Ձեր վստահելի աղբյուրը

Նորք Մարաշում 2015-ի նոյեմբերին վնասազերծված զինված խմբի պարագլուխ Արթուր Վարդանյանի մեղադրանքը խստացվել է. ավելացել է իշխանության յուրացման նախապատրաստության փորձ անելու մեղադրանքը: Այդ մասին այսօր լրագրողների հետ հանդիպմանը հայտարարեց Վարդանյանի փաստաբան Լևոն Բաղդասարյանը:

Վնասազերծված զինված խմբի վերաբերյալ քրեական գործի նախաքննությունն ավարտվել է և այն շուտով կտրամադրվի կողմերին ու կուղարկվի դատարան: Այս գործով նախաքննությունն իրականացրել է ԱԱԾ քննչական վարչությունը:

«Սա մի այլանդակ հոդված է, որով կարող են ցանկացած անձի վրա դնել, ով մի փոքր փորձում է ըմբոստանալ իրականացվող քաղաքականության դեմ», -հավելեց փաստաբանը:

Բաղդասարյանի կարծիքով, իր պաշտպանյալը անցանակալի անձ է եղել իշխանությունների համար, այն դեպքում, երբ լինելով Իսպանիայում, «օգնել է Հայաստանին ու հայկական համայնքի զարգացմանը նպաստել»:

«Արթուր Վարդանյանը իր ուրույն լուման է ներդրել Հայաստանում ու արտգործնախարարության կողմից ստացել գովասանքի խոսքեր: Իսկ ներքաղաքական կյանքում Արթուր Վարդանյանը իր քննադատական խոսքն է ասել նախ Սահմանադրական բարեփոխումների համար, հետո տնտեսական մենաշնորհները: Եվ այս պարագայում ելքը տեսնում է իշխանափոխության մեջ», -հայտարարեց փաստաբանը՝ նկատելով, որ խմբի անդամները եղել են «իշխանության խոշորացույցի տակ որպես անցանկալի անձինք»:

Հարցին թե Արթուր Վարդանյանը կալանավորվել և մեղադրվում է իր քաղաքական դիրքորոշման համա՞ր, փաստաբանը պատասխանեց. «Այո, Արթուր Վարդանյանին մենք համարում ենք քաղկալանավոր, որովհետև նա կալանավորվել է իր հայացքների համար: Նրան առաջադրված այս հոդվածը քաղաքական հոդված է»:

Արթուր Վարդանյանը իրեն առաջադրված մեղադրանքների մի մասը չի ընդունում: Մասնավորապես, ըստ փաստաբանի չի ընդունում, որ ինքը հանցավոր խմբի հետ կապ է ունեցել, ասել, որ չի ցանկացել հարձակում կատարել:

«Ինչ վերաբերում է զենք-զինամթերք պահելու մասին մեղադրանքին, ապա ձերբակալվելուց հետո Արթուրը հստակ հայտարարել է, որ զենքը բացառապես ուղղված էր լինելու հետագայում, եթե կարիքն զգացվեր Արցախի պաշտպանությանը, ինչպես նաև Սիրիայում գործողություններ կատարելուն: Նոյեմբերին այդ հայտարարությունից հետո մենք ունեցանք ապրիլյան քառօրյա պատերազմ», -նկատեց փաստաբանը:

Նախաքննություն իրականացնող ԱԱԾ քննչական վարչությունը որպես զինված խմբի գործողությունների ապացույց ներկայացրել էր նաև որոշ քարտեզներ, որոնցում նախանշված են եղել զինված խմբի թիրախում հայտնված պետական օբյեկտները: Այդ առնչությամբ փաստաբանն ասաց. «Քարտեզ ունենալը ոչ մեկին արգելված չէ և քարտեզ կարող են ունենալ բոլորը: Դրա մեկնաբանությունը եղել է հետևյալը՝ անհնազանդություն պետք է իրականացվեր և նշվել է ընամենը, թե որտեղ ինչ կարգով ու ֆորմատով պետք է իրականացվեր այդ անհնազանդությունը, այսինքն՝ իշխանափոխության հետ կապված գործառույթներ»:

Փաստաբանը դժգոհեց նաև դատարաններից, ովքեր մի քանի անգամ «դակել են» նախաքննական մարմնի միջնորդությունները կալանքը երկարացնելու մասին: Ավելին, նրա խոսքով, խտրականություն է ցուցաբերվել այս գործով մեղադրյալների նկատմամբ. նույն հոդվածներով մեկն ազատվել է կալանքից, մյուսները անազատության մեջ են:

«Ի՞նչ չափորոշիչներով որոշեցին, որ հոգևորականը հիվանդ էր և նրան պետք էր ազատել կալանքից, և ի՞նչ չափորոշիչներով այսօր հայտնի քաղաքական գործիչ Վահան Շիրխանյանը, որը ծանր հիվանդ է, պետք է մնա անազատության մեջ», -հավելեց Բաղդասարյանը՝ նախաքննական մարմնի որոշումները որակելով «ոչ իրավաչափ»:

Ավելի վաղ պաշտոնապես հաղորդվել էր, որ զինված խմբի թիրախում եղել են պետական նշանակության օբյեկտներ՝ Ազգային ժողով, կառավարություն, Սահմանադրական դատարան, ՀՀ նախագահի նստավայր: Նորք Մարաշում Վարդանյանի վարձակալած բնակարանում 2015-ի նոյեմբերի 27-ին հայտնաբերվել էին տարբեր տեսակի ինքնաձիգեր, ատրճանակներ, նռնականետեր, նռնակներ, պայթուցիկ նյութեր և պայթուցիկ սարքավորումներ, փամփուշտներ, փամփշտակալներ, կապի միջոցներ ու այլ տեսակի զենք և ռազմամթերք: