Եթե ՀՀ-ն և ԼՂՀ-ն լուրջ ուշադրություն չդարձնեին անվտանգության համակարգին, դժվար թե Ադրբեջանի բանակը ֆիասկո ապրեր. Շարմազանով
Քառօրյա պատերազմի ընթացքում Հայաստանի և ԼՂՀ զինված ուժերը կատարել են իրենց առջև դրված պարտավորությունները, Ադրբեջանի իշխանությունների բլից-կրիգը չի ստացվել, Ադրբեջանը ձախողվել է: Այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ Էդուարդ Շարմազանովը:
Նրա խոսքերով՝ որևէ բնակավայր Ադրբեջանը չի կարողացել գրավել, բոլոր բնակավայրերը գտնվում են Լեռնային Ղարաբաղի ինքնապաշտպանական ուժերի վերահսկողության ներքո:
«Ադրբեջանի փորձերը՝ բլից-կրիգով լուծելու խնդիրը կամ դրա միջոցով փորձել ճնշելու հայկական կողմերին՝ ստանալու միակողմանի զիջումներ, չեն իրականացել: Դրանից հետո հայկական կողմի դիրքները, նաև դիվանագիտական ասպարեզում էլ ավելի են ամրացել և դրա վառ ապացույցը արտաքին գործերի նախարարների հայտարարություններ էր Վիեննայում, որտեղ հստակ նշվում էին այն առաջարկները, որոնք ապրիլյան պատերազմի ընթացքում, և հետո հնչեցրեց ՀՀ նախագահ Սերժ Սարգսյանը»,- ասաց Էդուարդ Շարմազանովը:
Անդրադառնալով Սամվել Բաբայանի վերադարձին, ինչպես նաև նրա այն հայտարարությանը, թե մինչև ապրիլյան պատերազմը ՀՀ իշխանությունները անվտանգության հարցը առաջնային չէին համարում, ՀՀԿ խոսնակն ասաց, որ եթե ՀՀ-ն և ԼՂՀ-ն լուրջ ուշադրություն չդարձնեին անվտանգության համակարգին, դժվար թե Ադրբեջանի բանակը ֆիսակո ապրեր:
«Ադրբեջանի բանակի ֆիասկոն նախևառաջ ցույց է տալիս, որ թե Հայաստանի Հանրապետությունը, թե ԼՂՀ-ն այս տարիների ընթացքում լուրջ ուշադրություն են դարձրել անվտանգության ամրապնդմանը, և մեկ անգամ չէ, որ նշվել է՝ Հայաստանի և Արցախի համար թիվ մեկ խնդիրը մնում է անվտանգությունը»,- նշեց նա:
Էդուարդ Շարմազանովի խոսքերով՝ առանց անվտանգության ուժեղ համակարգի չէին կարող խոսել ոչ ժողովրդավարության զարգացումից, ոչ սոցիալական բարեփոխումներից, ոչ էլ տնտեսական զարգացումից:
Հարցին, թե հաշվի առնելով Սամվել Բաբայանի ռազմական փորձը՝ հնարավոր համարո՞ւմ են նրա վերադարձը, Շարմազանովը նշեց, որ ԼՂՀ նախագահի մամուլի խոսնակ Դավիթ Բաբայանն այսօր ասել է, թե Սամվել Բաբայանը չի դիմել Պաշտպանության բանակին՝ մտնելու ծառայության:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին