Ձեր վստահելի աղբյուրը

«Արարատյան դաշտավայրն ապահովվում է Հայաստանի գյուղատնտեսական արտադրանքի 40 տոկոսը, տարիներ շարունակ դաշտավայրն ապահովել է խմելու, ոռոգման, Մեծամորի ատոմակայանի սառեցման համար ջուր, սակայն դաշտավայրն ունի ստորերկրյա ջրերի լուրջ խնդիր»,- այս մասին այսօր ահազանգեց  ԱՄՆ ՄԶԳ-ի հայաստանյան առաքելության տնօրեն Քարեն Հիլիարդը՝  ԱՄՆ ՄԶԳ-ի «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահպանության» ծրագրի մեկնարկին:

Հիլիարդը  նաև ասաց, որ  ձկնաբուծության ոլորտի աճի և ջրի անարդյունավետ օգտագործման պատճառով զգալի նվազել են Արարատյան դաշտավայրի ջրային ռեսուրսներ՝ հավելելով,  որ ԱՄՆ ՄԶԳ ֆինանսավորմամբ իրականացված Արարատյան դաշտի ստորերկրյա ջրային ռեսուրսների ուսումնասիրությունն ընդգծել է ստորերկրյա  ջրային պաշարների կրճատման հետ կապված մտահոգիչ իրավիճակը:

Ըստ ուսումնասիրության՝ ստորերկրյա ջրերի մակարդակի նվազման և ձկնաբուծարանների կողմից արտեզյան ջրերից չկարգավորված ջրառի հետևանքով Արարատի և Արմավիրի մարզերի մոտ 30 համայնք մնացել է առանց խմելու և ոռոգման ջրի: Իսկ դա, ըստ Ք. Հիլիարդի, նշանակում է,  որ ջրի պակասությունը սպառնում է երկրի գյուղատնտեսական ոլորտին, նշված մարզերի սոցիալ-տնտեսական և բնապահպանական վիճակի վատթարացմանը:

Քարեն Հիլարդը նաև մտահոգություն հայտնեց Արարատյան դաշտում բնակվող 260 հազար մարդկանց ջրի խնդիրների մասին:

Նրա խոսքերով՝ այս խնդիրներն աստիճանաբար կարգավորելու համար պատրաստ են ներմուծել գերժամանակակից տեխնոլոգիաներ, գտնել դոնորներ, որպեսզի ստորերկրյա ջրերը արդյունավետ օգտագործվեն:

«Ձկնարտադրողների և ձկնահանողների միասնություն» կազմակերպության նախագահ Արթուր Աթոյանը լրագրողների հետ զրույցում անդրադառնալով Հիլիարդի հայտարարությանն՝ ասաց, որ ծրագիրը մի շարք թերություններ ունի, տրամադրված տեղեկատվությունը վաղեմի հնության է:

Նրա խոսքերով՝  տարիներ շարունակ ապօրինի ջրօգտագործման մասսայական երևույթներ չեն եղել, այլ եղել են հատուկենտ դեպքեր:

«Սակայն բնապահպանության նախարարությունը մի շարք միջոցառումներ է իրականացրել, որոնց արդյունքում Արարատյան դաշտավայրի ջրօգտագործման ռեժիմը բերվել է կառավարման մակարդակի: Արդյունքում, վերականգնվել է Արարատյան դաշտավայրի ստորգետնյա ջրավազանը»,- ասաց նա:

Ա.Աթոյանը անդրադառնալով  ուսումնասիրությանը,  որի համաձայն՝ Արարատի և Արմավիրի մարզերի մոտ 30 համայնք մնացել է առանց խմելու և ոռոգման ջրի, նշեց, որ Արարատյան արտեզյան ավազանի ջրերից տնտեսական նկատառումներով շատ քիչ գյուղեր են օգտվում:

«Այդ ջրավազանի ջրերը հիմնականում օգտագործվում են ոչ թե կենցաղային, այլ տնտեսական նպատակներով: Այն գյուղերը, որոնք ջրազրկվել են, դա ամենևին կապ չունի ձկնաբուծական տնտեսությունների աշխատանքի հետ»,-նշեց Արթուր Աթոյանը:

Երևանում այսօր պաշտոնապես մեկնարկած եռամյա ծրագիրը միտված է նվազեցնելու Արարատյան դաշտի ստորերկրյա ջրային ռեսուրսների ջրառի ծավալները ու ապահովելու ռեսուրսների կայուն պահպանությունը: