Ձեր վստահելի աղբյուրը

ՀՀ կառավարությունն այսօրվա նիստում հաստատեց Հարկային նոր օրենսգրքի նախագիծը: Ինչպես գործադիրի նիստում նշեց Պետական եկամուտների կոմիտեի փոխնախագահ Վախթանգ Միրումյանը, երկարատև քննարկումներից հետո նախագիծը լրամշակվել է նախնական ամրագրված սկզբունքների շուրջ և փաստաթուղթը պետք է ապահովի տնտեսության երկարաժամկետ աճը՝ չկարևորելով կարճաժամկետ արդյունքները:

Oրենսգրքի ընդունումից հետո, ըստ նրա, ոչ միայն արտահանողները հնարավորություն կունենան ստանալ ավելացված արժեքի հարկի գումարները, որոնք վճարված են մատակարարներին, այլ նաև այն տնտեսվարող սուբյեկտները, ովքեր տնտեսությունում կատարել են լայնածավալ ներդրումներ: Այսինքն, ըստ Միրումյանի, վեց ամսվա կտրվածքով այս սուբյեկտներին կվերադարձվի ԱԱՀ գումարները:

ՊԵԿ փոխնախագահը նշեց նաև, որ արտադրական նշանակության սարքավորումներ, ինչպես նաև հումքի տեսակներ երրորդ երկներից ներմուծվելու դեպքում ԱԱՀ-ն կվճարվի ոչ թե մաքսային մարմինների ներմուծման օրվանից հաշվված 10 օրվա ընթացքում, այլ կվճարվի հարկային մարմիններին մինչև հաջորդ ամսվա 20-ը:

Որշադրության կենտրոնում են նաև ՀՀ-ում վերամշակում և արտահանում իրականացնող տնտեսվարողները: Նրանք կազատվեն ԱԱՀ-ից:

Վախթանգ Միրումյանն ասաց,  այս դրույթը կառանձնացվի օրենսգրքից, և նախատեսվում է այն կիրառել ավելի վաղ, քան օրենսգիրքը կընդունվի:

Նրա խոսքերով՝ ԱԱՀ հարցում կառավարությունը նախատեսում է հաշվանցումների ազատականացում, որը տարիներ շարունակ սահմանափակվել է՝ տվյալ պահի անհրաժեշտությունից ելնելով:  Նման մոտեցումներ կլինեն նաև շահութահարկի գծով:

Ըստ ՊԵԿ փոխնախագահի՝ նախատեսվում է նաև ընդհանուր դաշտում գործող անհատ ձեռնակատերերի համար հարկային բեռի նվազեցում անել, որպեսզի դա հավասարվի շահութահարկին և բիզնես իրականացնելու համար այդ դրույքաչափերը լինեն համեմատաբար ավելի չեզոք:

Հաջորդ սկզբունքը վերաբերում է նրան, որ կարևորվում է ինչպես միջնաժամկետ, այնպես էլ երկարաժամկետ հատվածում բյուջետային եկամուտների կայունությունը: Այստեղ, ըստ Միրումյանի, հիմնական ուղղությունը հանդիսանում են ակցիզային հարկերը: Նախատեսվում է 2017-2021 թվականի ընթացքում սահուն, ըստ տարիների, որոշակի չափով վերանայել ծխախոտի, օղու արտադրանքի, ինչպես նաև վառելիքի որոշ տեսակների համար ակցիզային հարկի դրույքաչափերը:

Նշվեց, որ ծխախոտի և օղու մասով դրույքաչափերը համապատասխանեցվում են Եվրասիական տնտեսական միության անդամ երկրներում գործող դրույքաչափերին, քանի որ Հայաստանը ստանձնել է նման պարտավորություն: Սակայն, ըստ նրա, անգամ 2021 թվականին Հայաստանը չի հավասարվելու այդ երկրների դրույքաչափերին և ունենալու է ընդհանուր դրույքաչափից 20 տոկոս ավելի ցածր դրույքաչափ:

«Օրենսգրքի շրջականերում սկզբունքային է եղել նաև հարկման այլընտրանքային եղանակների կիրառությունը: Հայաստանն այսօր աշխարհում զբաղեցնում է առաջին տեղը հարկման այլընտրանքային համակարգի տարածվածությամբ, ինչն էական աղավաղում է համակարգը և ցուցաբերում է  անարդարացի դրսևորումներ: Վերանայվել են նաև այդ մոտցումները, որ երկարաժամկետ հատվածում բիզնեսի 90 տոկոսը պարզապես չի կարող գտնվել հարկման այլընտրանքային ռեժիմների ներքո»,- ասաց Վախթանգ Միրումյանը:

Ինչ վերաբերում է հարկային վարչարարության բարեփոխումներին, ապա այստեղ մեծապես կարևորվում է հարկային կարգապահության բարձրացումը, համակարգի թափանցիկության ապահովումը և միջազգային պրակտիկայում ընդունված հարկման ինքնագնահատման համակարգի կիրառությունը, ինչը նշանակում է սպասարկման լրիվ նոր որակ: «Կտրուկ նվազելու է հարկ վճարողի և հարկային ծառայողի շփումը»,- ասաց ՊԵԿ փոխնախագահը:

«Բոլոր կարգավորումներն այն նպատակադրումն ունեն, որ նոր Հարկային օրենսգիրքը բիզնեսի համար պետք է ապահովի կայունություն ու կանխատեսելիություն»,- ասաց Վ.Միրումյանը՝ հավելելով, որ սրանով դիրքորոշում չեն հայտնում առ այն, որ Հարկային օրենսգրքի ընդունումից հետո իրենք բացառում են որևէ փոփոխության կատարում օրենսգրքում, բայց հիմնաքարային մոտեցումներն ու համակարգի հիմնական բաղադրիչները երկարաժամկետ հատվածում փոփոխությունների չեն ենթարկվելու:     

Վարչապետ Հովիկ Աբրահամյանն ասաց, որ այս օրենսգիրքը շատ երկար քննարկում է անցել, բազմաթիվ հարթակներում է քննարկվել: «Լայնածավալ աշխատանք է իրականացվել, մեկ շաբաթվա ընթացքում կամփոփենք, բոլոր տեսակետներն իմի կբերվեն և օրենսգրքի նախագիծը կուղարկվի Ազգային ժողով: Մեծ առումով մենք ավարտել ենք այդ գործընթացը և իմ կարծիքով մեկ շաբաթ ժամանակը բավարար է, որպեսզի այդ հարցերը քննարկենք և ավարտենք»,- ընդգծեց վարչապետը: