Կացնահարած տղամարդը դասական բռնարար է. կարծիքներ
Երևանում օրերս նախկին կնոջ ընտանիքի անդամներին կացնահարելու դեպքի առթիվ հարուցված քրեական գործի շրջանակներում հայր և դուստր՝ Վաչագան և Թագուհի Մանսուրյանները ճանաչվել են տուժողներ, իսկ սպանված Կարինե Մանսուրյանի իրավահաջորդ է ճանաչվել հարազատներից մեկը: Այդ մասին այսօր լրագրողների հետ հանդիպման ժամանակ տեղեկացրեց նախկինում Թագուհու ներկայացուցիչ, Հանրային պաշտպանի գրասենյակի փաստաբան Մարինե Ֆարմանյանը:
Հիշեցնենք՝ դաժան դեպքը տեղի էր ունեցել հուլիսի 8-ին: Գիշերը, ժամը 04-ի սահմաններում, Երևան քաղաքի Սողոմոն Տարոնցի նրբանցքի 7-րդ շենքի աստիճանահարթակում տեղի ունեցած վիճաբանության ժամանակ 31-ամյա Վլադիկ Մարտիրոսյանը կացնով բազմաթիվ հարվածներ էր հասցրել Կարինե, Թագուհի և Վաչագան Մանսուրյանների մարմնի տարբեր մասերին, որի արդյունքում 64-ամյա Կարինե Մանսուրյանը մահացել է:
Քննչական կոմիտեից տեղեկացրել էին, որ դեպքի առթիվ Շենգավիթ վարչական շրջանի քննչական բաժնում հարուցված քրեական գործի նախաքննությամբ բավարար ապացույցներ են ձեռք բերվել առ այն, որ Վլադիկ Մարտիրոսյանը, լարված փոխհարաբերությունների մեջ գտնվելով իր նախկին կնոջ` Թագուհի Մանսուրյանի և վերջինիս ծնողներ Վաչագան ու Կարինե Մանսուրյանների հետ, հուլիսի 08-ին՝ ժամը 04-ի սահմաններում, վիճաբանել է նրանց հետ, որի ընթացքում կացնով բազմաթիվ հարվածներ է հասցրել նախկին կնոջ մոր՝ Կարինե Մանսուրյանի մարմնի տարբեր մասերին, որի հետևանքով վերջինը մահացել է։
Նույն վիճաբանության ժամանակ կացնով բազմաթիվ հարվածներ են հասցվել նաև Թագուհի և Վաչագան Մանսուրյանների մարմնի տարբեր մասերին, սակայն վիճաբանությանը միջամտել է հարևանը, ով լսելով ձայները՝ դուրս է եկել աստիճանահարթակ և բռնելով Վլադիկ Մարտիրոսյանին՝ կանխել նրա գործողությունները։
Ձեռք բերված ապացույցների համակցությամբ Վլադիկ Մարտիրոսյանին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասով՝ «սպանություն» և 34-104-րդ հոդվածի 2-րդ մասի 1-ին կետով՝ «սպանության փորձ»: Նրա նկատմամբ որպես խափանման միջոց է ընտրվել կալանավորումը։
Փաստաբան Մարինե Ֆարմանյանը կարծում է, որ պատկան մարմինների անտարբերության արդյունքում է ընտանիքում այս ողբերգությունը հասունացել: Ամուսնալուծությունից հետո երեխայի խնամակալության հանձնաժողովը (Շենգավիթ վարչական շրջան), նրա խոսքով. «ավելորդ մարդասիրություն» է դրսևորել շաբաթական 5 անգամ թույլ տալով հորը տեսակցել երեխայի հետ: Հակառակը, նրա խոսքով, պետք էր տեսակցությունների քանակը նվազեցնել և հետո, երբ կողմերը կհասկանային որ այն ավելացնելու կարիք կար, կավելացնեին:
Ավելին, Թագուհու նկատմամբ խոշտանգում կատարելու դեպքի առթիվ Վլադիկ Մարտիրոսյանի նկատմամբ հարուցված քրեական գործի շրջանակներում Շենգավիթ վարչական շրջանների ընդհանուր իրավասության դատարանը նրան դատապարտել էր 6 ամիս պայմանական ազատազրկման:
«Դատարանը դատական սխալ թույլ տվեց, որ խոշտանգման մեղադրանքով պայմանական ազատազրկման դատապարտեց: Ես իմ պաշտպանական ճառում էլ եմ դրան անդրադարձել և ասել եմ, որ անձը իրենից հասարակական վտանգ է ներկայացրե ու անհրաժեշտ է նրա նկատմամբ կիրառել պատիժ ազատազրկման ձևով: Բայց իհարկե, դատարանը այլ դատավճիռ կայացրեց, որից հետո Վլադիկը էլ ավելի թևավորվեց և սկսեցին հետապնդումները, նորից վեճեր, նորից բռնություն Թագուհու նկատմամբ», -ներկայացրեց փաստաբանը:
Նրա խոսքով, Թագուհու և Վլադիկի շուրջ երկու տարեկան երեխան գիշերը դեպքի պահին արթնացել է ձայներից և տեսել է մորը արնաթաթախ վիճակում:
Ասուլիսին ներկա «Կանանց իրավունքների կենտրոն»-ի հոգեբան Աիդա Առաքելյանը նկատեց, որ այդ դեպքը դեռ երկար կմնա երեխայի մտքերում և անդրադարձ կունենա երեխայի անձի, բնավորության վրա:
«Գործ ունենք բռնության դասական շրջափուլի հետ, դասական բռնարար անձի կերպարի հետ: Դասական շրջափուլն այն է, որ եթե բռնությունը կրկնվում է երկու անգամ ընտանիքում, այն բազմիցս կրկնվելու է էլ ավելի ինտենսիվ, էլ ավելի հաճախակի, ինչի արդյունքը մենք արդեն տեսանք: Նա անձ էր, որը ընդունակ էր սպանել 3 հոգու և դա արել է ոչ թե աֆեկտի տակ, այլ նախապատրաստված գործողություն էր»,-ասաց հոգեբանը:
Նրա ներկայացրած տվյալներով, 2010-2015 թվականների ընթացքում Հայաստանում 30 կին է սպանվել տղամարդկանց բռնությունների հետևանքով, 45 երեխա էլ մնացել է առանց մայրական խնամքի:
«Սարսափելի թվեր են», -հավելեց Առաքելյանը:
Հարակից հրապարակումներ`
- Կանանց կացնահարելու կասկածանքով ձերբակալված տղամարդուն մեղադրանք է առաջադրվել երկու հոդվածով
- Դա երեխայի կռիվ չէր, դա փողի կռիվ էր. Փաստաբանը՝ կացնահարման դեպքի մասին
- Երևանում կատարված դաժան սպանության փաստի առթիվ քրգործ է հարուցվել
- Դաժան սպանություն Երևանում