Ձեր վստահելի աղբյուրը

Հայաստանում ունենք շատ լավ երիտասարդ արվեստագետներ, ովքեր հիանալի նկարում են, քանդակում, նույնիսկ ավելի բարձր արվեստ են ստեղծում, քան այլ տեղերում ստեղծագործողները,- Panorama.am-ի հետ զրույցում ասաց երիտասարդ քանդակագործ Սիմոն Պետրոսյանը, ով «Դիցաբանական վարկած» քանդակների շարքի համար այսօր արժանացավ ՀՀ նախագահի 2015 թվականի երիտասարդական մրցանակի:

Նա ավարտել է Գեղարվեստի ակադեմիան: Ըստ Սիմեն Պետրոսյանի, երիտասարդ ստեղծագործողների համար Հայաստանում պայմաններն այնքան էլ նպաստավոր չեն. «Պահանջարկ չկա: Բացի այդ՝ ավարտելուց հետո պետք է ամեն մեկն ինքն իր ուղին գտնի, օգնող չկա: Բայց, կարծում եմ, ինչ որ բաներ պետք է արվեն, որպեսզի ավեստագետը ցանկանա ստեղծագործել»:

Նա նաև նշեց, որ պատվերներ քիչ են լինում:  Գնորդներն էլ հիմնականում Հայաստանից չեն լինում: Ըստ քանդակագործի, Հայաստանում շատերը հետարքրված են արվեստով, սակայն չեն կարողանում գնել՝ ելնելով սոցիալական վիճակից, չեն կարող իրենց թույլ տալ որևէ նկար գնել ու կախել պատից:

Խոսելով «Դիցաբանական վարկած» քանդակների շարքի մասին, Սիմոնն ասաց, որ այն ներկայացվել էր Նկարիչների միությունում:
 
«Մեկ կոմպոզիցիոն աշխատանքում երեք ֆիգուր է: Տրոյական ձին է, իսկ դարպասների վրա կանացի գծեր են, սիլուետներ: Քանդակի մեջ փորձել եմ ստանալ, թե ինչպես է ձին փայտից կենդանանում, դարպասների վրա պատկերված կնոջը փորձում գայթակղել դարպասը բացելու համար»:

Նկարիչ Նարեկ Բարսեղյանը ՀՀ նախագահի 2015 թվականի երիտասարդական մրցանակի արժանացավ «Ինքնություն» գեղանկարների շարքի համար:

«Երեք  ինքնանկար է՝ արված հոգեբանական մոտեցումներով, տարբեր տեսանկյուններից: Նախապես ուզում էի դիմանկար անել՝ համեմատության մեջ դնելով չարն ու բարին: Երկու նկար էի որոշել, ընթացքում հասկացա, որ պետք է երեք լինի: Դոգմա չէր, որ պետք է անպայման ես լինեի, բայց այնպես ստացվեց, որ բնորդ չունեի և նկարեցի ինձ: Ամեն նկարի վրա աշխատել եմ մեկ օր»:

Ինչ վերաբերում է ստեղծագործական դաշտի  խնդիրներին, երիտասարդ նկարիչն ասաց, որ բողոքելու շատ բան կա, բայց ամբողջ աշխարհում են այդ խնդիրներն առկա. «Ստեղծագործողն ինքը պետք է հարթի իր ճանապարհը»:

Եվ նա, և Սիմոնը նշեցին, որ ինչպես իրենք, այնպես էլ շատ երիտասարդ արվեստագետներ ցանկանում են Հայաստանից գնալ՝ սովորելու, դրսի մշակույթի, արվեստագետների հետ շփվելու:

«Իրականում՝ շատ եմ ուզում գնալ: Բայց ոչ թե հայրենիքս լքեմ, այլ գնամ, ծանոթանամ եվրոպական մշակութին: Ես այսօր ապրում եմ մի երկրում, որը դրսի հետ կապ չունի, այդ կապը կտրված է: Ես չգիտեմ, թե իմ տարիքի նկարիչը, օրինակ, Նյու Յորքում ինչպես է ստեղծագործում»,- ասաց Նարեկ Բարսեղյանը:

«Պատերից դուրս» գեղանկարների շարքի համար ՀՀ նախագահի 2015 թվականի երիտասարդական մրցանակի արժանացած Գայ Ղազանչյանն այլ կարծիքի է. «Ստեղծագործելու համար հիանալի դաշտ կա այստեղ: Շատ լավ է: Բողոքելու տեղ չունեմ: Ունեմ արվեստանոց, այդքանն ինձ բավարար է»: