Ձեր վստահելի աղբյուրը

Ախուրյանի երկրաշարժից անօթևան ընտանիքները տարեմուտը կարող են դիմավորել նորակառույց բնակարաններում: 3 բազմաբնակարանների շինաշխատանքներն ու ներքին հարդարման աշխատանքներն ավարտված են: Շիրակի մարզպետարանի պաշտոնական կայքից տեղեկանում ենք, որ ընտանիքներին այսօր հանձնվել են բնակարանների բանալիները:

Շիրակի մարզպետ Հովսեփ Սիմոնյանը շնորհավորել է նորամուտ տոնող բոլոր ընտանիքներին, նաև ասել է. «Եթե հանկարծ որևէ թերություն նկատեք` դրանք ենթակա են վերացման, շինարարը պարտավոր է մեկ տարվա ընթացքում վերացնել բոլոր թերությունները, մենք էլ որպես պատվիրատու աչալրջորեն կհետևենք ցանկացած ահազանգի»:

Պետության տրամադրած 798 մլն դրամի շրջանակներում կառուցվել են 3 շենքեր ընդհանուր 104 բնակարաններով: Նորակառույցներն ունեն բոլոր հարմարությունները, ջերմամեկուսացված են, ջեռուցման համակարգերով: Կառավարության առանձին որոշմամբ էլ պետբյուջեով ՀՀ Շիրակի մարզպետարանին հատկացված գումարներից կապալառու կազմակերպությունների ընտրության մրցույթների գնումների գործընթացում տնտեսված 44,485.2 հազ. դրամ գումարը տրամադրվել է «Ախուրյանում բնակարանային շինարարության իրականացում» ծրագրի իրականացմանը և ձեռք են բերվել գազօջախներ բոլոր բնակարանների համար:

«Ախուրյանում մենք անօթևանության խնդիրը վերջնականապես լուծում ենք` բնակարան հատկացնելուց զատ, 36 ընտանիքների էլ տրամադրվել է բնակարանի գնման վկայագրեր» ,- լրագրողների հետ զրույցում նշել է Հովսեփ Սիմոնյանը:

Մարզպետը նաև ասել է, որ Գյումրիում մնացել է թվով 60 անօթևանի կարգավիճակ ունեցող ընտանիքի բնակարանի գնման վկայագիր տրամադրել, որը կլինի արդեն 2017 թվականին:

Ինչ վերաբերում է մարզի 19 գյուղական համայնքների 171 անօթևան ընտանիքներին, ապա նրանց համար, ամենայն հավանականությամբ, ծրագիր կլինի հաջորդ տարիներին:

«Իսկ ինչ վերաբերում է տնակներում բնակվող մյուս գյումրեցիներին, ապա նրանց հարցում լուրջ խնդիրներ կան, մենք խնդիր ունենք հստակ հաշվառման: Նկատի ունեմ այն, որ պետք է իմանանք, թե յուրաքանչյուր ընտանիք ինչ կարգավիճակ ունի: Կան ընտանիքներ, որոնք մի քանի անգամ բնակարան են ստացել ու վաճառել են, հիմա տնակում են ապրում: Կան ընտանիքներ, որոնք գյուղական բնակավայրերից եկել ու տնակներ են գնել, կան ընտանիքներ էլ` բազմացել են և մեկ բնակարանը չի բավականացրել: Այնպես որ, բավական անելիքներ կան: Ես կարծում եմ` և պետությունը, և տեղական իշխանությունները այս հարցում մտահոգ են, մնում է լուծման ուղիներ մշակվեն, տարբերակներից մեկն էլ սոցիալական բնակարանների կառուցման գաղափարն է: Ինչևէ, այս ամենը դեռ պետք է քննարկվի ու մշակվի»,- նշել է Շիրակի մարզպետը: