Ձեր վստահելի աղբյուրը

Երևանի ավագանու «Բարև Երևան» խմբակցության անդամ Անահիտ Բախշյանն առաջարկում է ընտանի կենդանիներ պահելու թույլտվության համար տուրքի մասին իրավական նորմի կիրառումը սառեցնել  Խարբերդում, մինչև խելամիտ լուծում գտնվի: 

Հիշեցնենք, խարբերդցիների խնդրի մասին Բաշխյանին ահազանգել էր Panorama.am-ը:

«Նամանավանդ, որ ամբողջ Երևան քաղաքի բյուջեի մուտքերի մեջ այս տուրքը  աննշան մաս է կազմում, 2015-ին՝ ընդամենը  2.5մլն-ին մոտ գումար»,-տարածած հաղորդագրության մեջ գրել է Բաշխյանը:

Խմբակցության անդամի խոսքով, ավագանու 2016 թ. առաջին՝ փետրվարի 9-ի նիստում օրենքով   պահանջվող  հարց  ու պատասխանը  պետք է լիներ, բայց քանի որ  չի եղել, ինքը հարցը հրապարակել է:

«Իհարկե Խարբերդը Երևանի մեջ է մտնում, իհարկե, 1997թ. օրենքով սահմանված են ընտանի կենդանիներ  պահելու իրավունք ուենալու  թուլտվության  տուրքերը  ու մեկ անգամ չէ, որ Ձեր աշխատանքային խորհրդակցությունների ժամանակ քննարկվել են այդ հարցերը, բայց դրանք հատկապես եղել են  շներ  պահելու հետ կապված  ու տուրքերը հիմնավորվել են նրանով, որ դրանք ծառայում են  քաղաքի մաքրությանը:

Խարբերդը, թեև  քաղաք է համարվում, բայց  տեղյակ եք, որ մարդիկ շատ դեպքերում ապրում են գյուղական կենցաղով ու իրենց ապրուստի համար պահում են նաև թռչուններ՝   հավեր, հնդկահավեր, որոնք շատ չեն: Որպես պահակ պահում են նաև շներ, մկներին չեզոքացնելու համար պահում են կատուներ, որոնց  հետ  կապված ամեն ինչ իրենք են հոգում ու քաղաքային իշխանությունը դրանց ետևից մաքրելու համար ոչ մի ծախս չի անում:

Երևանի քաղաքապետարանն ունի  նաև  երևանցիների սոցիալական խնդիրներ  հոգալու պատվիրակված լիազորություններ, որոնք այս դեպքում պետք է դրսևորվեն  խարբերդցիների  ստեղծածը  պահպանելուն  և չխանգարեն մարդկանց, ովքեր  իրենց երեխաներին այդ մի քանի հավով կամ հնդկահավով են պահում կամ  իրենց  գույքի  պահպանությունը  շանն են վստահում, թաղամասում  չկիրառվող  դեռատիզացիան  էլ կատուների միջոցով են իրականացնում:

Մարդիկ իրավացիորեն  են դժգոհում  այդ տուրքից, որն ընդունվել էր 1997 թվականին, բայց ուժի մեջ մտել՝ 2010թվականից, ավագանու որոշմամբ՝ նույնպես 2010թվականի հունվարի 1-ից փաստորեն սկսել է կիրառվել Երևանում, սակայն Խարբերդում 2015-ից են որոշել  կիրառել :  Փոխանցելով  խարբերդցիների բողոքները, առաջարկում եմ այդ իրավական նորմի կիրառումը սառեցնել  Խարբերդում, մինչև խելամիտ լուծում գտնելը, նամանավանդ, որ ամբողջ Երևան քաղաքի բյուջեի մուտքերի մեջ  այս տուրքը  աննշան մաս է կազմում, 2015-ին՝ ընդամենը  2.5մլն-ին մոտ գումար:

Հարգելի պարոն Մարգարյան, եթե  օրենքում փոփոխություն անելու  համար  ժամանակը  կարճ է, իսկ խարբերդցիների  բողոքը՝ տեղին,  ապա  լուծումը  կարող եք  տալ Ձեր ապագա  նախընտրական ծրագրում»,-ասված է Բախշյանի հրապարակած հարցում: