Ձեր վստահելի աղբյուրը

Հայաստանում արձանագրված անկայուն տնտեսական, սոցիալական և քաղաքական իրավիճակն իր ազդեցությունն է ունեցել նաև բնակչության վերարտադրողական վարքագծի վրա: Այսպես, ծնելիության ընդհանուր գործակիցը 2015թ.-ին, 1000 բնակչի հաշվով, կազմել է 13.9 պրոմիլ, 2014թ. 14.3 պրոմիլի և 1990թ.-ի՝ 22.5 պրոմիլի համեմատ:

Ինչպես նշված է ՀՀ ազգային վիճակագրական ծառայության հրապարակած «Հայաստանի սոցիալական պատկերը և աղքատությունը, 2016» զեկույցում, որտեղ ներկայացված են 2015թ-ին բնակչության թվաքանակի միտումները, միգրացիայի, վերարտադրողականության և աղքատության վերաբերյալ ցուցանիշներ, պտղաբերության (ծնելիության գումարային) գործակիցը` ծնունակ տարիքի (15-49 տարեկան) 1 կնոջ հաշվով 2015թ. կազմել է 1.645 միավոր, 2014թ.՝ 1.651 միավորի համեմատ, ինչը զգալիորեն ցածր է բնակչության պարզ վերարտադրության համար անհրաժեշտ` 2.150 ցուցանիշից:

Բնակչության վերարտադրության Բրուտտո գործակիցը (ծնունակ տարիքում միջին հաշվով քանի աղջիկ երեխա կծնի կինը, ծնելիության տվյալ տարվա մակարդակի պահպանման դեպքում) 2015թ. կազմել է 0.801, իսկ բնակչության վերարտադրության Նետտո գործակիցը (միջին հաշվով քանի աղջիկ երեխա կծնի մեկ կինն իր ողջ կյանքի ընթացքում, որոնք կհասնեն մոր տարիքին, իրենց ծնվելուց` յուրաքանչյուր տարիքում ծնելիության և մահացության տվյալ ժամանակաշրջանի մակարդակների պահպանման դեպքում) կազմել է 0.77 միավոր:

2015թ. մոր միջին տարիքը երեխայի ծննդյան ժամանակ կազմել է 26.4 տարի, իսկ առաջին երեխայի ծննդյան ժամանակ` 24.4 տարի, 2014թ. համապատասխանաբար` 26.1 և 24.3 տարի: Ըստ ծննդի հաջորդականության` երրորդ և բարձր կարգի ծնունդները 2015թ. կազմել են հանրապետության կենդանի ծնվածների ընդհանուր թվաքանակի 19.0% և նախորդ տարվա համեմատ ցուցանիշն աճել է 1.7%-ային կետով:

Ըստ ԱՎԾ-ի՝ 2015թ-ին գրանցված կենդանի ծնվածների շուրջ 33.7%-ը չգրանցված ամուսնություններից են (այդ թվում` արտաամուսնական), 1994թ.-ի՝ 15.3% և 2004թ.-ի՝ 36.4%-ի համեմատ:

2015թ-ին` նախորդ տարվա համեմատ, արձանագրվել է մահվան դեպքերի աճ` 0.6%-ով, իսկ մահացության ընդհանուր գործակիցն աճել է՝ 0.1 պրոմիլային կետով և կազմել 9.3 պրոմիլ: Ընդ որում՝ մահացության ընդհանուր գործակիցը քաղաքային և գյուղական վայրերում ունեցել է նույն մակարդակը:

2015թ.-ին, ինչպես և 2014թ.-ին, արձանագրված մահացության կառուցվածքում 51.3%-ը կազմել են արական սեռի, իսկ 48.7%-ը` իգական սեռի մահվան դեպքերը, 2013թ.-ին արձանագրված, համապատասխանաբար՝ 50.8% և 49.2%-ի համեմատ: Արական և իգական սեռերի մահացության տարբեր մակարդակներով պայմանավորված, տարբեր է նաև կյանքի սպասվող միջին տևողության ցուցանիշը տղամարդկանց և կանանց շրջանում:

2015թ.-ին կյանքի սպասվող միջին տևողությունը տղամարդկանց համար կազմել է 71.7 տարի, իսկ կանանց համար` 78.2 տարի: Քաղաքային բնակչության կազմում այդ ցուցանիշը տղամարդկանց համար կազմել է 71.9 կանանց համար` 78.3 տարի, իսկ գյուղական բնակչության համար, համապատասխանաբար` 71.2 և 77.9 տարի:

Մահացության կառուցվածքում գերակշռում են արյան շրջանառության համակարգի հիվանդություններից և չարորակ նորագոյացություններից արձանագրված դեպքերը, որոնք կազմում են մահացության ընդհանուր դեպքերի ավելի քան 68.5%-ը:

Ծննդյան և մահվան ցուցանիշների տարբերությունն արտահայտում է բնակչության բնական հավելաճի ցուցանիշը, որը 2015թ. կազմել է 13.9 հազ.մարդ՝ 2014թ. 15.3 հազ մարդու համեմատ (1995թ.-ի` 24.1 հազ., 2005թ.՝ 11.1 հազ.): 2015թթ.-ին ՀՀ բնակչության բնական հավելաճի ընդհանուր գործակիցը կազմել է 4.6 պրոմիլ, (1000 բնակչի հաշվով), նախորդ տարվա համեմատ արձանագրվել է նվազում՝ 0.5 պրոմիլային կետով: