2016-ին Հայաստանում մարդու իրավունքների վիճակը զգալի հետընթաց է ապրել. Իրավապաշտպաններ
Այս տարի հուլիսին մենք ականատես եղանք մարդու իրավունքների խայտառակ ոտնահարումների, որի առնչությամբ որևէ բացատրություն չհնչեց։ Այսօր «Մեդիա կենտրոնում» լրագրողների հետ հանդիպման ժամանակ հայտարարեց «Ընդդեմ իրավական կամայականությունների» ՀԿ նախագահ Լարիսա Ալավերդյանը՝ ամփոփելով տարվա ընթացքում մարդու իրավունքների վիճակը Հայաստանում։
Հատկապես, նրա խոսքով, խայտառակություն էր, երբ լրագրողների նկատմամբ տեղի ունեցան բռնություններ, որը թիրախավորված էր։ Հուլիսյան իրադարձությունների ժամանակ, երբ «Սասնա ծռերի» կողմից գրավվել էր ոստիկանության ՊՊԾ գունդը, դրսում հավաք անցկացնող քաղաքացիները, ըստ Ալավերդյանի բերման էն ենթարկվում անպօրինի, առանց հիմքերի ու բացատրության։
«Որևէ կոնկրետ գնահատական այդ գործողությունների վերաբերյալ չհնչեց, և այս ամենը անցավ կարծես մի շատ սովորական բան», -նկատեց Ալավերդյանը։
Մարդու իրավունքների պաշտպանության միջազգային օրվան ընդառաջ, ամփոփելով այդ առումով իրավիճակը, «Իրավունքի գերակայություն» ՀԿ ներկայացուցիչ, իրավապաշտպան Արտակ Զեյնալյանը եզրակացրել է. «Այս տարի մարդու իրավունքների վիճակը Հայաստանում զգալի հետընթաց է ապրել»։
Նա նույնպես հիշատակեց ՊՊԾ գնդի գրավման օրերին տեղի ունեցած բռնությունները, որոնք կիրառվել են ոստիկանության կողմից, և դրանք համարեց «ցինիկություն»։
«Դա պայմանավորված է նրանով, որ նախորդ տարվա արվածը կարողացան մարսել, պատասխանատվության չենթարկվեցին, ինչպես իրավական, այնպես էլ քաղաքական առումով։ Եթե չկա արվածի համար հատուցում, ապա դա դառնում է սովորույթ ու արվում է ամեն ինչ զարգացնելու դա», -հայտարարեց Զեյնալյանը՝ եզրակացնելով, որ այդ ամենը պատվեր է եղել քաղաքական պատասխանատուների կողմից։
Իսկ թե ինչու էին հուլիսյան դեպքերի ժամանակ բռնությունների թիրախ ընտրվել հենց լրագրողները, ապա ըստ իրավապաշտպանի, նրանք «խոսքի ազատության մունետիկներն են, պաշտպաններն են ու տարածողները, և ռեժիմի նպատակն է չորրորդ իշխանության տիրոջը մեկուսացնելը, որ հանրությունը տեղեկացված չլինի»։
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը հիշեցրեց, որ 2016-ը սկսվել է մարդու իրավունքների կոպիտ խախտմամբ, ինչը կատարվեց «Հիմնադիր խորհրդարանի» անդամ Գևորգ Սաֆարյանի «ակնհայտ ապօրինի ու խայտառակ ձերբակալմամբ»։
«2016-ին Հայաստանի իշխանությունները հերթական անգամ չկարողացան բռնել քննությունը մարդու իրավունքների պաշտպանության բնագավառում, ձախողեցին, հերթական անգամ խորացրեցին անպատժելիությունը», -հայտարարեց Սաքունցը՝ հիշեցնելով հուլիսյան դեպքերը, երբ քաղաքացիներին բերման էին ենթարկում ոչ թե ոստիկանության բաժիններ, այլ ներքրին զորքերի զորամասեր։
Սաքունցի խոսքով, այդ օրերին համատարած անօրինականության, քաղաքացիների դեմ հատուկ միջոցներ կիրառելու համար ոստիկանության բարձրաստիճան որևէ պաշտոնյա չի պատժվել, պատասխանատվության չի ենթարկվել։
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում