Ձեր վստահելի աղբյուրը

Հայաստանում տնտեսական գործընթացներին ու բարեփոխումներին աջակցությունը մնում է Եվրոպական Միության բարձր օրակարգում և մենք շարունակելու ենք մեր համագործակցությունը: Այդ մասին այսօր EU4Business՝ «ԵՄ-ն բիզնեսի համար» խորագրով մեկշաբաթյա միջոցառումների շարքի մեկնարկին հայտարարեց ՀՀ տնտեսական զարգացման և ներդրումների նախարարի առաջին տեղակալ Գարեգին Մելքոնյանը:

Նրա ներկայացմամբ, Հայաստանը դեռևս մեկ տարի առաջ է մշակել ու ընդունել Փոքր ու միջին ձեռնարկությունների (ՓՄՁ) զարգացման ռազմավարությունը, որի հիմքում ընկած է նաև ԵՄ փոքր բիզնեսի զարգացման ակտը և այժմ իրականացման փուլում է:

ԵՄ-ից բյուջետային աջակցության շրջանակներում Հայաստանում տարբեր ոլորտներում իրականացվում են համատեղ ծրագրեր, բարեփոխումներ:

«Այժմ ունենք բազմաոլորտ բյուջետային աջակցության ծրագիրը, որն այժմ էլ ընթացքում է և ընդհանուր առմամբ՝ 45 մլն եվրո արժեք ունի: Այդ ծրագիրը հաստատվել ու ստորագրվել է 2011 թվականին, արդարադատության ոլորտի բարեփոխումներին վերաբերող աջակցության ծրագիրը, որն ունի 29 մլն եվրո արժեք և ստորագրվել է 2012 թվականին, ունենք նաև գյուղատնտեսության ոլորտի աջակցության ծրագիր՝ 25 մլն եվրո գումարով, որը ստորագրվել է 2013-ին: Կա նաև մարդու իրավունքների պաշտպանության աջակցության ծրագիր, որը ստորագրվել է 2014-ին և ունի 12 մլն եվրո բյուջե», -ԵՄ-ից Հայաստանի տարբեր ոլորտներին կատարված հատկացումները ներկայացրեց փոխնախարարը՝ ասելով, թե դրանք բոլորն այժմ ընթացքում են և իրականացվում են:

Բացի այդ, այժմ հայկական կողմը, ըստ Մելքոնյանի, ԵՄ-ի հետ բանակցում է մասնագիտական որակավորումների բարելավման և աշխատատեղերի ավելացման նպատակով 15 մլն եվրո բյուջեով և 10 մլն եվրո բյուջեով պետական ֆինանսների քաղաքականության բարեփոխումների ծրագրեր իրականացնելու համար:

Գարենգին Մելքոնյանը տեղեկացրեց նաև, որ ակտիվ քննարկումների փուլ են սկսել Եվրոպական հանձնաժողովի հետ 2017-2020 թվականների համագործակցության ու աջակցության փաթեթի ռազմավարական ուղղությունները ճշգրտելու համար:

«Այս օրերին համապատասխան պատվիրակություն է գտնվում Երևանում քննարկելու, թե նախանշված 21 ուղղություններից ո՞ր հինգ ուղղություններն ենք ընդունելու հիմք, որի վրա ենք կառուցելու 17-20 թվականների աջակցության ու բարեփոխումների կարիք ունեցող ոլորտները, որոնց շուրջ էլ առաջնային համագործակցություն կհաստատվի», -ներկայացրեց փոխնախարարը:

Անդրադառնալով հարցին, թե կա՞ վստահություն, որ ԵՄ-ն գումարներ է տրամադրում Հայաստանին, Մելքոնյանն ասաց, որ ԵՄ-ի կողմից դրված նախապայմանների կատարման դեպքում են հատկացվում դրանք:

«Բյուջետային աջակցության պարագայում յուրաքանչյուր գումարի համար շատ հստակ նախատեսվում, քննարկվում, բանակցվում է, ստորագրվում է նախապայման, որի կատարման դեպքում միայն, Հայաստանը կարողանում է ստանալ համապատասխան ֆինանսական ռեսուրս: Կա գնահատման բազմամակարդակ գործընթաց:

Նախ կատարողականի մասին զեկույց է ներկայացնում Հայաստանը, այնուհետև իր կարծիքը ձևավորում է եվրոպական միության պատվիրակությունը: Բոլոր հատկացումների պարագայում մենք ունենում ենք անկախ գնահատողներ, որոնք անկախ փորձագետներ են ու չեն ենթարկվում ոչ հայկական, ոչ եվրոպական կողմին ու տալիս են իրենց անկախ գնահատականը: Վերջում որոշվում է՝  ինչքան հատկացնել և որքան չհատկացնել: Եվ ես ուրախությամբ պետք է նշեմ, որ մենք ունենք բավական բարձր կատարողական պարտավորությունների կատարման տեսանկյունից», -հայտարարեց փոխնախարարը: