Հանրային պաշտպանի պարզաբանումը
Այսօր Panorama.am-ում հրապարակված «Ծանր հոդվածով մեղադրվող Սարի թաղի բնակիչը փաստաբան չունի» հրապարակման մեջ հնչած հայտարարությունների առնչությամբ Հանրային պաշտպանի գրասենյակի փաստաբան Լիաննա Գասպարյանը գրասենյակի մամուլի խոսնակի միջոցով պարզաբանում է ուղարկել խմբագրություն։
Նշենք, որ հրապարակման հերոսը Սարի թաղի բնակիչ 32-ամյա Էդուարդ Զեյթունյանի կինն էր՝ Լալան, որը դժգոհել էր Հանրային պաշտպանի գրասենյակի փաստաբաններից մեկի վարքագծից, վերաբերմունքից և փաստաբանն էլ հարկ էր համարել պարզաբանում ներկայացնել։
«Հանրային պաշտպանից հրաժարվեցինք, որովհետև ինքն իր գործը նորմալ չէր կատարում: Ամուսնուս կալանքի միջնորդության ժամանակ, մեկ էլ տեսնենք դուրս եկավ դատարանի դահլիճից, գնաց: Հարցնում եմ՝ Լիաննա ո՞ւր եք գնում, ինձ ասում է, թե ուրիշ տեղ նիստ ունի, մէյլով կվերցնեմ որոշումը: Զանգում եմ, պատասխանում է կոպիտ: Ես շատ եմ վիրավորված այդ արարքից», -Panorama.am-ին փոխանցել էր Էդուարդի կինը՝ տիկին Լալան։
Մինչ պարզաբանումը ներկայացնելը, նշենք, որ մեր հոդվածի հրապարակումից հետո հանրապետության հայտնի փաստաբաններից մեկը պատրաստակամություն հայտնեց օգնել Զեյթունյանին, իրականացնել նրա պաշտպանությունը։
Հանրային պաշտպանի պարզաբանման մեջ ներկայացվում է հետևյալը.
«Պանորամա կայքի հարգելի խմբագրություն, Ձեր կայքից տեղեկացա, որ նախկին պաշտպանյալս՝ Էդուարդ Զեյթունյանը և իր կինը իրենց դժգոհություններն են հայտնել հանրային պաշտպանի գրասենյակի ծառայությունից, մասնավորապես ինձանից՝ իր վերաբերյալ քննվող ՀՀ քրեական օրենսգրքի 316-րդ հոդվածի 2-րդ մասով քննվող քրեական գործի շրջանակներում: Մինչդեռ, դեռևս 2016 թվականի մարտ ամսից Էդուարդ Զեյթունյանի վերաբերյալ մեկ այլ քրեական գործ է քննվում ՝ ՀՀ քրեական օրենսգրքի 258-րդ հոդվածի 2-րդ մասով և տվյալ գործի շրջանակներում վերջինս մինչ օրս օգտվում է հանրային պաշտպանի ծառայություններից, ում այդ գործով ինքս նաև իրավաբանական օգնություն եմ ցուցաբերել:
Հարց է ծագում. Ինչու՞ այդ գործի շրջանակներում Էդուարդի կինը մինչև օրս որևէ դժգոհություն չի հայտնել. կարծում եմ ակնհայտ պարզ և հասկանալի է բոլորիս: Ձեր կայքում տեղ գտած հայտարարությանն անդրադառնամ, նախ ցավում եմ, որ հրապարակման մեջ միայն Էդուարդ Զեյթունյանի կնոջ կարծիքն է և լրագրողը չի ճշտել իմ տեսակետը: Պրոֆեսիոնալ լրագրողական էթիկան նախ պահանջում է լսել մյուս կողմի կարծիքը, ինչի հնարավորությունը լրագրող Հասմիկ Համբարձումյանը մշտապես ունեցել է։ Այս դեպքում, հավատացեք նյութը կմատուցվեր օբյեկտիվ, քանի որ ներկայացված կլիներ երկու կողմերի տեսակետները, իսկ ընթերցողն էլ հնարավորություն կունենար իր դատողությունն անել։
