«Պանտերա»-ի աշխատակիցն ու նրան ծեծած գնդապետի որդին հաշտվել են, բայց դատարանը հաշվի չի առել. Փաստաբան
«Պանտերա» պահնորդական ծառայության հերթափոխի պետ Վարազադատ Խոցանյանին դեռևս 2015 թվականի օգոստոսին դաժան ծեծի ենթարկելու գործով ամբաստանյալ Հարություն Թանգամյանի դատավարությունն ավարտվել է, և նա դատապարտվել է 3 տարի ազատազրկման:
Վճիռը կայացրել է Կենտրոն և Նորք Մարաշ վարչական շրջանների ընդհանուր իրավասության դատարանը՝ դատավոր Մեսրոպ Մակյանի նախագահությամբ, արագացված դատաքննությամբ:
Հարություն Թանգամյանը, հիշեցնենք, «Զվարթնոց» օդանավակայանի ոստիկանության բաժնի նախկին պետ, ոստիկանության գնդապետ Վանիկ Թանգամյանի որդին է, 27 տարեկան է, ամուսնացած չէ, աշխատել է ՀՀ ֆինանսների նախարարության օպերատիվ հսկողության և ներքին անվտանգության գլխավոր վարչության անվտանգության վարչության 2-րդ բաժնում՝ որպես մաքսային տեսուչ:
Հարությունը մեղադրվում էր դիտավորությամբ Վարազդատ Խոցանյանի առողջությանը, նրա կյանքի համար վտանգավոր ծանր վնաս պատճառելու մեջ։ Դատարանում ներկայացված նյութերով, դեպքը տեղի է ունեցել այսպես. Հարությունը 2015-ի օգոստոսի 21-ին հանդիպել է իր ծանոթ Ներսես Գասպարյանին, նրա ընկերոջը՝ Վարազդատ Խոցանյանին և Կարեն Դավթյանին։
Խոսակցության ընթացքում տեղեկանալով, որ Վարազդատ Խոցանյանը նույնպես ծնվել է Վրաստանում, նրա հետ նախկինում հանդիպած լինելու հանգամանքը ճշտելու համար հարցրել է «Վիրահայերի միասնություն» գրասենյակում հնարավոր հանդիպման մասին, ինչին վերջինս պատասխանել է վրդովված տոնով և հայհոյանքով։ Նման պատասխանից բարկանալով, Հարություն Թանգամյանը բռունցքով ուժգին հարվածել է նրա դեմքին, ինչի արդյունքում Վարազդատ Խոցանյանն ընկել է գետնին։
Այնուհետև, Հարություն Թանգամյանը, շարունակելով իր գործողությունները՝ անհարգալից խոսելու համար Վարազդատ Խոցանյանին «պատժելու» նպատակով նրա առողջությանը ծանր վնաս պատճառելու դիտավորությամբ՝ ոտքերով առնվազն 7-10 անգամ հարվածել է գետնին ընկած Վարազդատ Խոցանյանի գլխին և մարմնի տարբեր հատվածներին։
Ծեծի հետևանքով Խոցանյանին պատճառվել են բազմաթիվ վնասվածքներ՝ գլխի վրա, դեմքին, վնասվել է ակնագունդը, տեսողության սրության իջեցում է ունեցել, քթոսկրերի բաց բեկորային կոտրվածք և այլն: Նշենք, որ «Պանտերա»-ն պայմանագրերով ապահովում է տարբեր ընկերությունների կամ տարածքների անվտանգությունը:
Մամուլը ժամանակին գրել էր, որ դաժան ծեծի ենթարկված Վարազդատ Խոցանյանը հոգեբանական ծանր վիճակում է և ունի նյարդային խնդիրներ ու «հաճախ մտերիմների համար տարօրինակ բաներ է ասում ու անում, այցելում է հոգեբանի»:
Հարությունի փաստաբան Մանվել Գրիգորյանը Panorama.am-ի թղթակցի հետ զրույցում նկատեց, որ ճիշտ է, դատարանը մեղմ պատիժ է նշանակել, բայց հաշվի առնելով այն, որ Վարազդատը և Հարությունը հաշտվել են, և վերջինը փոխհատուցել է բոլոր վնասները, անհրաժեշտ էր, որ դատարանը կիրառեր պայմանավական ազատազրկում՜ տալով փորձաշրջան: Պաշտպանը
Վերաքննիչ քրեական դատարան բողոք է ներկայացրել՝ պահանջելով պատիժը պայմանականորեն չկիրառել` սահմանելով փորձաշրջան:
«Մեզ նվազագույն պատժաչափ են սահմանել, բայց կարող էին քրեական օրենսգրքի 70 հոդված կիրառել, քանի որ կար այդ հանգամանքը», -փոխանցեց պաշտպանը:
Մեր հարցին, թե մասնավորապես, ի՞նչ հանգամանքների մասին խոսքը, նա պատասխանեց. «Որ դեպքը կատարվել է տուժողի անօրինական գործողությունների արդյունքում, նրանք հաշտվել են իրար հետ, Հարությունը մեղքն ընդունել է, փոխհատուցել է բոլոր ծախսերը: Տուժողն ինքնէ լ դատարանի դահլիճում խնդրեց, որ ազատ արձակեն: Այսինքն կային պատիժը պայմանական չկիրառելու հանգամանքներ»:
Վերաքննիչ քրեական դատարանն ընդունել է վարույթ վերաքննիչ բողոքը և այն քննող դատավորների կազմը հետևյալն է՝ Արմեն Դանիելյան, Կարինե Ղազարյան և Ռուզաննա Բարսեղյան:
Հարակից հրապարակումներ`
- «Պանտերա»-ի աշխատակցին ծեծելու գործով նախաքննությունն ավարտվել է
- «Պանտերա»-ի աշխատակցին ծեծելու գործով մեղադրյալի մեղադրանքը խստացվել է, նա կալանավորվել է
- «Պանտերա»-ի աշխատակցին դաժան ծեծի ենթարկելու գործը փորձում են փակել. «Հրապարակ»
- «Պանտերայի»՝ դաժան ծեծի ենթարկված աշխատակիցը դուրս է գրվել հիվանդանոցից. ՀԺ
- «Պանտերա»-ի՝ ծեծի ենթարկված աշխատակցը շատ ծանր հոգեվիճակում է. ՀԺ
- Պահնորդական ընկերության աշխատակցին ծեծի ենթարկելու դեպքով հարուցվել է քրեական գործ