Ձեր վստահելի աղբյուրը

Այսօր Հայաստան են ժամանել այնպիսի խոշոր գիտնականներ, որոնց բարձր ինտելեկտը, ստեղծագործական տաղանդը, գիտական գործունեությունը զինել են ողջ մարդկությանը: Այս մասին «Նոբելյան օրեր Երևանում» միջոցառման բացմանն ասաց Երևանի պետական բժշկական համալսարանի ռեկտոր Միքայել Նարիմանյանը:

«Մենք բարձր ենք գնահատում մեր գիտական ներուժը, մեծ հարգանք ունենք կրթության ավանդույթների նկատմամբ, բայց ունենք մի մեծ ցանկություն, որ այս 5 օրերի ընթացքում  նոբելյան մրցանակակիրների օգնությամբ իրականում ստեղծենք և գործի մեջ դնենք գիտական նոր ծրագրեր ու ուղղություններ, ինչը թույլ կտա մեր երիտասարդներին, աշակերտներին ընդգրկվել այն ուղղությունների մեջ, որոնք առաջնորդում են Հայաստան ժամանած նոբելյան մրցանակակիրները»,- նշեց Միքայել Նարիմանյանը՝ հավելելով, որ մեծ սպասելիքներ ունեն Նոբելյան մրցանակի հինգ դափնեկիրների դասախոսություններից:

Հիշեցնենք, որ ապրիլի 12-16-ը Նոբելյան մրցանակի հինգ դափնեկիրներ Երևանում հանդես կգան դասախոսություններով: Մասնակիցների թվում են Աարոն Չեխանովերը (Իսրայել), Ադա Յոնաթը (Իսրայել), Դան Շեխտմանը (Իսրայել), Ջոն Ուորենը (Ավստրալիա) և  Էյիթի Նեգիսին (Ճապոնիա):

«Նրանք կներկայացնեն գիտության այն ուղղությունները, ճյուղերը, դաշտը, որտեղ հասել են չափազանց բարձր արդյունքների: Այդ արդյունքներն այսպես թե այնպես կապված են բժշկության, բժշկագիտության հետ և հզորացնում են մեր բժշկագիտությունը, բժշկական կրթությունը»,- նշեց Միքայել Նարիմանյանը:  

ՀՀ փոխվարչապետ Վաչե Գաբրիելյանը ողջունելով «Նոբելյան օրեր Երևանում»  միջոցառման մասնակիցներին, նշեց, որ այս միջոցառման նպատակը Հայաստանում համաշխարհային գիտության առաջատար գործիչներին համախմբելն է:

«Հայաստանն առաջին անգամ հյուրընկալել է բժշկագիտության ոլորտի հինգ նոբելյան մրցանակի դափնեկիրների: Դարավոր գիտական ավանդույթներ ունեցող մեր երկրում նման միջոցառում անցկացնելը եզակի հնարավորություն է ոչ միայն համաշխարհային գիտության մեջ ակնառու գիտնականների դասախոսությունները լսելու, հետաքրքիր բանավեճեր և քննարկումներ անցկացնելու, այլև Հայաստանի գիտության տեղն ու դերը ևս մեկ անգամ իմաստավորելու, անելիքները նախանշելու, նոր գիտական գաղափարներ ու ծրագրեր քննարկելու համար»,- ասաց Վաչե Գաբրիելյանը:

Փոխվարչապետը նշեց, որ ՀՀ կառավարությունը հստակ գիտակցում է, որ զարգացումը հնարավոր է այն երկրներում, որտեղ մեծագույն ուշադրություն է դարձվում կրթությանը, գիտությանը և բարձր տեխնոլոգիական նվաճումներին:

«Ելնելով այս հրամայականից, մշակվել և իրականացվում է ՀՀ գիտության ոլորտի զարգացման 2011-2020 թթ-ի ռազմավարությունը, որտեղ ամրագրված են գիտության ոլորտի հեռանկարային զարգացմանը միտված քաղաքականությունը: Մեր ջանքերն ուղղված են Հայաստանի գիտնականների և համաշխարհային գիտական կենտրոնների միջև միջազգային համագործակցության համար նպաստավոր միջավայր ստեղծելուն: Լիահույս եմ, որ, բացի կարևոր առաքելությունից, նոբելյան մրցանակի դափնեկիրները հնարավորություն կունենան ծանոթանալու Հայաստանի հնագույն մշակույթին, ճարտարապետությանը»,- ասաց Վաչե Գաբրիելյանը: