Ձեր վստահելի աղբյուրը

Հայաստանի ֆուտբոլի ազգային հավաքականը հոկտեմբերի 8-ին և 11-ին աշխարհի 2018 թ. առաջնության ընտրական փուլի շրջանակներում ուժերը կչափի Ռումինիայի և Լեհաստանի ազգային թիմերի հետ:

Օրեր առաջ մեր ընտրանու գլխավոր մարզիչ Վարուժան Սուքիասյանը հրապարակեց այն ֆուտբոլիստների ցանկը, ովքեր հրավեր են ստացել՝ նախապատրաստվելու աշխարհի 2018 թ. առաջնության ընտրական փուլում հավաքականի առաջիկա խաղերին:

Վերջերս «Մանչեսթեր Յունայթեդի» կիսապաշտպան Հենրիխ Մխիթարյանը, ակումբի պաշտոնական տեղեկատվության համաձայն, խորացրել է իր վնասվածքը, և մտավախություն կար, որ նա չի կարողանա օգնել մեր ընտրանուն: Սակայն կազմը հրապարակելուց հետո մտածեցինք, որ Հենոն դեռ կգա: Թեև գիտակցում էինք, որ կարող է օպտիմալ մարզավիճակում չլինել, բայց միայն իր ներկայությամբ հոգեբանորեն կարող էր տրամադրել հավաքականում իր խաղընկերներին:

Հոկտեմբերի 2-ին ՀՖՖ պաշտոնական կայքը հրապարակեց պաշտոնական նամակ՝ ստացված «Մանչեսթեր Յունայթեդից»:  Անգլիական ակումբի բժշկական անձնակազմի ղեկավար Սթիվեն Մքնեյլը թիմի անունից դիմել էր Հայաստանի ֆուտբոլի ֆեդերացիային՝ խնդրելով թույլատրել Հենրիխ Մխիթարյանին՝ չմասնակցել Հայաստանի ազգային հավաքականի նախապատրաստական հավաքին և Ռումինիայի ու Լեհաստանի հավաքականների դեմ հանդիպումներին։ Խնդրանքը բավարարվեց, և չի կարելի ասել, որ դա անսպասելի էր, թեպետ տրամաբանությունը հուշում է, որ կարելի էր նրան հրավիրել Երևան, այստեղ ենթարկել բժշկական հետազոտության և միայն դրանից հետո որոշում կայացնել: Ի վերջո, այդ կերպ մենք կարող ենք ցուցադրել, որ Հայաստանի համար Հենրիխը շատ ավելի թանկ է, քան «ՄՅու»-ի, և որ ոչ ոք չի կարող թեթև խնդրանքով լուծել սեփական խնդիրները:

Հարցը հուզում է ֆուտբոլային ողջ հանրությանը, և Panorama.am-ը որոշեց նրանց ներկայացնել մարզական ու ֆուտբոլային մի շարք մասնագետների կարծիքները:

Էդուարդ Քալանթարյան, մարզական մեկնաբան.- Այս դեպքում Հենրիխ Մխիթարյանը նոր է ապաքինվել և ակումբը խնդրանքով է դիմել: Իհարկե, ազգային ընտրանին կարող էր իր բժշկին ուղարկել Մանչեսթեր կամ պահանջեր, որպեսզի ֆուտբոլիստը գա, բուժզննում անցնի, նոր միայն որոշում կայացվեր: Բայց, հաշվի առնելով այն հանգամանքը, որ «Մանչեսթեր Յունայթեդը» հեղինակավոր ակումբ է և թիմում ունի բարձրակարգ բժիշկներ, մեղմ ասած, մերոնք վստահել են, ընդառաջել են և չեն հրավիրել: Մյուս կողմից՝ առանց Մխիթարյանի առաջիկա 2 խաղերում մեր հաղթելու հավանականությունը շատ քիչ է: Միանշանակ, այս երևույթը չի կարող շարունակական բնույթ կրել, հակառակ դեպքում կարող ենք ենթադրել, որ ֆուտբոլիստն ինքը չի ցանկանում գալ ու խաղալ, սակայն անձամբ ես բացառում եմ այդ տարբերակը, որ քանի որ ցանկացած իրավիճակում Մխիթարյանը եկել ու օգնել է հավաքականին: Այնպես որ Հենրիխին մեղադրելու հիմք չունենք: Եթե կա մեկը, ով նվիրված խաղացել է, դա Մխիթարյանն է: Պետք է հաշվի առնել նաև Մոուրինյոյի գործոնը և չմոռանալ, որ բազմաթիվ հավաքականի մարզիչներ տարբեր ժամանակահատվածներում խնդիրներ են ունեցել նրա հետ»:



Արամ Հակոբյան, Հայաստանի հավաքականի նախկին ֆուտբոլիստ, «Բանանցի» ակադեմիայի մարզիչ.- Նոր հավաքական է ձևավորվել, որում շատ ֆուտբոլիստներ ապացուցելու բան ունեն: Այս անգամ հարգելի և անհարգելի պատճառներով մի շարք ֆուտբոլիստներ բացակայում են, ինչի արդյունքում էլ մյուսները հնարավորություն են ստանում՝ դրսևորելու իրենց որակները: Մխիթարյանի հետ կապված իրավիճակը շատ բարդ է: «Մանչեսթեր Յունայթեդը» բարձրակարգ ակումբ է և, հնարավոր է, պատճառներ է փնտրում՝ ֆուտբոլիստին բաց չթողնելու համար: Մխիթարյանին մեղադրել պետք չէ: Հասկանալի է, որ ակումբն է նման որոշում կայացրել, և ֆուտբոլիստը պետք է ենթարկվի: Իսկ ահա Հայաստանի հավաքականը ցանկացել է չխոչընդոտել Մխիթարյանին ու չբարդացնել իրավիճակը: Հավաքականում գիտակցում են, որ ինչ-որ չափով Հենրիխը կորցրել է իր տեղը «Մանչեսթեր Յունայթեդում» և առաջիկա խաղերին չմասնակցելով՝ կարող է վերականգնել իր կարգավիճակն անգլիական թիմում: Գուցե ֆեդերացիան գործել է հօգուտ Մխիթարյանի»:



Լևոն Պաչաջյան, «Սոդերտելյեի» ֆուտբոլիստ.- Ընդհանուր առմամբ՝ նորմալ իրավիճակ է: Այսինքն՝ կա հրավեր հավաքականից, և կան ֆուտբոլիստն ու իր ակումբը, որը պարզապես իրավունք չունի բաց չթողնել խաղացողին, այլապես կենթարկվի տույժի ՖԻՖԱ-ի կամ ՈՒԵՖԱ-ի կողմից։ Ֆուտբոլիստի վնասվածքի դեպքում կարող են պայմանավորվածության հանգել, որպեսզի խաղացողը բաց թողնի տվյալ խաղը։ Հենրիխ Մխիթարյանի դեպքում չեմ կարծում, որ նա չի ուզում հավաքական գալ, ավելի շուտ՝ վերջնական չի վերականգնվել։ Հակված եմ հավատալ պաշտոնական տեղեկատվությանը։ Իհարկե, դա մեծ կորուստ է հավաքականի համար։ Մենք տեսանք, թե Դանիայի ընտրանու հետ խաղում ինչ եղավ։ Չկար սրություն առջևում, չկար խաղ կառուցող հարձակման գծում, և օղակների կապը խաթարված էր։ Եվ, իհարկե, հոգեբանորեն դժվար է, երբ թիմի ավագն ու առաջատարը ներկա չէ խաղին:

Արմեն Պետիկյան, ֆուտբոլային փորձագետ.- Նման իրավիճակում պետք է հայտնվես, որպեսզի կարողանաս ճիշտ եզրահանգումներ անել: Ես ինքս այդպիսի խնդրի առաջ երբևէ չեմ հայտնվել: Կարծում եմ՝ ակումբը միահեծան որոշումներ կայացնելու իրավունք չունի: Ակումբը տեղյակ է պահել ՀՖՖ-ին, որ ֆուտբոլիստը վնասվածք ունի, խնդրել է հնարավորություն տալ՝ վերականգնելու վնասվածքը: Խնդիրն այն է, թե որքանով է լուրջ Մխիթարյանի վնասվածքը, և որքանով են տեղին ակումբի հիմնավորումները: «Մանչեսթեր Յունայթեդը» լուրջ ակումբ է, բայց, ըստ իս, չի կարող որոշումներ կայացնել»:



Յուրա Ալեքսանյան. Հայաստանի մարզական լրագրողների ֆեդերացիայի նախագահ.- Հենրիխ Մխիթարյանը, անշուշտ, վերջին հնգամյակի մեր լավագույն ֆուտբոլիստն է: Այնպես է ստացվել, որ նա չի մասնակցելու հավաքականի առաջիկա 2 խաղին: Բայց ես համոզված եմ, որ նա իր խոսքը կասի և կոգևորի տղաներին՝ թեկուզ պարզապես ինչ-որ բան գրելով, հոգեպես կլինի մեր ընտրանու կողքին: Ինչ վերաբերում է Հայաստանի ազգային հավաքականի գլխավոր մարզչին, ապա Վարուժան Սուքիասյանն այն մասնագետն է, ում գլխավորությամբ տարիներ առաջ հավաքականը կարողացավ մրցակցի հարկի տակ ոչ-ոքի՝ 1:1 հաշվով ավարտել հանդիպումը Նորվեգիայի ազգային թիմի հետ: Վստահ եմ՝ առանց Մխիթարյանի ևս Սուքիասյանը կկարողանա լուծումներ գտնել: Իսկ եթե հավաքականի մյուս տղաները խաղան նվիրվածությամբ ու նույնիսկ չհաղթեն, ֆուտբոլասերները, միևնույն է, կծափահարեն նրանց: Եթե ոչ, ապա կստացվի, որ նրանք արհամարհում են երկրպագուին: Ֆուտբոլասերն էլ, իր հերթին, կհեռանա խաղադաշտից՝ ակն ընդ ական սկզբունքով:

Հ.Գ.- Հայաստանի ֆուտբոլի ազգային հավաքականն առաջիկա խաղերում անհաջողության մատնվելու դեպքում գործնականում կզրկվի աշխարհի 2018 թ. առաջնության եզրափակիչ դուրս գալու հնարավորությունից: «Մանչեսթեր Յունայթեդին» այդ խնդիրը կարող է չհուզել, իսկ մեզ պարզապես չի կարող չանհանգստացնել…