Ձեր վստահելի աղբյուրը

«Հարցրեք ցանկացած անասնապահի, գյուղացու, ակադեմիկոսի, գիտնականի, նրանք կասեն, թե ովքեր են մեղավոր հոկտեմբերի 27-ի համար: Իշխանությունները ոչինչ չարեցին, որ գործը բացահայտվի», -այսօր Եռաբլուր պանթեոնում լրագրողների հետ ճեպազրույցի ժամանակ հայտարարեց «Հանրապետություն» կուսակցության նախագահ Արամ Սարգսյանը՝ 17 տարի առաջ այդ օրը սպանված Պաշտպանության նախարար Վազգեն Սարգսյանի եղբայրը:

Արամ Սարգսյանի խոսքով, Ազգային ժողովում 17 տարի առաջ կատարվածը ոճրագործություն էր և հայտնի են միայն կատարողները, իսկ պատվիրատուների մասով քրեական գործը բացահայտված չէ:

«Քանի դեռ բացահայտված չէ, նոր «հոկտեմբերի 27»-եր բացառված չեն այս երկրում», -հավելեց Սարգսյանը: 

Այդուհանդերձ, ըստ քաղաքական գործչի, հոկտեմբերի 27-ի գործին առնչվող շատ մարդիկ, ովքեր ազդեցություն են ունեցել, որ դատական նիստերը երկարեն կամ չտան վկայություն, այսօր պաշտոններ են ստացել:

«Այդ մարդիկ հիմա իրենց բավարարված են զգում, բայց կարծում եմ, որ իրենք իրենց խղճի առաջ լուրջ հարցեր ունեն տալու, լուրջ խնդիրներ կան պարզելու: Հոկտեմբերի 27-ի բացահայտումը թողնել մահացածների հարազատների վրա, անհեթեթություն է: Այո, մենք էլ ենք մեղավոր, մեղավոր ենք, որ իմ մորը, տիկին Ռիմային, մյուս զոհերի հարազատներին ու ծնողներին ես ինքս ասելու բան չունեմ այսօր, որ ամեն օր հոկտեմբերի 27 են ապրել իրենց տանը:

Թող գան մի օր ապրեն մեր տանը, տեսնեմ կմոռանա՞ն էդ «հոկտեմբերի 27»-ը: Էդ իշխանավորները, որ իրենց Վազգենի ընկերն էին համարում, որ ստեղ ելույթ էին ունենում, իրենց խղճի առաջ չունե՞ն դրա պատասխանը, թե՞ փակեցինք, փակեցինք, վերջ: Թող ժողովուրդը ինչ ուզում է մտածի, հերն էլ անիծած: Էդպես չի: Էդ խնդիրը պիտի բացահայտվի», -նկատեց նա:

Արամ Սարգսյանը վկայակոչեց իշխանական շրջանակներից հնչած հայտարարություններ, թե «հոկտեմբերի 27»-ը արտաքին քաղաքական հետք ունի ու կարծիք հայտնեց, որ դատաքննությունը «նորմալ չի կատարվել»:

«Ես ընդհանրապես «հոկտեմբերի 27»-ով որևէ վարկած՝ սկսած ներքին տնտեսականից նկատի ունեմ մոնոպոլիաների դեմ պայքարը, հարկերի մուծումը վերջացրած արտաքին քաղաքականը չեմ բացառում: Իհարկե, արտաքին քաղաքականի դերը համարում եմ մեծ, որովհետև համարում եմ, որ 99 թվականին «Միասնություն» դաշինքի հաղթանակը Հայաստանի իշխանություններին բերեց լեգիտիմություն: Վազգենի հիմնական խնդիրը դա էր՝ Վազգենը հասկացավ, որ էս կարգի ընտրություններով երկիրը երկիր չի դառնա ու դա էր պատճառը, որ ինքը բազմաթիվ անգամներ խնդրեց Կարեն Դեմիրճյանին, որ նրա հետ միասին կարողանա լուծել այդ խնդիրը, ու մենք ունեինք լեգիտիմ իշխանություն՝ լեգիտիմ խորհրդարան, լեգիտիմ վարչապետով, որոնք հստակ ծրագիր էին դրել:

Մենք էդ ժամանակ պետություն էին, ո՞վ էր Վրաստանը, Ադրբեջանը: Մեզ հետ հաշվի էին նստում: ԱՄՆ-ից ներդրումներ էին սպասվում: Այս ամենը իհարկե, կարող էր բերել էն ուժերին, ովքեր ուզում են Հայաստանը միշտ իրենց ոտքի տակ ունենալ...արտաքին քաղաքական այդ ուժերը, միանշանակ, կարող են ազդեցություն ունենալ, և այդ հետքը բացառել պետք չէ», -ասաց Սարգսյանը:

Խոսելով Դեմիրճյան-Սարգսյան հարաբերությունների մասին, Արամ Զավենիչն ասաց, որ դա իսկապես լավ ընկերություն էր. «Ես Վազգենին գիտեի, գիտեի թրթիռը, իռոնիան, կատակը: Էդ հարաբերությունները լուրջ պետականից սկսած մինչև էն ամենամարդկային, իրար հետ նառդի խաղալով, իրար արած կատակներով: Էն կատակները, որ Դեմիրճյանը կարող էր անել Վազգենի հետ, հավատացեք, Հայաստանում ոչ մեկ չէր կարող անել: Այդ հարաբերությունները ավելին էին, քան հարազատը»:

Հիշեցնենք՝ 17 տարի առաջ, այս օրը՝ հոկտեմբերի 27-ին, մի խումբ ահաբեկիչներ՝ Նաիրի Հունանյանի գլխավորությամբ, թափանցեցին ՀՀ Ազգային ժողով, որտեղ տեղի էր ունենում Կառավարություն-ԱԺ հարցուպատասխանը և գնդակահարեցին գործադիր և օրենսդիր իշխանության առաջին դեմքերին։

Այդ օրը զոհվեցին ԱԺ նախագահ Կարեն Դեմիրճյանը, վարչապետ Վազգեն Սարգսյանը, Յուրի Բախշյանը, Հենրիկ Աբրահամյանը, Միքայել Քոթանյանը, Ռուբեն Միրոյանը, Արմենակ Արմենակյանը և Լեոնարդ Պետրոսյանը: