Ի՞նչ են մտածում ֆուտզալի հավաքականի ֆուտբոլիստները
Հայաստանի ֆուտզալի ազգային հավաքականը փետրվարի 8-10-ը մարզական հավաք է անցկացնում ՀՖՖ Տեխնիկական կենտրոնում՝ ֆուտբոլի ակադեմիայում՝ զուգակցելով տեսական ու գործնական պարապմունքները: ՀՖՖ պաշտոնական կայքի թղթակիցը զրուցել է հավաքականի գլխավոր մարզիչ Ռուբեն Նազարեթյանի, ինչպես նաև մի քանի ֆուտբոլիստների հետ:
Ռուբեն Նազարեթյան. «Նպատակը նոր ֆուտբոլիստներին գործի մեջ տեսնելն է»
- Այս մարզական հավաքի նպատակը հիմնականում հավաքականի թեկնածուներին ուսումնասիրելն է, նրանց գործի մեջ տեսնելը, որովհետև մի բան է, երբ խաղացողին հետևում ես իր ակումբում, մեկ այլ բան, երբ նա արդեն մարզվում է հավաքականի կազմում, որտեղ բոլորովին ուրիշ մակարդակ է, և այլ պահանջներ են գործում: Առաջնության մակարդակն այս տարի նորմալ է, կա պայքար: Այս անգամ նոր ֆուտբոլիստներ ենք հրավիրել, այդ թվում երկուսին՝ Ռուսաստանից: Քանի որ հիմնական դարպասապահ և թիմի ավագ Էռնեստ Ակոպովի կարողություններին ծանոթ ենք, նրան այս անգամ հավաքին չենք հրավիրել՝ թողնելով, որ մասնակցի իր ակումբի հանդիպումներին: Չնայած մոտակա պաշտոնական խաղերին մոտ մեկ տարի ժամանակ կա, և առայժմ վաղ է մտածել կոնկրետ նախապատրաստության մասին, այս կարգի հավաքները, միևնույն է, կարևոր են այն առումով, որ դրանց ընթացքում փորձարկում ենք տակտիկական նոր մտահղացումներ, տղաներին բացատրում, թե ինչպես ենք խաղալու հետագայում:
Վարդան Ղուկասյան. «Հավաքականում կան հեռանկարային ֆուտբոլիստներ»
- Ես խաղում եմ Սարատովի «Արխիզ» ակումբում: Մեր թիմը հանդես է գալիս Ռուսաստանի բարձրագույն խմբի առաջնության «Հարավ» գոտում: Մշտապես խաղում եմ հիմնական կազմում: Առաջին անգամ չէ, որ հրավիրվում եմ հավաքական և տղաների մեծ մասին ծանոթ եմ, քանի որ միասին խաղացել ենք նաև Խորվաթիայում տեղի ունեցած մրցաշարում: Բայց կան նաև նորեկներ, որոնց չէի ճանաչում: Չնայած դեռ քիչ թվով մարզումներ ենք անցկացրել, երևում է, որ հավաքականի նորեկների մեջ կան հեռանկարային ֆուտբոլիստներ: Եթե նրանք հրավիրվել են Հայաստանի առաջնությունում հանդեղ եկող թիմերից, ուրեմն առաջնության մակարդակը բավական բարձր է: Կուզեի նշել նաև հավաքի անցկացման պայմանների մասին: Քանի որ խաղում եմ Ռուսաստանում, կարող եմ համեմատել և ասել, որ այնպիսի պայմաններ, ինչպիսին Ֆուտբոլի ակադեմիայում են, արտերկրում էլ ամեն տեղ չես հանդիպի:
Գրիգոր Կապուկրանյան «Պետք է ձգտենք բարելավել մեր մարզավիճակը»
- Նախկինում այս կարգի հավաքներ այնքան էլ հաճախ չէին կազմակերպվում, բայց հիմա Ռուբեն Նազարեթյանի նախաձեռնությամբ դրանք հաճախակի բնույթ են կրելու: ՀՖՖ-ն բոլոր պայմանները ստեղծել է, որպեսզի կարողանանք կենտրոնանալ միայն մարզումների վրա: Այսպիսի հավաքները շատ օգտակար են, քանի որ մեզ համար շատ կարևոր է մարզվել հավաքականի մյուս տղաների հետ, բարելավել փոխհամագործակցությունը: Դեռևս այնքան ել գոհ չեմ իմ մարզավիճակից, ավելորդ քաշի խնդիր ունեմ, բայց հուսով եմ, որ աստիճանաբար կավելացնեմ և կվերագտնեմ մարզավիճակս: Առաջնության մակարդակը նախորդ տարիների համեմատ այնքան էլ վատ չէ: Դրա շնորհիվ ավելացել է նաև հավաքականի թեկնածուների թիվը: Օրինակ՝ չնայած Տիգրան Դավթյանը նոր է սկսել հանդես գալ ֆուտզալում, բայց մեծ ֆուտբոլում հսկայական փորձ է կուտակել: Նրա պես խելացի խաղացողները կարող են շատ օգտակար լինել հավաքականին, հատկապես՝ հետին գծում: Ռուսաստանից հրավիրված Վարդան Ղուկասյանն ու Բորիս Վարդանյանը, կարծում եմ, նույնպես կուժեղացնեն հավաքականը:
Տիգրան Դավթյան «Պետք է ձգտենք բարելավել մեր մարզավիճակը»
-Ես շատ երկար տարիներ խաղացել եմ մեծ ֆուտբոլում, և հիմա ինձ համար մի փոքր դժվար է միանգամից հարմարվել ֆուտզալին: Տարբերությունը բավական մեծ է« Ֆուտզալն ավելի դինամիկ է, խաղացողները պետք է ունենան գնդակին տիրապետելու լավ որակներ, կարողանան արագ մտածել: Ինձ համար մի քիչ անսովոր է ֆուտզալ խաղալը, բայց կաշխատեմ հետևել մարզիչների հրահանգներին, որպեսզի կարողանամ շուտ հարմարվել: Եթե հարմար են գտել հրավիրել հավաքական, ուրեմն պետք է ամեն ինչ անեմ՝ թիմին օգնելու համար, քանի որ ազգային հավաքականում հանդես գալը պատիվ է ցանկացած ֆուտբոլիստի համար: Չնայած նորեկ եմ, բայց թիմին մերվելու խնդիր չունեցա, քանի որ տղաների մեծ մասին ճանաչում էի դեռևս մեծ ֆուտբոլ խաղալու տարիներից: Առաջնության մակարդակը հիմա այնպիսին է, որ թույլ է տալիս մարզիչներին ավելի մեծ ընտրություն ունենալ: Օրինակ՝ չնայած ՀՊՏՀ-ն միավորներով պոկվել է մյուսներից, բայց առաջին քառյակի թիմերի միջև բոլոր խաղերում էլ համառ պայքար է եղել: Արթիկի թիմը, որը քառյակում չէ, կարողացավ հաղթել «Գյումրիին»: Ինչքան շատ լինեն խաղացողները, այնքան պահեստայինների նստարանն ավելի երկար կլինի, և դա կհեշտացնի մարզիչների գործը: Մյուս կողմից՝ շատ կարևոր է, որ փոխարինող ֆուտբոլիստները, դաշտ մտնելով, չգցեն տեմպը և կարողանան խաղալ խաղային նույն ձեռագրով:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին