Ձեր վստահելի աղբյուրը

«1988-ի դասերը ոչ միայն մենք ենք քաղում, այլև ամբողջ աշխարհը»,-այսօր լրագրողների հետ հանդիպմանն ասաց ՀՀ ԱԻՆ փրկարար ծառայության տնօրենի տեղակալ ՓԾ գեներալ-մայոր Նիկոլայ Գրիգորյանը:

Նրա խոսքով՝ ամբողջ աշխարհը վերափոխվեց Սպիտակի երկրաշարժից հետո և միջազգային կառուցները, կամզակերպությունները, զարգացած երկրները սկսեցին մշակել տարբեր համակարգեր, տարբեր մեխանիզմներ, որպեսզի բնակչության պաշտպանությունն առավել արդյունավետ դարձնեն. «Սպիտակի երկրաշարժի դասերի վերլուծությունից հետո, 1991թվականին մեր երկիրն իր առաջին քայլերից մեկը համարեց բնակչության պաշտպանության համակարգի ստեղծումը, սկզբում ստեղծվեց սեյսմիկ պաշտպանության ծառայությունն, այնուհետև արտակարգ իրավիճակների վարչությունը: Այսօր ԱԻՆ-ը մեկ հարկի տակ է հավաքել կանխատեսման, կանխարգելման, արձագանքման և հետևանքների վերացման տարբեր ստորաբաժանումներ»:

Նիկոլայ Գրիգորյանի գնահատմամբ՝ այսօր մեր երկրում ստեղծված է մի մեծ ու արդյունավետ գործող համակարգ. «Եթե առաջ օգնություն ներմուծող  երկիր էինք, ապա այժմ դարձել ենք օգնություն արտահանող: Խորհրդային միությունում չկային փրկարարական կառույցներ, նախկինում միայն ներքին գործերի նախարարության համակարգում գտնվող հրշեջներն էին: Իսկ այսօր գործում է մի մեծ օղակ»:

Սպիտակի երկրաշարժի գլխավոր դասերից ԱԻՆ պաշտոնյան առանձնացրեց սեյսմիկ վտանգ հասկացողության գնահատումը, որը մինչ այդ սխալ էր արված. «Հաշվառված էր, որ մեզ մոտ առավելագույնը կարող էր լինել մինչև 7 բալ երկրաշարժ, սակայն փորձը ցույց տվեց, որ դա կարող է լինել մինչև 9-10 բալ: Սպիտակի երկրաշարժն ընդերքում 7 մագնիտուդ էր, երկրի վրա այն դրսևորվեց մինչև 9-10 բալ: Մեզ մոտ սխալ էին գնահատված նաև սեյսմիկ ռիսկերը. այսինքն՝ ինչ հետևանքներ կարող են լինել, ինչպես կարելի է կառավարել, մարդկանց փրկել ու որոնողական աշխատանքներ կատարել»:

ԱԻՆ փրկարար ծառայության տնօրենի տեղակալը պարզաբանեց, որ երկրի ընդերքում անջատվող էներգիան չափվում է մագնիտուդներով, իսկ երկրի մակերեսին տեղի ունեցող երկրաշարժի ուժը՝ բալերով: Այսօր մեր երկրում գնահատված է սեյսմիկ վտանգը, մշակված են սեյսմիկ ռիսկի գնահատման և նվազեցման աշխատանքային պլաններ: Տեխնիկապես հագեցվել է Գառնիի դիտակայանը, որը աշխարհում եզակի թեքաչափ, հարթաչափ ու հողի շարժումն արձանագրող սարք է»:

Ն. Գրիգորյանը տեղեկացրեց, որ այսօր իրենց կառույցը համագործակցում է համարյա բոլոր երկրների հետ՝  սկսած Ամերիկայից մինչև Ճապոնիա. «Երբ նոր էինք ստեղծում մեր կառույցը, մեր կողքին կանգնեցին գերմանացիները, ֆրանսիացիները, շվեյցարացիները, շվեդները»:

Ինչ վերաբերում է հին շենքերի և նոր կառուցվողների սեյսմակայունությանը, նա նշեց. «Սպիտակի երկրաշարժից հետո շինարարության սեյսմիկ նորմերը վերանայվեցին, Հայաստանի շինարարության սեյսմիկ նորմերը լուրջ փորձաքննություն անցան: Նոր շենքերի սեյսմակայությունը նախատեսված է նվազագույնը 9 բալ երկրաշարժերի համար: Ծրագրեր են մշակվում հին շենքերն ամրացնելու ուղղությամբ, առաջնային են համարվում դպրոցները, մանկապարտեզները, հիվանդանոցներն ու կառավարման շենքերը: Զարգացած երկրներում երկրաշարժերից ունենում են ֆինանսական կորուստներ, իսկ աղքատ ու նոր զարգացողներում՝ մարդկային, պետք է այնպես անենք, որ մեզ մոտ էլ կորուստները միայն լինեն ֆինանսական»: