Շուշանիկ Բախշյանի մոտ երկկողմանի թոքաբորբ ախտորոշումը չի հաստատվել. Փաստաբան
«Շենգավիթ» բժշկական կենտրոնի մանկաբարձ-գինեկոլոգ Շուշանիկ Բախշյանի մոտ երկկողմանի թոքաբորբ չի եղել և գլխավոր վարակաբան Արա Ասոյանի ախտորոշումը, փաստորեն, սխալ էր: Այդ մասին Panorama.am-ի թղթակցի հետ զրույցում ասաց ծննդկան Մերի Մարգարյանի գործով տուժող կողմի իրավահաջորդի ներկայացուցիչ-փաստաբան Մարինե Թովմասյանը:
Նա տեղեկացրեց, որ երբ Շուշանիկ Բախշյանի ձերբակալման վերաբերյալ որոշումը վիճարկվում էր դատարանում և ՀՀ գլխավոր վարակաբան Արա Ասոյանի ախտորոշման հիման վրա Բախշյանը չձերբակալվեց ու հոսպիտալացվեց, իրենց մոտ կասկածներ առաջացան, որ Բախշյանը հիվանդ չէ ու քննչական կոմիտեին միջնորդել են դատաբժշկական փորձաքննություն անցկացնել:
«Քննչական կոմիտեն բավարարեց մեր միջնորդությունը, Շուշանիկ Բախշյանը ենթարկվեց փորձաքննության և այսօր փորձաքննության եզրակացությունը իմ ձեռքի տակ է, ծանոթացել ենք և քանի որ նախաքննական գաղտնիք պարունակող ինֆորմացիա է, ես կասեմ մեր կարծիքը` չի հիմնավորվել այն ախտորոշումը, որ պարոն Ասոյանը ներկայացրել էր և այդ ախտորոշմամբ հոսպիտալացրել էր»,- մեզ հետ զրույցում հավելեց Մարինե Թովմասյանը:
Փորձեցինք փաստաբանից ճշտել, թե փորձաքննությամբ պարզվել է, որ Շուշանիկ Բախշյանը երկկողմանի թոքաբորբ չի՞ ունեցել, փաստաբանը պատասխանեց. «Բնավ: Հինգ փորձագետների կողմից ռենտգեն հետազոտություններ են կատարվել, և մենք չունենք այն ախտորոշման հաստատումը, որ ՀՀ գլխավոր վարակաբանը ախտորոշել էր»:
Այս ամենը տուժող կողմի մոտ հիմք է տվել եզրակացնել, որ պաշտպանական կողմը նման վարքագծով խոչընդոտել է քննությանը:
«Դա նրանց, ըստ էության, հաջողվեց: Փաստորեն անհրաժեշտություն չէր եղել հոսպիտալացնել Շուշանիկ Բախշյանին», -հավելեց մեր զրուցակիցը:
Փաստաբանի խոսքով, տուժող կողմը դժգոհ է, որ Բախշյանի նկատմամբ կիրառվել է գրավ. «Կարծում եմ, որ եթե երկկողմանի բողոք ներկայացվի Վերաքննիչ դատարան, ապա տուժող կողմը համապատասխան միջնորդություն ներկայացնել դատարան, որ մենք` որպես տուժող կողմ ինքներս նույնպես ներկա լինենք այդ պրոցեսներին»:
Հիշեցնենք` «Էրեբունի» բժշկական կենտրոն տեղափոխված Մերի Մարգարյանը մահացել էր հուլիսի 29-ին` հուլիսի 27-ին կատարված կեսարյան հատումից հետո: Նրա մոտ ախտորոշվել էր «HELLP» սինդրոմ (մանկաբարձության մեջ հազվադեպ հանդիպող բարդություն) համախտանիշի թոքաբորբ: Հուլիսի 30-ին էլ մահացել էր նաև նրա նորածին դուստրը:
Դեպքի առթիվ հարուցվել էր քրեական գործ՝ ՀՀ քրեական օրենսգրքի 130-րդ հոդվածի 2-րդ մասի հատկանիշներով` «Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ»։ Հունվարի 26-ին Բախշյանին մեղադրանք էր առաջադրվել: Հունվարի 30-ին քննչական կոմիտեն դատարանին միջնորդել էր որպես խափանման միջոց Բախշյանի նկատմամբ կիրառվի կալանավորում, սակայն դատարանը որոշել էր կիրառել այլընտրանքային միջոց` նրան ազատելով գրավի դիմաց:
Մերի Մարգարյանը և նորածինը քրեական գործով ճանաչվել էին որպես տուժող, իսկ Մերի Մարգարյանի հայրը` Վաղինակ Մարգարյանը, տուժողների իրավահաջորդ:
Քննչական կոմիտեից հայտնել էին, որ դեպքի առթիվ նյութերի նախապատրաստման ընթացքում պարզվել էր, որ Մերի Մարգարյանը 4 օր շարունակ ունեցել է բարձր ջերմություն, սակայն բժշկական օգնություն և սպասարկում իրականացնող «Շենգավիթ» ԲԿ բժշկուհի Շուշանիկ Բախշյանը, պարտավոր լինելով կնոջը հոսպիտալացնել, հրաժարվել և չէր կատարել իր պարտականությունները։
Հարակից հրապարակումներ`
- Թող ապացույցներ ներկայացնեն և ոչ թե զրույցներ. Շուշանիկ Բախշյանի պաշտպան
- Էս գործը պետք է օբյեկտիվ քննվի. Շուշանիկ Բախշյանի փաստաբան
- Շուշանիկ Բախշյանի առողջական վիճակը վատ չէ և այդ մասին ունենք փաստեր. Փաստաբան
- Քննիչը դատարանի միջանցքներում որոշումներ չի կայացնում. ՔԿ-ն արձագանքում է Շուշանիկ Բախշյանի փաստաբանին
- Դատարանը որոշել է ազատել Շուշանիկ Բախշյանին, բայց քննիչը չի կատարում որոշումը. Փաստաբան