Հայանիստի գյուղապետ. Մենք եթե բարեկամ չունենք, պիտի կործանվե՞նք
«Իմ ժողովուրդն ինձ ասել է, եթե երկուշաբթի խնդրին լուծում չտրվեց, դուք էլ չխառնվեք մեր գործերին»: Այս մասին Panorama.am-ի հետ զրույցում հայտնեց Արարատի մարզի Հայանիստ համայքնի ղեկավար Բալաբեկ Սարկիսյանը:
Այսօր նրա համագյուղացիները փակել էին Խաչփար գյուղի կենտրոնական փողոցը՝ պահանջելով, որ Երևան հասնելու համար պատկան մարմիններն իրենց ապահովեն տրանսպորտային միջոցով: Գյուղապետի խնդրանքով են բնակիչները դադարեցրել բողոքի գործողությունները: Արարատի մարզպետ Ռուբիկ Աբրահամյանը գյուղապետի հետ հեռախոսազրույցում ասել է, որ երկուշաբթի օրը գրությունը ձեռքին ներկայանա տրանսպորտի և կապի փոխնախարար Արթուր Առաքելյանի հետ հանդիպման:
«Ոչ մի տրանսպորտ չկա գյուղ մտնող: Ես բազմաթիվ անգամ խնդիրը ներկայացրել եմ մարզպետին, հարցին լուծում չեն տվել, մատերի արանքով են նայել: Ինձ էլ հաթաթա են տալիս: Ես ասել եմ՝ պետությանը դեմ չեմ գնում, իմ ժողովրդի պահանջն եմ կատարում, ժողովուրդը մեղք է»,-ասաց գյուղապետը:
Նրա խոսքով, Վերին Գետաշեն թաղամասից երեխաներին դպրոց տանել-բերելու համար ինքը ավտոբուս է հատկացրել, բայց Երևան հասնելու համար տրանսպորտային միջոցով ապահովելու հնարավորություն չունի:
487 երթուղու, 35 երթուղու տերերը, ըստ գյուղապետի, իրեն «հաթաթա» են տվել. «Դու ո՞վ ես, որ խառնվում ես, քեզ՝ ըսենց, քեզ՝ ընենց: Ես ասել եմ, դուք ձեզ չափերի մեջ պահեք: Իմ ժողովուրդն ինձ ընտրել է, որ համայնքի հոգսերը հոգամ: Ինձ չեն ընտրել, որ ոնց ուզում, ըտենց անեմ: Ես ասել եմ, ձեզ լուրջ եմ ասում, էդ հարցի լուծումը տվեք»:
Սարկիսյանն ասում է, Հայանիստը հսկա, փախստականաբնակ գյուղ է. «Գետաշեն թաղամասի բնակիչներն առանց այդ էլ ոռոգման ջուր չունեն, խմելու ջուր չունեն: Ժողովուրդն անապատում է ապրում: Մենք էս ժողովրդի պահանջը վերջապես պիտի կատարենք»:
Գյուղապետի առաջարկներին ի պատասխան մինչև Խաչփար գյուղ հասնող թիվ 35 ավտոբուսային երթուղին սպասարկող ընկերությունից ասել են, որ իրենք Երևանից դուրս տարածք սպասարկելու իրավունք չունեն:
«Ասում են՝ ռայոն մտնելու իրավունք չունենք: Ես էլ ասում եմ, եթե ըտենց է, ձեր բարեկամների միջոցով հարցը լուծել եք, էդ տրանսպորտը հասնում է մինչև Խաչփար, մենք եթե բարեկամ չունենք, պիտի կործանվե՞նք: Սխա՞լ եմ ասում»:
487 երթուղու ավտոբուսներն էլ ուշ-ուշ են գալիս, լիքը լցված. «Ես գծի տիրոջը խնդրել եմ, որ ավտոներ ավելացնի: Ավտոները ավելացրել է, շոֆերներն իրենց քմահաճույքով են քշում, կամ մտնում են Գետաշեն, կամ չեն մտնում»:
Այսօր բնակիչների բողոքի ակցիային ներկա են եղել և փոխմարզպետը, և մարզի փոխոստիկանապետը. «Ես ասեցի, չեմ կազմակերպում, այլ որպես համայնքի ղեկավար ասում եմ, ժողովրդի պահանջը պիտի կատարվի: Էս ժողովուրդն ուզում է՝ տրասպորտի հարցը կարգավորվի: Մենք էլ էս շոգերին, դժվար պայմաններում, պիտի մի բան անենք, որ իրենց մի քիչ լավ զգան»: