Ձեր վստահելի աղբյուրը

Նոյեմբերի 25-ին Նորք Մարաշում վնասազերծված զինված խմբավորման անդամների ձերբակալությունից հետո նույն օրն առավոտյան սեփական տնից բերման է ենթարկվել հետո ձերբակալվել պահեստազորի գնդապետ, ազատամարտիկ Խաչիկ Ավետիսյանը: Այդ մասին Panorama.am-ին տեղեկացրեց նրա ընկերը` ազատամարտիկ Վլադիմիր Առաքելյանը:

«Ձերբակալման պատճառները մեզ անհայտ են մնում: Այսօր նրա կնոջ հետ հանդիպել ենք նրա պաշտպանին, որը հանրային պաշտպան է ու նա մեզ տեղեկացրել է, որ նույն քրեական գործն է, ինչն հարուցվել է զինված խմբավորման անդամներին: Սա ուղղակի խեղկատակություն է»,- մեզ հետ զրույցում ասաց Առաքելյանը:

Վնասազերծված զինված խմբի գործով ձերբակալվել է 21 անձ, որոնցից պաշտոնապես հաղորդվում է միայն Արթուր Վարդանյանի անունը: Մյուսների անունները չեն հրապարակվում: Այսօր արդեն դատարան է ներկայացվում միջնորդություն գործով անցնող մեղադրյալներին երկու ամսով կալանավորելու համար:

Հիշեցնենք` քրեական գործը հարուցվել է ՀՀ ՔՕ 223 հոդվածի 1-ին և 2-րդ մասերով՝ (Հանցավոր համագործակցություն ստեղծելը կամ ղեկավարելը 1. Հանցավոր համագործակցություն ստեղծելը կամ հանցավոր համագործակցություն ղեկավարելը) և 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):

Վլադիմիր Առաքելյանը վստահ է` կատարվածը թյուրիմացություն է: «Մենք ընկերներով չենք հավատում, որ Ավետիսյանը կապ ունի դրա հետ: Չենք էլ հավատալու, որովհետև էդ տղեն պետական մտածողություն ունեցող մարդ է, ոնց կարող է նման ծրագիր ունենալ», -հավելեց պարոն Առաքելյանը:

Նշենք, որ այսօր ԱԱԾ քննչական վարչության պետի տեղակալ Միքայել Համբարձումյանը հայտարարել էր, որ զինված վնասազերծված խումբը կազմակերպված է եղել, ունեցել է հստակ ծրագրեր, իսկ խմբի թիրախում եղել են իշխանության առանձին ճյուղեր, քաղաքացիներ, պետական, քաղաքական գործիչներ, ինչպես նաև պետական մարմիններ: