Խորենացի փողոցում կլինեմ այն ժամանակ, երբ կլինի դրա անհրաժեշտությունը. Նիկոլ Փաշինյան
«Պրոցեսները Խորենացի փողոցում ոչ ղեկավարելու, ոչ կոորդինացնելու որևէ հավակնություն չունեմ»,- այս մասին այսօր ասուլիսում հայտարարեց ՀՀ ԱԺ պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանը:
«Եթե մարդիկ գտնում են, որ իմ ներկայությունը խանգարում է իշխանափոխության ծրագրի իրականացմանը, ուրեմն սրանից հետո ես Խորենացի փողոցում կլինեմ այն ժամանակ, երբ ցուցարարները գտնեն դրա անհրաժեշտությունը, երբ ես էլ տեսնեմ, որ այնտեղ կա անելիք: Հակառակ դեպքում երեկվա դեպքերից և դրան հաջորդած մեկնաբանություններից հետո մեր կուսակցության ու իմ համար անելիք չեմ տեսնում այնտեղ այլևս»,- հայտարարեց Նիկոլ Փաշինյանը:
Այունհետև Նա մանրամասն ներկայացրեց այն բոլոր գործողությունները, որոնք հուլիսի 17-ից հետո ինքն իրականացրել է:
Խոսելով իր և «Սասնա ծռեր» խմբակցության հարաբերությունների կամ առնչությունների մասին՝ նշեց, որ այսօր այսպիսի ձևակերպում է եղել, թե ինքը փորձել է որևէ տեղ ներկայանալ կամ բանակցել նրանց անունից:
«Դուք նման բան չեք տեսել, հակառակը, ասել եմ, որ բանակցությունների մեջ որևէ ներգավվածություն չունեմ, ինչպես գիտեք բանակցում են «Սասնա ծռեր»-ի ներկայացացուցիչները՝ ենթադրում եմ իշխանության ներկայացուցնիչների հետ: Ես բազմիցս ասել եմ, որ տեղյակ չեմ դրանց ընթացքի և բովանդակության վերաբերյալ:
Ինչ վերաբերում է իմ գործողություններին «Սասան ծռերի հետ», ուզում եմ ասել, որ չկա իրենց հետ կապված որևէ գործողություն կամ տեղեկատվություն, որ ես իրականացրած լինեմ առանց իրենց հետ համաձայնեցնելու՝ սկսած այն տեսանյութերից, որոնք նկարահանվել են հրապարակվել: Եւ նկարահանումը , և դրանց հրապարակումը պարտադիր համաձայնեցրել եմ, քանի որ դա լուրջ հարց էր և կարող էր այլ հարցեր ծագել»:
Նիկոլ Փաշինյանը նշեց, որ իր ներգրավվածությունը միջնորդական բնույթի եղել են միայն սննդի հարցերով:
«Իր ձերբակալության օրը զանգել է Կարո Եղնուկյանը և ասել, որ սննդի հետ կապված խնդիր կա և լավ կլինի, որ այդ հարցով զբաղվել: Հարցրել եմ, թե արդյոք իր անձնական տեսակետն է, թե «Սասնա ծռերը» ևս կիսում են այդ տեսակետը, նա ասել է, որ նրանք նույնպես կիսում են: Դրանից հետո զանգել եմ Վարուժան Ավետիսյանին և իմ ենթադրյալ հնարավոր գործողությունները բոլոր մանրամասներով ճշտել եմ նրա հետ, թե արդյոք դա իրենց համար ընդունելի է, որից հետո ստացել եմ դրական պատասխան և այդ հարցը քննարկել եմ ոստիկանության ներկայացուցիչների, Երևանի քաղաքային վարչության պետի հետ: Ուզում եմ ասել հետևյալը՝ այս ընթացքում չի եղել որևէ շփում, որի մասին ես չեմ եկել և հանրությանը պատմել: Իմ բոլոր գործողությունները 100 տոկոսով համապատասխաել են այն քաղաքական ծրագրին և ռազմավարությանը, որ հրապարակել ենք»,- ասաց Նիկոլ Փաշինյանը:
Նիկոլ Փաշինյանը նշեց նաև, որ երեկվա դեպքերից հետո իր կուսակցության և իր համար անելիք չի տեսնում այնտեղ այլևս:
«Երբ այնտեղ մարդիկ էին հայտնվում, ովքեր սեռական բնույթի հայհոյանքեր էին տալիս հոգևորականներին, տարբեր մարդկանց, կամ այդ մեքենաների շարժը, ռազբորկաները՝ ակնհայտ էր, որ դա արվում է ոստիկանության՝ գործողություն սկսելու համար: Այնտեղ էին հայտնվել կասկածելի մարդիկ: Հիմա հարց է առաջանում՝ Նախախորհրդարանն ու «Սասնա ծռերը» դատապարտո՞ւմ են այս ամենը, թե՞ ոչ: Երեկ նաև հայտարարել եմ, որ այնտեղ, որտեղ տոն են տալիս հարբած ու չգիտեմ ինչեր օգտագործած մարդկանց, ես այնտեղ անելիք չունեմ: Ես կարող եմ սաստել նրանց, բայց եթե նրանց սաստելու փորձերը բերում է այլ մեկնաբանություններ, ես այնտեղ անելիք չունեմ: Մենք քաղաքակիրթ, հետևողական ու սկզբունքային պայքարի կողմնակից ենք: Ես չեմ կարող թույլ տալ, որ իմ կողքին կանգնեն մարդիկ, ովքեր կասկածելի վարք են դրսևորում»,- ասաց Նիկոլ Փաշինյանը:
Նրա խոսքերով՝ բոլորը պետք է անեն ամեն ինչ, որ ՀՀ քաղաքացիներ չզոհվեն, թե Խորենացի փողոցում, թե Ազատության հրապարակում, թե այլուր:
«Բայց եթե «Սասնա ծռեր»-ից պիտի ասեն, թող ինքը չգա այնտեղ, քավ լիցի, ինչի մասին է խոսքը»,- ասաց Փաշինյանը:
Անդրադառնալով լուրերին, թե իրեն այս ընթացքում սպառնացել են, նա նշեց, որ իրեն որևէ մեկը չի սպառնացել:
«Ինձ ոչ ոք չի սպառնացել, առհասարակ ինձ դժվար է սպառնալ: Չեմ պատկերացնում այն մարդուն, ով կարող է իմ դեմը կանգնել և ինձ սպառնալ: Ինձ ասացին, որ Նարեկ Մալյանը, որ ոստիկանապետի նախկին խորհրդականն է, գրել է, որ ծրագիր կա ինձ սպանելու: Չգիտեմ՝ ինքը հիմա որտե՞ղ է աշխատում, անկախ նրանից, թե որտեղ է աշխատում, թող ԱԱԾ-ն հրավիրի այդ մարդուն հարցաքննի, զբաղվի այդ հարցով»,- ասաց նա: