ԴԱՀԿ փոփոխված օրենքով պարտավորությունները չկատարելու համար անձին չեն զրկի միակ կացարանից
Ազգային ժողովում առաջին ընթերցմամբ քննարկման է ներկայացվել «Դատական ակտերի հարկադիր կատարման մասին» Հայաստանի Հանրապետության օրենքում լրացում կատարելու և «Հրապարակային սակարկությունների մասին» Հայաստանի Հանրապետության օրենքում լրացումներ կատարելու մասին օրենքների նախագծերի փաթեթը:
Հիմնական զեկուցող, ՀՀ արդարադատության նախարարի առաջին տեղակալ Արթուր Հովհաննիսյանը նշեց, որ փոփոխության հիմնական նպատակն է քաղաքացուն իր պարտականությունները չկատարելու կամ ոչ պատշաճ կատարելու պատճառով չզրկել իր միակ կացարանից և չդարձնել անտուն:
«Այսինքն՝ ինչ պարտավորություն էլ նա խախտի, առնավազն վերջում հնարավորություն պետք է ունենա չմնալ փողոցներում, չպետք է անձը իր «մեղքերի» համար պատասխան տա՝ իր բնակվելու իրավունքի հաշվին: Սա ենք մենք առաջարկում»,- ասաց Արթուր Հովհաննիսյանը:
Որպես բացառություն են առաջարկվում այն դեպքերը, երբ միակ բնակարանն անձն՝ ի ապահովումն իր պարտավորությունների, գրավադրել է:
«Այսինքն՝ անձը կամավոր է պարտավորվել իր պարտավորությունների համար ռիսկի տակ դնել իր բնակվելու իրավունքը: Կամ էլ ունի պարտավորություն՝ ալիմենտ վճարելու, կամ հատուցելու կյանքին, առողջությանը, ինչպես նաև հանցավորությամբ պատճառված վնասը: Սրանք այդ եզակի դեպքերն են, որոնց դեպքում անձը կկատարի իր պարտավորությունները բնակվելու իրավունքի հաշվին», - բացատրեց արդարադատության փոխնախարարը:
Փոխնախարարը նշեց, որ ՀՀ Սահմանադրությունը և միջազգային փաստաթղթերը մի կողմից նախատեսում են անձի սեփականության իրավունքը, մյուս կողմից էլ նախատեսում են օրենքով սահմանել այդ սեփականության իրավունքի նկատմամբ սահմանափակումները:
«Միևնույն ժամանակ, մենք կարծում ենք, որ այդ սահմանափակումները պետք է լինեն համաչափ: Այսինքն՝ համաչափ նպատակ հետապնդեն մի կողմից պարտատիրոջ նպատակները բավարարելու, և մյուս կողմից՝ անձի նվազագույն բնակվելու իրավունքը ապահովելու համար»,- ասաց Արթուր Հովհաննիսյանը:
Փոխնախարարը հայտնեց, որ ԴԱՀԿ օրենքում նախատեսված է որոշակի գույքի ցանկ, որոնց նկատմամբ բռնագանձում չի կարող տարածվել: Դրանք են հաշմանդամների համար նախատեսված հատուկ փոխադրամիջոցները, պարտապանի մասնագիտական պարապմունքների համար անհրաժեշտ առարկաները, օրինակ երաժշտի դեպքում՝ ջութակ, դաշնամուր, և այլն:
«Մենք գտնում ենք, որ այս ցանկը պետք է ավելացնենք՝ ասելով, որ միակ բնակարանը և դրան կից հողամասը, որը պարտապանի համար հանդիսանում է մշտական բնակության միակ վայր, որի գնահատված արժեքի 75 տոկոսը հավասար կամ ցածր է ՀՀ կառավարության կողմից սահմանված միակ բնակարանի իրացման նախատեսված նվազագույն գումարից, ևս չպետք է բռնագանձման ենթակա դառնա՝ բացառությամբ վերոնշյալ սահմանափակումների»,- նշեց փոխնախարարը:
Իսկ թե ինչու 75%, Արթուր Հովհաննիսյանն ասաց, որ ԴԱՀԿ օրենքով երբ դրվում է աճուրդի, նախնական մեկնարկային գին է սահմանվում 75%-ը:
Նա նաև հայտնեց, որ աճուրդի հարցերը կարգավորելու համար ներկայացվել են հրապարակային հարկադիր աճուրդի կարգավորումները:
Հիշեցնենք, որ ԴԱՀԿ-ի կողմից աճուրդի հանված իրերի ցուցակը հաճախ է դառնում սոցցանցերում հասարակության քննարկման առարկա: Վերջին ու ամենաբուռն քննարկումը մանկական օգտագործված գիշերանոթն էր:
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները