Հայաստանում գործազուրկների ավելի քան 13 տոկոսը բարձրագույն կամ հետբուհական կրթություն ունի
2016թ.-ի մարտի 1-ի դրությամբ աշխատանք փնտրողների թիվը կազմում է 91.5 հազար, որից 61.0 հազարը կանայք են, 22.7 հազարը` երիտասարդ: Նման տվյալներ է հրապարակել Զբաղվածության պետական գործակալությունը:
Աշխատանք փնտրողների թիվը նախորդ տարվա նույն ժամանակահատվածի նկատմամբ աճել է 19.8%-ով (76.4 հազ. մարդ):
Գործազուրկների թվաքանակը կազմում է աշխատանք փնտրողների 86.8%-ը կամ 79.4 հազար: Այս ցուցանիշը նախորդ տարվա նույն ժամանակահատվածի նկատմամբ աճել է 13.9%-ով (69.7 հազ. մարդ):
«Շարունակվում է բարձր մնալ գործազուրկ կանանց թիվը, որը կազմում է գործազուրկների թվի 68.3%-ը կամ 54.2 հազ. մարդ: Երիտասարդների թվաքանակը կազմում է գործազուրկների 24.4%-ը կամ 19.4 հազ. մարդ, իսկ հաշմանդամություն ունեցող անձիք 3.4% կամ 2.7 հազ. մարդ: Գործազուրկների թվաքանակում առաջին անգամ աշխատանք փնտրողների թիվը կազմում է 37.5% (47.2 հազ. մարդ), որից երիտասարդները կազմում են 15.2 հազարը կամ 40.5%-ը»,-նշում են գործակալությունից:
Ըստ աղբյուրի, գործազուրկների թվաքանակում բարձրագույն և հետբուհական կրթություն ունեցողների թիվը կազմում է 13.1%-ը, միջին մասնագիտական կրթություն ունեցողները` 18.6%-ը, նախնական մասնագիտական (արհեստագործական) կրթություն ունեցողները` 6.3%-ը, ընդհանուր միջնակարգ կրթություն ունեցողները` 52.8 %-ը, հատուկ ընդհանուր, հիմնական ընդհանուր և տարրական կրթություն ունեցողները` 9.2%-ը:
Ըստ տարիքային ցենզի գործազուրկների թվում 16-29 տարեկանները կազմում են 24.5%, 30-44 տարեկանները` 40.3%, 45-54 տարեկանները` 20.6%, 55-ից բարձր տարիք ունեցող անձինք` 14.6%:
Գործազուրկների թվաքանակում աշխատաշուկայում անմրցունակ անձանց թվականակը կազմում է 72.3 հազ. անձ կամ 91.1%:
2016թ. հունվար-փետրվար ամիսների ընթացքում աշխատանքի է տեղավորվել 1575 աշխատանք փնտրող, որից 1033-ը` կին, 1321-ը` աշխատաշուկայում անմրցունակ անձ:
Աշխատանքի տեղավորվածներից 439-ը երտասարդ են: Նախորդ տարվա նույն ժամանակահատվածի նկատմամբ աշխատանքի տեղավորման ցուցանիշը աճել է 12.6% (1399 աշխատանք փնտրող):
2016թ. փետրվար ամսվա ընթացքում տարածքային կենտրոնների կողմից հավաքագրվել է 1200 չկրկնվող թափուր աշխատատեղ, որոնցից 98-ը նոր ստեղծվող է: Թափուր աշխատատեղի հայտ ներկայացրած գործատուների թիվը կազմել է 542: