Ձեր վստահելի աղբյուրը

Այսօր Ինֆորմացիայի ազատության կենտրոնի «Ոսկե բանալի և ժանգոտ կողպեք» ամենամյա մրցանակաբաշխության ժամանակ «ժանգոտ կողպեք» մրցանակը հասցեատեր չունեցավ, փոխարենը բաշխվեցին միայն «ոսկե բանալիներ»:

«Ինֆորմացիայի ազատության կենտրոնը Ոսկե բանալի և Ժանգոտ կողպեք ամենամյա մրցանակաբաշխության միջոցով ձևավորում ու ամրապնդում է հրապարակայնության ու թափանցիկության ավանդույթները Հայաստանի կառավարման համակարգում։

«Ոսկե բանալին» և «ժանգոտ կողպեքը» դարձել են ազդեցիկ միջոցներ փակ և գաղտնի գործունեությունը հրապարակայնորեն քննադատելու, միաժամանակ բարձր գնահատելու պետական մարմինների բաց և թափանցիկ աշխատանքը», -մրցանակաբաշխության ժամանակ հայտարարեց Ինֆորմացիայի ազատության կենտրոնի նախագահ Լիանա Դոյդոյանը:

Միջոցառմանը ներկա էր նաև կառավարության աշխատակազմի ղեկավար-նախարար Դավիթ Հարությունյանը, որն ասաց, թե վստահ է, որ տեղեկատվության ազատության իրավունքի իրացումը կծառայի երկրում բարեկեցության բարձրացմանը: «Առաջին հերթին այն պետք է դիտարկել ոչ թե պետության բարի կամք՝ ներկայացնելու տեղեկատվությունն իր հասարակությանը: Մենք պետք է համարենք, որ սա իսկապես պետք է լինի նոր երաշխիք», -հայտարարեց Հարությունյանը:

Վերջինն ի դեպ, մրցանակակիների շարքում էր և նրան տրվեց «Ոսկե բանալի» մրցանակ՝ «Բաց կառավարման գործընկերություն» միջազգային նախաձեռնության շրջանակում Հայաստանյան գործողությունների ծրագրի հանձնառությունները լավագույն իրականացման համար:

«Տեղեկատվության ազատության համար շատ կարևոր է ունենալ պատշաճ մեխանիզմներ: Տեղեկատվության թափանցիկության համար պատասխանատվությունը կիսում են երեք կողմեր՝ կառավարությունը, գործարարները և քաղաքացիական հասարակությունը: Ցանկացած տեղեկատվություն, որը հրապարակվում է արժեք չի ունենա, եթե դրանից չկարողանան օգտվել», -մրցանակն ստանալուց հետո հայտարարեց Հարությունյանը:

Մյուս դրական մրցանակակիրը ՀՀ առողջապահության նախարարությունն էր. Այս գերատեսչությունը «Ոսկե բանալի ստացավ» և ճանաչվեց ամենաբաց գերատեսչությունը, որը «լավագույնս է կիրառում «Տեղեկատվության ազատության մասին» օրենքը»: Մրցանակն ստացավ ՀՀ առողջապահության փոխնախարար Սերգեյ Խաչատրյանը:

ՀՀ Վայոց Ձորի մարզպետարանի պաշտոնական ինտերնետային կայքը՝ ճանաչվեց տեղեկատվության տրամադրման լավագույն ինտերնետային պաշտոնական կայք, և «Ոսկե բանալի« մրցանակը հանձնվեց Վայոց Ձորի փոխմարզպետ Մելս Հարությունյանին:

Տեղեկություն ստանալու իրավունքն ամենաակտիվ և լավագույնս օգտագործող հասարակական կազմակերպություն ճանաչվեց «Իրավունքների պաշտպանություն առանց սահմանների» հասարակական կազմակերպությանը:

Տեղեկատվության ազատությանն առնչվող խնդիրները հետևողական լուսաբանած լրատվամիջոց ճանաչվեց «Ասպարեզ» օրաթերթը:

«Տեղեկատվության ազատության մասին» օրենքն ամենաակտիվ օգտագործող լրագրող ճանաչվեց Սիվիլնեթի լրագրող Արման Սուլեյմանյանը:

ԻԱԿ-ի 15 ամյակի հոբելյանական Հատուկ մրցանակը շնորհվեց ՀՀ պաշտպանության նախարարի մամուլի քարտուղար Արծրուն Հովհաննիսյանին:

Նշենք, որ կազմակերպությունը ամեն տարի սովորաբար հայտարարում էր փակ կառույցը և տրամադրում սիմվոլիկ «Ժանգոտ կողպեք»: Սակայն այս տարի կազմակերպությունը ձեռնպահ մնաց այդ մրցանակը պետական որևէ մարմնին հանձնելուց: