաժողովների անդամների բացը, որի թիվը հասնում է 245-ի, իրենք կլրացնեն վստահված անձանց միջոցով:
«Այդ տեղամասեր մենք կուղարկենք վստահված անձանց: Մենք շատ դեպքերում մտածել ենք, որ վստահված անձը ավելի արդյունավետ անելիք ունի և շատ ուժեղ մարդկանց այդ տարածքներ կուղարկենք որպես վստահված անձ: Այնպես որ անհանգստանալու մեծ առիթ չկա, իրականում այս գործընթացը շատ նորմալ գնում է առաջ», -հավելեց ՀԱԿ փոխնախագահը:
Նկատենք, որ Հայ Ազգային կոնգրես կուսակցությունը մասնավորապես, հանձնաժողովի անդամներ չի ունենալու Երևանի 43 ընտրատեղամասերում, որոնցից միայն 3-ը հանձնաժողովի քարտուղարներ են: Իսկ այ օրինակ 6 համայնքների` Ալագյազ, Վերին Սասունիկ, Գառնահովիտ, Կանչ, Կարմրաշեն, Գողթ ընտրատեղամասում ՀԱԿ-ը չի ունենա հանձնաժողովի նախագահ:
Տիգրան Մուկուչյանի խոսքով, ընտրատեղամասերում քվեարկության գործընթացի ժամանակ վստահված անձանց կողմից հսկողություն իրականացնելը կարևոր է, բայց հանձնաժողովի անդամը և առավել ևս նախագահը էլ ավելի կարևոր գործառույթներ է իրականացնում:
«Իհարկե, վստահված անձանց ինստիտուտը ավելի մեծ հասարակական վերահսկողության հնարավորություն է ստեղծում: Միանշանակ, դա խրախուսելի է: Բայց կարծում եմ չպետք է նույնացնել հանձնաժողովի անդամին ու վստահված անձին: Հանձնաժողովի անդամները նախ ոչ միայն իրավունքներ ունեցող, այլ նաև կոնկրետ պարտականություններ ունեցող ու պատասխանատվություն կրող անձինք են, որոնք կոչված են կազմակերպել քվեարկության ամբողջ գործընթացը: Այս առումով եթե մենք նայում ենք, հանձնաժողովի անդամը նաև իր կարգավիճակին բնորոշ ավելի որոշակի լիազորություններ ունի, որը վստահված անձը չունի: Նույն քվեաթերթիկի հաշվարկի պարագայում հանձնաժողովի անդամը կարող է պահանջել որ իր առարկությունը կոնկրետ քվեաթերթիկի վավերականության հետ կապված դրվի քվեարկության: Նրանց կարգավիճակները տարբեր են», -ներկայացրեց Տիգրան Մուկուչյանը:
Ինչ վերաբերում է վստահված անձանց ինստիտուտին, ապա այն քվեարկության պրոսեցի նկատմամբ, ըստ ԿԸՀ նախագահի, «վերահսկողության լիարժեք հնարավորություն է տալիս»:
«Բայց խնդիրը հետևյալն է` այնպես չէ, որ մենք վստահված անձ ունենալով չեզոքացնում ենք հանձնաժողովի անդամ ունենալու իրավունքը: Երբ տրված է երկու իրավունք կարծում եմ երկու իարվունքից էլ նախընտրելի է օգտվել` ունենալ և հանձնաժողովի անդամ, և վստահված անձ: Հակառակ պարագայում, եթե մենք նայում ենք օրինակ եթե ասվում է, որ բաց տեղերը կլրացվեն վստահված անձանց միջոցով, հարց է առաջանում եթե այդ երկու ինստիտուտները նույնացվում են, ապա այդ դեպքում ինչո՞ւ են մյուս ընտրատեղամասերում նշանակումներ կատարվել: Սրանք տարբեր ինստիտուտներ են: Ես կարծում եմ երկու ինստիտուտներից օգտվելը բացառապես կնպաստի հասարակական վերահսկողության ավելի լայն իրականացմանը», -հավելեց մեր զրուցակիցը:
Հարակից հրապարակումներ`
- Անհանգստանալու կարիք չկա. Զուրաբյանը` հանձնաժողովներում ՀԱԿ-ի թափուր տեղերի մասին
- ՀԱԿ-ը 245 տեղամասերի հանձնաժողովներում թափուր է թողել առանցքային պաշտոններ
- ԿԸՀ-ն բավարարեց Լևոն Զուրաբյանի դիմումը
- «Ոչ»-ի ճակատը ընտրական հանձնաժողովներում ներկայացուցիչներ ապահովելու խնդիրներ ունի