Ձեր վստահելի աղբյուրը

Այս տարվա 1-ին կիսամյակում Լեռնային Ղարաբաղի Հանրապետությունում գրանցված հանցագործությունների ընդհանուր թիվը նախորդ տարվա նույն ժամանակաշրջանի համեմատ աճել է 80,1%-ով կամ 161 դեպքերով (2015թ.՝ 201, 2016թ.՝ 362): Այս մասին տեղեկանում ենք ԼՂՀ ոստիկանության պաշտոնական կայքից:

Նշվում է, որ հանցագործությունների ընդհանուր թվի աճը հիմնականում պայմանավորված է սույն թվականի  հունվարի 1-ից դիմողի բողոքի բացակայության և տուժողը կասկածյալի կամ մեղադրյալի  հետ  հաշտվելու  (ԼՂՀ ՔԴՕ հոդ.35 մ.1 կ.4 և 5) հիմքերով կարճված քրեական գործերով և մերժված նյութերով հանցագործությունների հաշվառմամբ, ինչպես նաև թմրամիջոցների, զենք և ռազմամթերքի ապօրինի շրջանառության  դեպքերի հայտնաբերման և բացահայտման ակտիվ աշխատանքներով։

Հաշվետու կիսամյակում 10.000 բնակչին բաժին ընկնող հանցագործությունների թիվը հանրապետությունում կազմել է 24,3 (2015թ.՝ 13,5)։

Հանցագործությունների աճի պարագայում բարելավվել է նաև բոլոր ուղղություններով դրանց բացահայտման արդյունավետությունը։ Հաշվետու ժամանակահատվածում գրանցված 362 հանցագործություններից բացահայտվել է 316-ը, նախորդ տարվա նույն ժամանակահատվածի՝ 201-133-ի դիմաց։ Բացահայտվել է նաև նախկին տարիներին կասեցված հանցագործության 9 դեպք (2015թ.՝ 7)։

Վարույթում գտնվող քրեական գործերով 19-ով (4-ից 23) աճել է անչափահասների թիվը, իսկ 15-ով (8-ից 23)՝ նրանց կողմից կատարված հանցագործությունների քանակը, որոնցից 17-ը՝ քրեական հետախուզության, իսկ 6-ը՝ այլ ծառայության գծերով (2015թ.՝ 8/0)։
Բացահայտվել է նաև նախկին տարիներին անչափահասների կողմից կատարված և չբացահայտված հանցագործության 3 դեպքեր։

2016թ. 1-ին կիսամյակում 20 դեպքով (40-ից 20) նվազել են ճանապարհային պատահարները, 1-ով (6-ից 5)՝ զոհերի և 27-ով (49-ից 22)՝ վիրավորների թիվը։