Ուզում եմ տեղեկացնել, որ Էդուարդ Զեյթունյանն անգամ հրաժարումն արձանագրվելու պահին, հայտնվել էր անելանելի իրավիճակում, շուրջ 10 րոպե մտորում էր, արդյոք ճիշտ է հանրային պաշտպան Լիաննա Գասպարյանից հրաժարվելը, թե՝ ոչ, քանի որ Զեյթունյանը երբևէ չի դժգոհել հանրային պաշտպանությունից, ճիշտ հակառակը բազմիցս բարձրաձայնել է, որ վստահում է և շատ գոհ է հանրային պաշտպանի ծառայություններից: Ինձ համար զարմանալի էր, ինչպես նաև իմ նախկին պաշտպանյալի համար տարակուսելի էր նրա կնոջ կողմից մեկ այլ փաստաբանի հետ պայյմանագիր կնքելու լուրը, ինչը հայտնի է դարձել Նուբարաշեն ՔԿՀ-ում հերթական քննչական գործողությանը մասնակցելու ընթացքում օգոստոսի 11-ին:
Դրդապատճառից տեղյակ չեմ, նախկին պաշտպանյալս՝ նույնպես: Ինչ վերաբերվում է Զեյթունյանի վերաբերյալ կալանքի միջնորդության քննությանն իմ մասնակցությանը, ապա պետք է արձանագրել, որ պատշաճ կերպով մասնակցել եմ դատական նիստին, երբ մեկ այլ քրեական գործով դատական նիստ եմ ունեցել նույն դատարանում (Արաբկիր և Քանաքեռ -Զեյթուն վարչական շրջանների ընդհանուր իրավասության դատարանում, նախագահող դատավոր Ա. Նիկողոսյան) ուշացումով եմ ներկայացել տվյալ դատական նիստին կալանքի միջնորդության քննությանը մասնակցելու համար: 2016 թվականի օգոստոսի 11-ին, օրենքով սահմանված կարգով, տեղի է ունեցել հանրային պաշտպանից հրաժարումը, արձանագրության համաձայն՝ Էդուարդ Զեյթունյանն անձամբ նշել է, որ. hրաժարվում է հանրային պաշտպան Լիաննա Գասպարյանից, քանի որ գիտի, որ բարեկամները պայմանավորվածություն ունեն որ իրեն պաշտպանի փաստաբան Մոնիկա Մարգարյանը:
Նա նշել է նաև, որ գիտի , որ նա այսօր պետք է ներգրավի իրեն պաշտպանելու համար՝ խնդրելով իր հետ որևէ գործողություններ չանել մինչև պաշտպանի գալը: / առկա է նաև համապատասխան արձանագրությունը/ …
Կարող եմ ավելացնել, որ այն պնդումը, թե նախկին պաշտպանյալս փաստաբան չունի, մեղմ ասած հեռու է իրականությունից, քանի որ նույն օրը՝ օգոստոսի 11-ին, հեռախոսով ինձ հետ կապ է հաստատել փաստաբան Մոնիկա Մարգարյանը՝ ներկայանալով որպես Զեյթունյանի ներկայիս պաշտպան, խնդրել է իրեն տրամադրել իմ կողմից կազմված վերաքննիչ քրեական դատարանին ուղղված բողոքը։
Ինչ վերաբերում է որոշ փաստաբանների կողմից հանրային պաշտպաններից «գործեր խլելուն», ընդհուպ «պատահական» առիթով մեղադրյալին հանդիպելով, նրան իրենց ծառայություններն «անհատույց» առաջարկելով՝ ի խախտումն փաստաբանական էթիկայի կանոնների, ապա այս թեմային դեռ չեմ անդրադառնում»։
Հարակից հրապարակումներ`
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
