Ձեր վստահելի աղբյուրը

««Երևանի փոքր կենտրոնի» մասին օրենքը երկար ճանապարհ է անցել, ընդունումից հետո այն կպատասխանի, կլուծի բոլոր այն խնդիրները, մարտահրավերները, որոնք կան կառուցապատման մեջ»,- «Մեդիա կենտրոնում» կազմակերպված հարցազրույց-ասուլիսին ասաց ՀՀ կառավարությանն առընթեր քաղաքաշինության պետական կոմիտեի նախագահ Նարեկ Սարգսյանը:

Նա վստահ է, որ օրենքը 2017 թվականին կընդունվի:

Խոսելով այս տարվա ընթացքում խոշոր կառուցապատման ծրագրերի մասին, Ն. Սարգսյանն ասաց, որ լուրջ աշխատանք է կատարվել Ֆիրդուսի թաղամասի  հետ կապված. «Այնտեղ մոտավորապես 40 տոկոսի  վրա նախագծային աշխատանքեր են իրականացվում: Ներդրողը կա: Վստահություն ունեմ, որ 2017 թվականը կլինի բեկումնային»:

Քաղաքաշինության պետական կոմիտեի նախագահը տեղեկացրեց, որ «Հին Երևան» ծրագրի իրացան աշխատանքներն ակտիվ փուլում են, արդեն տարածքի  20 տոկոսի չափով շինարարական աշխատանքներ են սկսվել:

«Իրացման գործընթացն առաջ է գնում, ուղղակի աչքով տեսանելի չէ: Փետրվար-մարտ ամիսներին արդեն մեխանիզմներ կմտցվեն, կսկսեն մաքրել այդ հատվածը: Նախագծային մասի վրա ճարտարապետներն աշխատում են ներդրողների հետ, հավանաբար ամբողջապես կավարտեն ապրիլ-մայիսին:  2017-ի առաջին կիսամյակը կլինի բեկումնային և տեսանելի»,- ասաց Ն. Սարգսյանը:

Նա ընդգծեց, որ «Հին Երևան» ծրագրում ամբողջապես վերակառուցվելու է Աֆրիկյանների շենքը: Արամ Մանուկյանի տունը, նրա խոսքով, այս պահին վթարային վիճակում է, այն առաջին հերթին կվերակառուցվի, կուժեղացվի, կպահպանվի:

«Ինչ վերաբերում է այդտեղ  Արամ Մանուկյանի թանգարանային հատված ունենալուն, կարծում եմ, ներդրողին այդ հարցը կառավարությունը կներկայացնի: Կասկած չունեմ, որ ներդրողն ընդառաջ կգնա և շենքի մի զգալի հատված կդառնա թանգարան, քանի որ դրան սպասում են բոլորը: Կարծում եմ՝ դա ճիշտ լուծում կլինի»,- ասաց Ն. Սարգսյանը:

Ինչ վերաբերում է «Զվարթնոց» օդանավակայանի կլոր շենքի խնդրին,  նա նշեց, որ այդ հարցի վերաբերյալ քաղաքաշինության նախարարությունը գրավոր ներկայացրել է իր հստակ դիրքորոշումը. «Օդանավակայանը բաղկացած է հինգ հիմնական էլեմենտից: Երեքը՝ փոքր կլոր հատված, մեծ կլոր հատված, աշտարակային հատված, բնորոշում են տվյալ շենքի արժեքը: Երկու մյուս հատվածները՝ կամրջակներ և   պանդուս, ֆունկցիոնալ էլեմենտներ են, կարող են փոխվել, վերակառուցվել, քանդվել: Այսինքն՝ ցանկացած ձևով կարող են այդ երկու հատվածի հետ վարվել: Վստահ եմ, որ կպահպանվի  «Զվարթնոց» օդանավակայանը»:

Ինչ վերաբերում է Պուշկին -Նալբանդյան հատվածում գտնվող շինություններին՝ մասնավորապես «Դոլմամա»-ի, հրշեջների շենքերին, Ն. Սարգսյանն ասաց, որ այդ հատվածում կան շենքեր, որոնք հուշարձանների ցանկում են, որոնք չպետք է քանդվեն:

«Կան ոչ հուշարձան շենքեր, որոնք ձևավորում են տվյալ փողոցի դիմագիծը, ևս չպետք է քանդվեն: Խնդիրը պետք է լուծվի այդ պայմաններում: Տեղյակ են մեր դիրքորոշմանը և քաղաքապետարանում, և ներդրողը: Ոչ մեկից, ոչ մյուսից մենք այլ դիրքորոշում չենք լսել: Երբ որ մշակվի, ավարտվի էսքիզային նախագիծը, պայմանավորվածություն կա, որ լայն հանրային իրազեկում կունենա»,- նշեց նա՝ հավելելով, որ անհանսգտություն չունի, որ ծածուկ որևէ բան արվի:

Տպարանի շենքի պայթեցումը, Նարեկ Սարգսյանի խոսքով, շատ անհասականալի  պատմություն է:

«Ինչքան տեղյակ եմ՝ քաղաքապետարանի քաղաքաշինական խորհրդում քննարկել էին, մասնագետներն ասել էին, որ այդ հատվածը կարող են  վերափոխել: Ինչ նպատակ կար պայթեցնելու՝ չգիտեմ»,- ասաց քաղաքաշինության պետական կոմիտեի նախագահը:

Պատասխանելով հարցին, թե ինչպե՞ս եք վերաբերում մշակույթի նախարար Արմեն Ամիրյանի  նախաձեռնությունը, որ 100 տարեկան բոլոր շինությունները, անխտիր  ճանաչել պատմամշակութային հուշարձաններ, Նարեկ Սարգսյանն ասաց. «Դա նախարարի մոտեցումն է որպես քաղաքականության մաս: Կասկած չունեմ, երբ որ սկսվեն քննարկումները, միանշանակ չի լինի այդ հարցի լուծումը: Չի կարող 100 տարեկան ցանկացած շինություն մնա: Յուրաքանչյուր շինության խնդիրը լուծվում է՝ ելնելով նրա պատմական, ճարտարապետական, շինարարական արժեքից, տվյալ միջավայրում իր դիրքից ու տեղից: Պատմական շերտերի պահպանումը յուրաքանչյուր քաղաքի հարստությունն է, բայց օրենքը մշակելիս, վստահ եմ, որ այն, այնուամենայնիվ, փոփոխությունների կենթարկվի»:

Խոսելով հաջորդ տարվա ներդրումային ծրագրերի մասին, Նարեկ Սարգսյանն ասաց, որ ընդհանուր  500 միլիոն դոլարից ոչ պակաս արժողությամբ ծրագրեր ունեն:

Նա տեղեկացրեց, որ Հյուսիսային պողոտայի ծրագիրն ամբողջությամբ ավարտված չէ, մոտավորապես 100 միլիոն դոլարի շինարարություն դեռևս պետք է իրականացվի հարակից հատվածներում:

Ն. Սարգսյանը նաև ասաց, որ 2017-ին ամբողջությամբ կավարտեն Գյումրի քաղաքում երկրաշարժի հետևանքով անօթևան մնացած քաղաքացիների նկատմամբ ունեցած պարտավորությունները:

Ներդրումային ծրագրեր կան նաև Երևանից դուրս: Մասնավորապես, նրա խոսքով, արաբական ներդրողների հետ բանակցություններ են վարվում Ջերմուկ քաղաքում ներդրումներ իրականացնելու ուղղությամբ:

«Այս ներդրումները կապված են Հայաստանի նախագահի՝ Արաբական Միացյալ Էմիրություններ այցի հետ»,- հավելեց նա:

Ն. Սարգսյանն ասաց, որ ներդրումային ծրագրեր կան նաև Գյումրիի որոշակի հատված լուրջ տուրիստական կենտրոնի վերածելու հետ կապված, աշխատանքներ են տարվում նաև Ախթալայում միջազգային գյուղ ստեղծելու ուղղությամբ: