Ադրբեջանի Նավթային պետական ֆոնդն ի վիճակի չէ ապահովել դոլարի նկատմամբ պահանջարկը
Ադրբեջանի արտարժութային շուկայում տեղական լրատվամիջոցների հաղորդմամբ՝ լարված և անորոշ իրավիճակ է ստեղծվել։ Դոլարի նկատմամբ պահանջարկն ավելի քան 14 անգամ գերազանցում է առաջարկին։
Ադրբեջանական ԶԼՄ-ների փոխանցմամբ՝ միայն օգոստոսի 18-ին ադրբեջանական նավթային պետական ֆոնդը առևտրային բանկերին վաճառել է 50 մլն դոլար՝ բնակչության կողմից ներկայացվող պահանջարկն ապահովելու համար։ Սակայն ըստ տարածված տեղեկատվության՝ այդ օրը բանկերում գրանցվել է ավելի քան 700 մլն դոլարի պահանջարկ, որը չի բավարարվել։
Նման իրավիճակում Ադրբեջանում սնկի պես աճում են սև շուկայում արտարժույթ վաճառողները։ Նշված օրվան հաջորդող օրը սև շուկայում դոլարի փոխարժեքը կազմել է 1,6850 մանաթ՝ պաշտոնական 1,6204 մանաթի փոխարեն։ Ընդ որում՝ տարածված լուրերի համաձայն՝ սև շուկայում արտարժույթ վաճառում են հենց բանկերի աշխատակիցները։
Ստեղծված իրավիճակում ադրբեջանական բազմաթիվ բանկեր արտարժույթի վաճառքի սահմանափակումը 500 դոլարից իջեցրել են մինչև 200, իսկ որոշներն էլ՝ 100 դոլար։ Մասնավորապես՝ YapiKredi Bank Azerbaijan բանկը վաճառքի շեմը 500 դոլարից նվազեցրել է մինչև 200 դոլար՝ յուրաքանչյուր անձի համար։ Amrahbank-ը՝ 500 դոլարից նվազեցրել է մինչև 300 դոլար, Demirbank-ը՝ մինչև 100 դոլար, Bank of Baku-ն՝ 500-ից մինչև 200 դոլար։ Այս հանգամանքը ևս բերում է սև շուկայի անկտիվացմանը և որոշ օղակների կողմից սպեկուլյատիվ գործունեության արդյունքում գերշահույթների ապահովմանը։
Որոշ վերլուծական կենտրոններ Ադրբեջանում արտարժութային ճգնաժամի խորացման միտումներ են տեսնում։ Մանավորապես՝ Report վերլուծական գործակալությունը գտնում է, որ եթե արժութային շուկայում ընթացիկ վիճակը չկարգավորվի, ապա փափուկ արժեզրկումը դեռ կշարունակվի։
Ներկայումս Ադրբեջանի Կենտրոնական բանկը յուրաքանչյուր շաբաթ դոլարի փոխարժեքը բարձրացնում է 0,01 մանաթով։ Եթե ներկայիս քաղաքականությունը չփոխվի, ապա տարեվերջին, որին մնացել է 18 շաբաթ, դոլարի փոխարժեքը կկազմի 1,8 մանաթ։ Այդ պարագայում առևտրային բանկերի կողմից արտարժույթի վաճառքը կարող է իրականացվել 1,87 մանաթով։