«Գնդակն այս պահին Ադրբեջանի դաշտում է». Շարմազանով
«Ես հասկացա շատ պարզ, որ Կառավարությունը դրական եզրակացություն է տվել արգործնախարարության ներկայացրած եզրակացությանը, իսկ այնտեղ գրված է, որ այս հարցի պատասխանը կախված է Հայաստանի և Ղարաբաղի ղեկավարությունների քննարկումներից՝ հաշվի առնելով հետագա զարգացումները, այդ թվում նաև` արտաքին գործոնները»,- այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ , ԱԺ փոխնախագահ Էդուարդ Շարմազանովը՝ պատսախանելով հարցին, թե ինչ հասկացավ Արցախը ճանաչելու մասին նախագծին կառավարության եզրակացությունից:
«Այսինքն՝ ՀՀ նախագահի հստակ արտահայտած կարծիքը առ այն, որ Հայաստանը կճանաչի Լեռնային Ղարաբաղի անկախությունը, եթե Ադրբեջանը սկսի պատերազմ, մնում է ուժի մեջ: Մենք չենք ուզում պատերազմ, մենք պատերազմ չենք սկսել, բայց եթե Ադրբեջանը փորձի ռազմական, ագրեսոր ճանապարհով լուծել Լեռնային Ղարաբաղի խնդիրը, եթե Ադրբեջանի իշխանությունները փորձեն նոր պատերազմ հրահրել Արցախի ազատատենչ ժողովրդի նկատմամբ, բնականաբար, այդ ժամանակ Հայաստանի Հանրապետությունը կիրականացնի բոլոր անհրաժեշտ քայլերը՝ ընդհուպ մինչև Լեռնային Ղարաբաղի Հանրապետության անկախության ճանաչումը»,- հայտնեց Շարմազանովը՝ մեկ անգամ շեշտելով, որ ՀՀ-ն ԼՂՀ անկախության միակողմանի ճանաչման տարբերակը հնարավոր է այն դեպքում, եթե Ադրբեջանը սկսի ռազմական ագրեսիա:
Նրա խոսքերով՝ հայկական կողմի դիրքորոշումը չի փոխվել ԼՂ հակամարտության կարգավորման հարցում՝ հակամարտությունը պետք է լուծվի բացառապես խաղաղ ճանապարհով՝ ԵԱՀԿ Մինսկի խմբի համանախագահության ձևաչափում:
«Գնդակն այս պահին Ադրբեջանի դաշտում է, բայց եթե նրանք կրկին փորձեն խնդրի ռազմական լուծման ճանապարհով գնալ, նշանակում է, որ բանակցությունների մասին խոսելն անիմաստ են, և այդ պարագայում մենք կիրականացնենք բոլոր անհրաժեշտ քայլերը»,- ասաց Էդուարդ Շարմազանովը:
Նա միաժամանակ նշեց, որ նույնն է մնում Երևանի այն կարծիքը, որ Լեռնային Ղարաբաղի հիմնահարցի շուրջ բանակցային գործընթացի վերսկսման համար անհրաժեշտ է երեք կարևոր քայլ՝ վստահության հետաքննության մեխանիզմների ներդրում, հասցեական հայտարարություններ և երաշխիքներ, որ Ադրբեջանը չի գնա նոր ագրեսիայի և ահաբեկչության Լեռնային Ղարաբաղի ժողովրդի նկատմամբ:
ՀՀԿ խոսնակի խոսքերով՝ երեկ ՌԴ արտաքին գործերի նախարար Սերգեյ Լավրովն արձագանքել է ՀՀ նախագահի առաջարկին՝ նշելով, որ Ռուսատանը կողմ է հետաքննության և վստահության մեխանիզմների ներդմանը: Ավելի, նա նշել է, որ խնդիրը չունի ռազմական լուծում:
«Այսինքն՝ երեք առաջարկներից երկուսին արդեն ՌԴ արտաքին գործերի նախարարը դրական ազդակ է հղել»,- ասաց Էդուարդ Շարմազանովը՝ հավելելով, որ այս ընթացքում առիթ են ունեցել համոզվելու, որ գոնե ղարաբաղյան հիմնահարցում Ռուսաստանի, Ֆրանսիայի և ԱՄՆ-ի հրապարակային գնահատականները համահունչ են:
«Այս դեպքում կարող ենք նշել, որ հայկական կողմի առաջարկները ընդհանուր առմամբ Մինսկի խմբի համանախագահ երկրների մոտ ունեն դրական ընկալում»,- ընդգծեց նա:
Էդուարդ Շարմազանովը նշեց նաև, որ Հայաստանի նպատակն է հասնել Լեռնային Ղարաբաղի միջազգային ճանաչմանը:
«Դրա համար Հայաստանն անելու է բոլոր քայլերը, որպեսզի Լեռնային Ղարաբաղի Հանրապետությունը միջազգային իրավունքի սուբյեկտ, որպեսզի Լեռնային Ղարաբաղի քաղաքացիները ապրեն ազատ, անկախ ու միջազգայնորեն ճանաչված երկրում: Դա է մեր նպատակը, և մենք դրան հասնելու ենք: Ինքնորոշման իրավունքի իրացումը ՄԱԿ-ի նպատակներից է, և որևէ մեկը չի կարող Ղարաբաղի ժողովրդին բացատրել, թե ինչու օրինակ Արևելյան Թիմորը 1999թ. ՄԱԿ-ի հովանու ներքո պետք է կատարի հանրաքվե, որից հետո անկախանա Ինդոնեզիայից, իսկ Լեռնային Ղարաբաղի ժողովուրդը, որը 1991թ. իրականացրել է հանրաքվե, անջատվել է Խորհրդային Միությունից, չի կարող իրականացնել հանրաքվե և որոշել իր ճակատագիրը: Որևէ մեկը Եվրոպայում չի կարող Ղարաբաղին ապացուցել, որ Կոսովոյի բնակիչներն ավելի շատ ինքնորոշվելու իրավունք ունեն, քան Լեռնային Ղարաբաղի ժողովուրդը: Դրա համար մենք քայլ առ քայլ գնալու ենք այդ ճանապարհով, և մեր նպատակը Լեռնային Ղարաբաղի Հանրպետության միջազգային ճանաչումն է»,- ասաց Շարմազանովը:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին