Ձեր վստահելի աղբյուրը

«Թող հաջորդ տարի ընտանիքներում տիրի խաղաղություն, ձեռքբերումների, բարեկեցության տարի լինի մեր ընտանիքներում, և ամենակարևորը՝ ոչ մի փամփուշտ մեր զինվորին չկպնի»,- այսօր տարեվերջյան ամփոփիչ ասուլիսն  այս խոսքերով սկսեց ՀՀ ֆինանսների նախարար Վարդան Արամյանը:

Այնուհետև նախարարն ամփոփեց անցնող տարին՝ ներկայացնելով 2016 թվականի բյուջեի կատարողականը, 2017 թվականի ֆինանսական սպասումներն ու առկա մարտահրավերները:

Վարդան Արամյանը նշեց, որ 2016 թ. արդյունքներով ակնկալում են, որ անվականական ՀՆԱ-ն կգտնվի 2%-ի շրջանակներում,  իսկ իրական ՀՆԱ-ն կկազմի 0.5%: «Երկու տարի մենք ունեցել ենք արտաքին աշխարհից ներթափանցող բացասական ազդեցություններ տնտեսության վրա, մասնավորապես, տրանսֆերտները նվազել են և այս տարի ևս կնվազեն, ինչը, բնականաբար, ազդում է է բնակչության գնողունակության, առևտրի ծավալների վրա: Ներմուծումը նույնպես նվազել է, բայց  այսօր արդեն ունենք ներմուծման 2%-անոց աճ: Սրանք դրական միտումներ են և հաջորդ տարի մուտք կգործենք դրական միտումներով»,- ասաց  Վարդան Արամյանը:

Նախարարը նշեց, որ 2016-ին կառավարությունն առնվազն 1 տրլն 72 մլրդ դրամ հարկ և տուրք կհավաքի: Ըստ նրա՝ Վերին Լարսի անցակետում բեռնատարների մի քանի օրվա կայանելը  ազդեցություն ունի հարկերի հավաքագրման վրա, սակայն նշված ցուցանիշը կկարողանան ապահովել:

Անդրադառնալով գնումների գործընթացին՝ Վարդան Արամյանը նշեց, որ «Գնումների մասին» օրենքը հեղափոխական է և նպաստելու է գնումների ոլորտի բարեփոխմանը: ««Գնումների մասին» օրենքում ներդրվել է թափանցիկության և շահերի բախման ինստիտուտը: Այլևս ցանկացած տնտեսվարող, որ կմասնակցի մրցույթին ու հաղթող կճանաչվի, պետք է հրապարակի իրական շահառուի տվյալները»,- ասաց Վարդան Արամյանը:

Հիշեցնենք, որ  «Գնումների մասին» օրենքով նախատեսվում է պետական գաղտնիք պարունակող գնումների ցանկում ներառել նաև պետական երեք պաշտոնների՝ ՀՀ նախագահի, ՀՀ ԱԺ նախագահի և ՀՀ վարչապետի համար արարողակարգային ծախսերը:

Լրագրողի հարցին, թե ինչ վտանգներ են նկատել, որ որոշել են տվյալ անձանց ծախսերը համարել գաղտնի և արդյո՞ք գաղտնիությունն իր հերթին չի կարող բերել կոռուպցիոն ռիսկերի, Վարդան Արամյանն պատասխանեց, որ կան հարցեր, որոնք չպետք է ֆետիշացնել:

Նրա խոսքերով՝ միջազգային պրակտիկայում, սովորաբար, գաղտնի են պահվում երկրի առաջին դեմքերի ծախսերը, և որևէ լրագրող չի կարող էլեկտրոնային եղանակով տեղեկանալ, օրինակ՝ Անգելա Մերկելի կամ ցանկացած նախագահի, վարչապետի ծախսերի պլանավորումը:

«Գիտեք՝ մենք գտնվում ենք մեկ տարածաշրջանում, որ անվտանգության ռիսկեր ամեն դեպքում կան, և երբ մեր անվտանգության գործընկերներն աշխատում են և դա մեզ համար տեսանելի չէ, չի կարելի ասել, որ ռիսկեր չկան: Գաղտնի պահելով՝ այդ ռիսկերը չեզոքացվում են»,- ասաց նախարարը և որպես օրինակ՝ նշեց Թուրքիայում` Ռուսաստանի դեսպանի սպանության դեպքը:

«Եթե որևէ մեկը տեղեկանում է, թե որ ընկերությունների մեքենաներն են սպասարկում նախագահին, վարչապետին, որ ընկերությունն է ճաշ մատուցում  մատուցում, որ ռեստորանում է նախագահը հյուրերի հետ ճաշում, անվտանգության ռիսկերը մեծանում են: Դրա համար կապալառուի տվյալները պետք է գաղտնի լինեն: Կան անվտանգության կանոններ, որոնք պետք է պահպանենք»,- ավելացրեց  Վարդան Արամյանը: