Ձեր վստահելի աղբյուրը

2014թ.-ին աղքատության մակարդակը կազմել է 30 %, այսինքն երկրի 10 բնակչից 3-ը ամսական 40,264 ՀՀ դրամ վերին աղքատության գծից ցածր են գտնվել: Նման տվյալներ է հրապարակել Ազգային վիճակագրական ծառայությունը՝ «Հայաստանի սոցիալական պատկերը և աղքատությունը» զեկույցում:

Ըստ աղբյուրի, 2013թ.-ի համեմատ արձանագրվել է աղքատության մակարդակի զիջում 2 տոկոսային կետով:

2014թ.-ին աղքատների ընդհանուր թվաքանակը կազմել է շուրջ 900 հազար մարդ (մշտական բնակչության ցուցանիշի հաշվով), նրանցից՝ շատ աղքատների թվաքանակը (ներառյալ ծայրահեղ աղքատները)`մոտ 330 հազար, իսկ վերջիններից  ծայրահեղ աղքատների թվաքանակը` մոտ 70 հազար մարդ:

Ծառայությունից բացատրում են, որ 2008-2014թթ. ժամանակահատվածում Հայաստանում աղքատության մակարդակի աճը պայմանավորող առավել կարևոր գործոնը 2009 թվականին տնտեսության խոր անկումն էր 14.1 %-ի չափով: Հայաստանի տնտեսությունը 2010 թվականին նախորդ տարվա նկատմամբ մի փոքր աճեց, սակայն աճը կազմեց ընդամենը 2.2 %, իսկ 2011 թվականին 2010 թվականի նկատմամբ աճը կազմեց 4.7 %:

Հաջորդ տարում՝ 2012 թվականին տնտեսական աճը բավականին զգալի էր՝ 7.2 %-ի չափով, սակայն դեռ բավարար չէր 2008 թվականի մակարդակին հասնելու համար, իսկ 2013թ. 1-ին տնտեսության աճը նախորդ տարվա աճից գրեթե կրկնակի ցածր էր (միայն 3.3 %1), ինչը բավարար չէր երկրում աղքատության մակարդակի նվազման համար (2013թ.-ին այն նվազել է միայն 0.4 տոկոսային կետով և կազմել 32.0 %): 2014թ. 1-ին նախորդ տարվա նկատմամբ Հայաստանի տնտեսությունը աճեց 3.5 %-ով և գրանցվեց աղքատության մակարդակի նվազում 2 տոկոսային կետով: Ինչպես բացահայտում են 2014թ.-ի ՏՏԿԱՀ տվյալները, ողջ բնակչության միջին ամսական իրական սպառումը 2008թ.-ի համեմատ աճել է 11 %-ով և աճը նկատվել է սպառման բոլոր քվինտիլներում»,-ասված է զեկույցում:

Ծառայությունից մանրամասնում են, որ  աղքատության մակարդակը գնահատելու համար սույն զեկույցում որպես բարեկեցության ցուցանիշ օգտագործվել է սպառումը: Տնտեսագետների կարծիքով, սպառմանն ուղղված ծախսերն ավելի ճշգրիտ տեղեկատվություն են ներկայացնում բարեկեցության մասին, քանի որ եկամուտների բացակայությունը դեռևս չի նշանակում բարեկեցության զրոյական մակարդակ այն դեպքերում, երբ տնային տնտեսություններն իրենց ապրուստը հոգում են սեփական արտադրության սննդամթերքի սպառման կամ վարկային շուկայից միջոցների ներգրավման եղանակով:

Աղքատ գնահատվել են նրանք, ում սպառումը մեկ չափահաս անձի հաշվով ցածր է եղել աղքատության վերին ընդհանուր գծից, շատ աղքատ գնահատվել են նրանք, ում սպառումը մեկ չափահաս անձի հաշվով ցածր է եղել աղքատության ստորին ընդհանուր գծից, իսկ ծայրահեղ աղքատ գնահատվել են նրանք, ում սպառումը մեկ չափահաս անձի հաշվով ցածր է եղել աղքատության պարենային գծից:

2014թ.-ին աղքատության ընդհանուր, վերին և ստորին, ինչպես նաև ծայրահեղ աղքատության գծերը, արտահայտված մեկ չափահաս անձի հաշվով, մեկ ամսվա համար գնահատվել են` համապատասխանաբար 40 264 դրամ (կամ 96.8 ԱՄՆ դոլար), 33 101 դրամ (կամ 79.6 ԱՄՆ դոլար) և 23 384 դրամ (կամ 56.2 ԱՄՆ դոլար):