Առնո Բաբաջանյանի հիշատակի օրն է
Այսօր ողջ օրվա ընթացքում Հայաստանի պետական ֆիլհարմոնիայի «Առնո Բաբաջանյան» համերգասրահի մուտքի և Առնո Բաբաջանյանի արձանի մոտ կհնչեն կոմպոզիտորի ստեղծագործությունները: Առնո Բաբաջանյանի հիշատակի օրն է:
Մահվան 33-րդ տարելիցի առիթով կոմպոզիտորի արձանի մոտ տեղի ունեցավ ծաղկեդրման արարողություն, հարգանքի տուրք մատուցվեց մեծ կոմպոզիտորին, ծաղիկներ դրվեցին նաև Երևանի քաղաքային պանթեոնում ամփոփված կոմպոզիտորի շիրմին, Տեր Շահե քահանա Հայրապետյանի օրհնությամբ կատարվեց հոգեհանգստյան կարգ:
Լրագրողների հետ զրույցում մշակույթի նախարար Արմեն Ամիրյանն ասաց, որ Առնո Բաբաջանյանը թողել է հսկայական երաժշական ժառանգություն, որն իրականությունը դարձնում է ավելի լուսեղ, պայծառ, կյանքը դարձնում է տոն:
«Թող ներեն այսօրվա կոմպոզիտորնեը, բայց նրանից հետո մեր հայրենիքին, քաղաքին, ժողովրդին նվիրված երգերը մեր իրականության մեջ այնքան էլ տեղ, նշանակություն չունեցան: Իհարկե, յուրաքանչյուր սերունդ ունի իր տաղանդավոր ստեղծագործողներին, պարզապես պետք է բացահայտել, ոգևորել, ճանապարհ հարթել երիտասարդների համար: Մոտ ապագայում փորձելու ենք դա անել»,- նշեց նախարարը:
Կոմպոզիտորների միության նախագահ Արամ Սաթյանը, ով եղել է Բաբաջանյանի ընկերներից, ասաց. «Զարմանալի անձնավորություն էր, հիանալի ընկեր ու մարդ, ով զգում էր ժամանակը: Շատ սիրված էր, որտեղ երևում էր, ժողովուրդը նրան շրջապատում էր»:
Նա հիշեց, որ Առնո Բաբաջանյանին մահվանից մեկ ամիս առաջ էր հանդիպել ու նա ասել էր, որ ցանկանում է մեծ սիմֆոնիկ կտավ ստեղծել. «Ցավում եմ, որ այդ կտավն այդպես էլ չստեղծվեց: Կարծում եմ՝ ևս հանճարեղ գործ էր լինելու»:
«Առնո Բաբաջանյան հիշատակի հիմնադրամի» նախագահ, ՀՀ մշակույթի վաստակավոր գործիչ Գագիկ Մանասյանը տեղեկացրեց, որ մինչև տարեվերջ Առնո Բաբաջանյանի անվան դահլիճում կստեղծվի կոմպոզիտորի թանգարանը:
Առնո Բաբաջանյանը ծնվել է Երևանում, 1921 թվականի հունվարի 22-ին։ Իր առաջին երաժշտական ստեղծագործությունը գրել է 9 տարեկան հասակում։ 1938 թվականին մեկնում է Մոսկվա և միանգամից ընդունվումէ Գնեսինների անվան երաժշտական քոլեջի վերջին կուրս։ Այն ավարտելուց հետո ընդունվել է Պ. Ի. Չայկովսկու անվան ՄՊԿ (Բ. Մ. Բեռլինի դաշնամուրի դասարան): Նրա տաղանդը Արամ Խաչատրյանը դեռ հինգ տարեկանում նկատելով՝ որոշում է, որ տղան պետք է երաժշտությամբ զբաղվի։ Դրանից հետո, 1929-ին ընդունվել է Երևանի պետական կոնսերվատորիային կից երաժշտական դպրոցը, որն ավարտելուց հետո սովորել է կոնսերվատորիայում։ Այնուհետև, 1948-ին ուսումը շարունակել է Մոսկվայի կոնսերվատորիայի դաշնամուրի բաժնում՝ միաժամանակ կատարելագործվելով Մոսկվայում գործող Հայաստանի կուլտուրայի տանը կից ստուդիայում։ 1950-1956 թթ. դասավանդել է Երևանի կոնսերվատորիայում։ 1956-ից ապրել և աշխատել է Մոսկվայում։
Առնո Բաբաջանյանի ստեղծագործական հարուստ ժառանգությունը ներառում է երգեր, գործիքային կատարումներ, սիմֆոնիկ երաժշտություն։ Նա ստեղծագործել է տարբեր ոճերով՝ դասական, պոպ, ջազ։