Ձեր վստահելի աղբյուրը

Ազգային ժողովում Հարկային նոր օրենսգրքի նախագծի քննարկման ժամանակ  ԱԺ  պատգամավոր Գուրգեն Արսենյանը նշեց՝ քննարկվում  է մի փաստաթուղթ, որը կենսական նշանակություն է ունենալու ՀՀ տնտեսության հետագա կյանքի համար:

«Փաստաթղթի քաղաքական պատասխանատուն ՀՀԿ-ն է։ Շատ խոսուն է այն փաստը, որ այս կարևորագույն փաստաթղթի քննարկման ընթացքում ելույթ ունեցող պատգամավորներից ոչ մեկը ՀՀԿ-ական չէ։ Դուք չե՞ք պաշտպանում ձեր օրենսգիրքը և ելույթ ունենալ, բացատրել հասարակությանը, որ կարևոր և լավ բան եք անում։ Ո՞ւր են Ձեր ելույթ ունեցողներն ու պաշտպանները։ Սա քաղաքական գնահատական է, սա խոսում է  այն մասին, որ կա՛մ խուսափում եք դրական կարծիք հայտնել այս փաստաթղթի վերաբերյալ, կա՛մ էլ շատ վստահ եք, որ ելույթ ունենալու կարիք չկա։ Իսկ կարիքը կա, քանի որ վերաբերում է Հայաստանի ապագային, իսկ ապագան ինձ համար շատ մշուշոտ է»,- նշեց Գուրգեն Արսենյանը։

Պատգամավորի գնահատմամբ՝  Հայաստանի տնտեսությունը գտնվում է ողբերգական վիճակում և այդ տնտեսության վերակենդանացման համար պետք են այլ մոտեցումներ, այլ գործիքներ:  Նրա խոսքերով՝ երբ քննարկվում է մի  կոնցեպտ, որի հիմքում ընկած է տնտեսության իրական վիճակը պարզապես չտեսնելը, դա ասում է այն մասին, որ ցանկացած դեղատոմս էֆեկտիվ և օգտակար չի կարող լինել։

«Առաջին ընթերցման ժամանակ ինձ հետաքրքիր էր, թե այս Հարկային օրենսգրքի հիմնական շահառուներն ովքեր են լինելու։ Ինձ համար որոշակի պարզություն մտցրեց մի հարցազրույց, որը հայտնվեց շրջանառության մեջ։ Հայաստանում առևտրի միջազգային հիմնադրամի ղեկավար տիկին Սանչեսը տվեց հարցազրույց և բերեց որոշակի գնահատականներ։

Մասնավորապես նշեց,  որ  եթե ընդունվի այս «Հարկային օրենսգիրքը»՝ Հայաստանին  մեծ օգուտներ կբերի: Տիկին Սանչեսը վստահ էր, որ Հայաստանին պետք է ընդունել այս Հարկային օրենսգիրքը, քանի որ Հայաստանին պետք են լավ ճանապարհներ, լավ դպրոցներ, լավ կառավարում: Ես այդ ժամանակ հասկացա, թե շահառուն ով է, ով դուրս եկավ բեմի առաջին մաս ու դրա մասին հայտարարեց»,- նշեց պատգամավորը: 

Գուրգեն Արսենյանի խոսքերով՝ Հայաստանի տնտեսությունը նման է մի ճանապարհի, որն անցնում է ուղտը: Ուղտի վրա բարձելու քանակ կա, ՀՀ տնտեսության ուղտի մեջքը ամեն րոպե կարող է կոտրվի, այդ ուղտը հնարավորություն չունի այդքան բեռ կրելու. «Որ այդ ուղտի մեջքը կոտրվի, բոլորս ենք կրելու դրա հետևանքները»:

Խնդիրը, ըստ նրա, կայանում է նրանում, որ մարդիկ չեն ուզում սթափ հայացքով նայել և տեսնել, որ Հայաստանում աշխատելու մոտիվացիան, ներդրում անելու, նոր բան ստեղծելու խթանը պակասել է, գնալով վերանում է:

«Ցանկացած երկրի հիմնական հարստությունը մարդիկ են: Կան ստեղծագործական, կազմակերպչական ջիղ ունեցող մարդիկ, որոնք կոչվում են գործարարներ, և կա մարդկանց մի շերտ, որ աշխատողներ են, գործարարների և աշխատողների համագործակցության արդյունքում է ստեղծվում բարիքը: Մինչդեռ Հայաստանում և գործարարները, և աշխատողները կորցրել են իրենց մոտիվացիան և հեռանում են Հայաստանից: Պետք է հասկանալ՝ ինչ ենք ուզում, մենք պետք է կարողանանք մեր տնտեսության մասնակիցներին շահագրգռել: Որևէ մեկը գերի չի իր հայրենիքում ապրելու տեսլականին: Մարդն ունի դիմադրողականության սահման, երբ դա անցնում է, ինքը հեռանում է»,- ընդգծեց պատգամավորը:

Այնուհետև կրկին ընթերցեց տիկին Սանչեսի հարցազրույցից  մի հատված, որ «Հայաստանը միջազգային հանրության աջակցության կարիքն ունի, շատ հեղինակավոր միջազգային կազմակերպություններ Հայաստանը դիտում են՝ որպես ներդրումների վայր: Սա կարևոր ազդանշան է, «Հարկային օրենսգիրքը» փոխելով՝ Հայաստանը ցույց կտա, որ լուրջ է մոտենում խնդրին և մեծ գումարներ կգան:  Օգուտները հսկայական են լինելու՝ այս օրենսգիրքն ընդունելով: Եթե դա տեղի չունենա, հասկանում եք՝ դա ինչ կարժենա Հայաստանի համար»:

Գուրգեն Արսենյանը սա համարեց միջամտություն մեր երկրի ներքին գործերին. «Ուզում եմ հարց տալ, տիկին Սանչեսին՝ քանի՞ անգամ դուք պետք է փորձեք նույն ուղտը ծախեք Հայաստանի պետության, ժողովրդի վրա, որը չկա: Անընդհատ վճարել ենք ու չկա: Եթե գիտեի՞ք, սկզբից խոսեիք, երբ Հայաստանին վարկային բեռ էիք տրամադրում, որը  դարձել է 5,5 մլրդ, այդ ժամանակ խոսեիք: Իրենք իրենց վարկերի, իրենց փողի դարդն են, որ տվել են, ուզում են աղբյուր ունենալ հետ վերցնելու: Ես իմ երկրի դարդն եմ, մեր տնտեսվարողների դարդն եմ, որոնց հետ շփվում եմ, որոնք, ցավոք սրտի, ունեն Հայաստանից հեռանալու և այլ երկրներում աշխատելու մտադրություն: Ես չունեմ գործիքներ և չունեմ հնարավորություն մարդկանց բացատրելու, որ Հայաստանում աշխատելն ավելի շահավետ է»:

Եզրափակելով ելույթը, Գուրգեն Արսենյանը հայտարարեց, որ դեմ է լինելու Հարկային նոր օրենսգրքին: