Ձեր վստահելի աղբյուրը

Արցախի Ազգային ժողովի պատգամավոր Հայկ Խանումյանին առևանգելու և ծեծի ենթարկելու գործով 4 մեղադրյալներին առաջադրված և այժմ վերաորակված մեղադրանքն ընդհանրապես կապ չունի նրանց կատարած հանցանքի հետ: Այդ մասին Panorama.am-ի թղթակցի հետ զրույցում ներկայացրեց Հայկ Խանումյանի փաստաբան Հայկ Ալումյանը:

Նշենք, որ Խանումյանին առևանգելու և ծեծի ենթարկելու դեպքի առթիվ ԼՂՀ ոստիկանության քննչական վարչությունում հարուցվել էր քրեական գործ՝ ԼՂՀ քրեական օրենսգրքի 129-րդ հոդվածի 2-րդ մասի 1-ին, 2-րդ կետերի հատկանիշներով՝ «մի խումբ անձանց կողմից նախնական համաձայնությամբ, կյանքի կամ առողջության համար վտանգավոր բռնություն գործադրելով կամ դրա գործադրելու սպառնալիքով մարդուն առևանգելը»:

Սակայն այս օրերին մեղադրյալներին առաջադրված մեղադրանքը վերաորակվել է, մեղմացվել. այժմ նրանք մեղադրվում են խուլիգանություն կատարելու համար:

«Տեսեք, Ստեփանակերտում, հրապարակում Խանումյանի կողմից արտահայտած կարծիքի համար նրանք որոշել են պատժել ու ծեծի են ենթարկում: Քննիչը գտել է, բայց իրականում նրան ասել են, որ այդպես գտնի, որ հանցագործությունն ուղղված է եղել ոչ թե Խանումյանի դեմ, այլ հասարակական կարգի դեմ ու վերաորակել է խուլիգանություն: Լավ, դա մի կերպ հասկացանք, բայց երբ խուլիգանություն կատարելուց հետո մարդուն դնում են մեքենայի մեջ տանում, այդ դեպքում ի՞նչ կասեք: Տանում են մի վայր, որտեղ ընդհանրապես մարդ չկա, մի հատ էլ էնդեղ են նրան ծեծում: Սա ի՞նչ է», -մեզ հետ զրույցում վրդովված նկատեց փաստաբան Ալումյանը:

Փաստաբանը երեկ Արցախի Ազգային ժողովի արտահերթ նստաշրջանում ընդունված համաներում հայտարարելու մասին որոշումը կապում է անմիջապես այս գործի հետ: Նրա համոզմամբ, շուտով Խանումյանի գործով մեղադրյալներն ազատ կարձակվեն:

«Ինչքան ավելի շատ պետական հովանավորչություն եմ տեսնում նրանց նկատմամբ, այնքան ավելի շատ սկսում եմ մտածել, որ Խանումյանը ճիշտ էր երբ հայտարարում էր, որ սա պետության ամենաբարձրաստիճան ատյաններից եկող պատվեր է եղել», -նկատեց փաստաբանը՝ նշելով, որ այլ վարկածների մասին հնարավոր չէ մտածել:

Ճիշտ է տուժող կողմը բողոքարկել է մեղադրանքը վերաորակելու մասին որոշումը, բայց, փաստաբանն ասում է, որ եթե այս գործով անօրինականությունները շարունակվեն, ապա ստիպված են լինելու հայց ներկայացնել Մարդու իրավունքների եվրոպական դատարան:

«Այսպես չի լինելու, իրենք մեզ ստիպելու են, որ դիմենք Եվրոպական դատարան, հետո սրտաճմլիկ հայտարարություններ թող չանեն, թե ինչու եք մեր աղբը հանում դուրս: Որպեսզի մեր հայտարարությունը ֆանտաստիկ չթվա, ապա ասեմ, որ Ղարաբաղի դեմ չենք դիմելու: Դիմելու ենք Հայաստանի դեմ, որովհետև Եվրոպական դատարանն արդեն ունի գործեր, որոնց համաձայն, Ղարաբաղում տեղի ունեցածի համար պատասխանատու է համարվում Հայաստանի Հանրապետությունը», -հայտարարեց փաստաբան Ալումյանը՝ հորդորելով պատկան մարմիններին ողջախոհություն դրսևորել: