Ձեր վստահելի աղբյուրը

«Մեջբերեք Հռոմի պապի խոսքերը (Հայերի ցեղասպանության ճանաչման մասին)», - գրել է ԱՄՆ նախագահի թեկնածու Հիլլարի Քլինթոնի նախընտրական շտաբի պետ Ջոն Պոդեստան՝ պատասխանելով Քլինթոնի արտաքին քաղաքական հարցերով գլխավոր խորհրդական Ջեք Սալլիվանի՝ Ցեղասպանության 100-ամյա տարելիցի նախօրեին ուղարկված նամակին:


 

Համաձայն Wikileaks-ի կողմից գաղտնազերծված ԱՄՆ նախկին նախագահ Բիլլ Քլինթոնի աշխատակազմի ղեկավար, ներկայումս հայտնի «Պոդեստա Գրուպ» լոբբիստական ընկերության ղեկավար Ջոն Պոդեստայի էլեկտրոնային փոստի 5-րդ փաթեթում ընգրկված մի հաղորդագրության, 2015թ. ապրիլի 19-ին Ջեք Սալլիվանը նամակ է ուղարկել իր թիմի անդամներին՝ հիշեցնելով, որ շուտով Հայոց ցեղասպանության 100-ամյա տարելիցն է և ամերիկահայ համայնքը ակնկալում է նախագահի հնարավոր թեկնածու Հիլլարի Քլինթոնի դիրքորոշումը այդ կարեւոր հարցի վերաբերյալ:

 Wikileaks-ի կողմից գաղտնազերծված նամակում Սալլիվանը, մասնավորապես, գրել է. «Ուրբաթ օրը Հայոց ցեղասպանության 100-րդ տարելիցի ոգեկոչման օրն է: Ենթադրում եմ, որ հայկական խմբերը սպասում են որևէ հայտարարության կամ նշանի, որ նա կարտասանի «ցեղասպանություն» բառը, եթե ընտրվի որպես նախագահ: Որպես սենատոր և թեկնածու նա միանշանակ դիրքորոշում է ունեցել ցեղասպանության ճանաչման հարցում: Որպես պետքարտուղար նա չի օգտագործել եզրույթը, սակայն կենտրոնացել է Թուրքիայի և Հայաստանի միջև հետագա հաշտեցման վրա: Երկու հարց. Համաձա՞յն եք, որ նա պետք է որդեգրի այն դիրքորոշումը, որն ուներ որպես սենատոր և թեկնածու, թեև դա չի արել որպես պետքարտուղար:
Համաձա՞յն եք, որ մենք պետք է պարզապես սպասենք, քանի դեռ մեզ հարց չի ուղղվել, և որևէ նախաձեռնողական քայլի չդիմենք: Կներեք բոլորիդ այս հարցով անհանգստացնելու համար, սակայն, ինչպես գիտեք, այս հարցը կարևոր է ամերիկահայերի համար»:

Ջոն Պոդեստան, ինչպես երևում է նամակին, մեկ տողով պարզապես խորհուրդ է տվել հետևել Պապի օրինակին և «մեջբերել» ապրիլի 12-ին նրա հայտարարությունը՝ Ցեղասպանության ճանաչման և դատապարտման մասին:

Հիշեցնենք, որ Ջոն Պոդեստային պատկանող լոբբիստական ընկերությունը մեծ պայմանագրեր ունի նաեւ Իլհամ Ալիեւի վարչակազմի հետ: