Դիրքի տղաները քչախոս են. առաջնագծի օրակարգին ականատես պատմություններ
Դեկտեմբերի 2-3-ը ՀՀ պաշտպանության նախարարության նախաձեռնությամբ մի խումբ լրագրողներ այցելեցին Տավուշի մարզ` Նոյեմբերյանում տեղակայված զորամաս, այնուհետև՝ դիրքեր:
Զորամասում մարտական հերթափոխի մեկնող ստորաբաժանումներն առավոտյան շարվեցին ստուգատեսի: Գնդի հրամանատարի հրամանով սկսվեց մարտական հերթապահության ստանձնման արարողակարգը։ Թմբուկի զարկերի ներքո ստորաբաժանումների հրամանատարները, հենակետերի ավագները դուրս եկան իրենց ստորաբաժանումների շարքերի կենտրոն, շարվեցին սահմանված կարգով։ Դրան հաջորդեց աղոթքը, որից հետո մարտական հերթափոխի մեկնող զինվորները հանդիսավոր երթով դուրս եկան շարահրապարակից, նստեցին մեքենաներն ու մեկնեցին առաջնագիծ՝ երգելով, մարտական տրամադրությամբ, առանց վախենալու ու տրտնջալու:
Լրագրողներս նույնպես գնում ենք առաջնագծի դիրքեր: Մեր «ՈւԱԶ»-ն անցնում է դեպի սահմանապահ դիրքեր տանող գրունտային ոլորապտույտ ճանապարհով: Վարորդը պարբերաբար աջ ու ձախ պտտելով ղեկը` փորձում է հնարավորինս անվտանգ հաղթահարել ցեխալճակները: Ցեխոտ, մառախլապատ ճանապարհն անցնելուց հետո հասնում ենք դիրքեր, որտեղ մեզ են դիմավորում հայրենիքի պաշտպանները: Առաջնագծի այն հատվածում, որտեղ եղանք, մարտական հերթապահություն են իրականացնում ինչպես ժամկետային, այնպես էլ պայմանագրային զինծառայողները:
Դիրքապահները մարտական տրամադրվածությամբ, հպարտ կեցվածքով են ողջունում հրամանատարներին: Պայմանագրային զինծառայողների մեծ մասը տեղացի են և հսկելով սահմանի` իրենց վստահված հատվածը` թիկունքին մշտապես զգում են հայրենի գյուղի տաք շունչը:
Դիրքի տղաները քչախոս են, հարցերին կամ հրաժարվում էին պատասխանել, կամ էլ՝ կարճ պատասխաններ են տալիս: Սակայն առանց նրանց հետ խոսելու էլ, միայն աչքերի մեջ նայելով՝ կարելի է հասկանալ, որ նրանք գիտակցում են՝ իրենց է վստահված հայրենիքի սահմանն ամուր ու անառիկ պահելու պատվաբեր առաքելությունը:
Մարտական դիրքի ավագ, սերժանտ Սուրեն Խանումյանը պայմանագրային զինծառայող է: Երեք որդիների հայրն ապրում է սահմանամերձ գյուղում և իր պարտքն է համարում պաշտպանել հայրենիքի սահմանները: Մասնագիտությամբ շինարար Սուրենն ընտրել է այն ճանապարհը, որ տանում է դեպի հայրենիքի սահման։
Սերժանտը պատմում է, որ սահմանին կրակոցներ հաճախակի են լինում, բայց նաև լինում են այնպիսի օրեր, որ հակառակորդը չի կրակում: «Մենք միշտ պատրաստ ենք, իսկ մեր զինվորներին միշտ դուխ ենք տալիս, որ ոչ մի բանից չվախենան, միշտ լինեն զգոն ու առույգ»,- ասաց սերժանտը:
Նրա խոսքերով՝ մարտական հերթապահության կարևորագույն բաղադրիչներից է նաև զինվորական կարգապահությունը, որի խստիվ պահպանմամբ է միայն հնարավոր լիարժեք ու անվտանգ կատարել մարտական ամենադժվարին ու բարդ առաջադրանքները:
Դիտակետում պայմանագրային զինծառայողներից մեկ ասաց, որ թեև այս պահին իրավիճակը հանգիստ է, սակայն իրենք միշտ զգոն են և հետևում են հակառակորդի շարժերին:
Անփորձանք ծառայություն մաղթելով հայրենիքի պաշտպաններին` իջնում ենք դիրքերից…
ՀՀ պաշտպանության նախարարի մամուլի խոսնակ Արծրուն Հովհաննիսյանն էլ լրագրողների հետ զրույցում ասաց, որ տարեցտարի պայմանագրային ծառայողների քանակը մեծացվում է և կոնկրետ որոշակի գործառույթներ լիովին իրականացնում են պայմանագրային զինծառայողները: «Սակայն ՀՀ-ն դեռ երկար ժամանակ պետք է մնա խառն համալրման սկզբունքով, այսինքն՝ ժամկետայինը պահպանվելու է, բայց դրան զուգահեռ ավելանալու է պայմանագրային զինծառայողների թիվը»,- նշեց նա՝ հավելելով, որ և մարտունակության ապահովման, և բազում այլ գործառույթներից ելնելով, ամենաճիշտ տարբերակը համարում են խառը համալրման սկզբունքը:
ՀՀ ՊՆ 3-րդ բանակային կորպուսի հրամանատարի ԱՀՏԱ գծով տեղակալ, գնդապետ Հայկ Պետրոսյանը հայտնեց, որ 2015 թվականի համեմատ՝ 2016 թվականի ընթացքում 3-րդ բանակային կորպուսի պահպանության գոտում գնդակոծումների, ինչպես նաև արկակոծումների դեպքերը նվազել են:
Նրա խոսքերով՝ հայկական կողմը հակառակորդի կրակոցներին պատասխանում է միայն բացառիկ դեպքերում` եթե կրակում են խաղաղ բնակչության, բնակավայրերի վրա և հավելեց, որ դա հակառակորդի կողմից ծանր զենքի կիրառման հետևանքով բնակավայրերի վրա թիրախավորված կրակն է, գյուղատնտեսական աշխատանքներին խոչընդոտելը, ահաբեկելը և նման խնդիրներ:
«Փաստ է, որ համեմատած 2014-2015 թթ-ի` 2016 թվականին մինչ օրս հակառակորդի կողմից կրակոցների բավականին լուրջ նվազում կա: Ապրիլյան պատերազմի օրերին, ի տարբերություն մնացած ժամանակահատվածի, ընդհանրապես շատ նվազ, շատ քիչ կրակոցներ են արձանագրվել»,- նշեց Հայկ Պետրոսյանը:
Նա վստահեցրեց, որ զորքերի մարտունակության մակարդակը բարձր է, պորֆեսիոնալիզմը թույլ է տալիս հարկ եղած դեպքում ռազմաքաղաքական ղեակավարության թույլտվությամբ անցնեն պատժիչ գործողությունների:
Նշվեց նաև, որ Տավուշի մարզում շուրջ 20 գյուղ գտնվում է հակառակորդի կրակային գոտում:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