Ընտանեկան լուսանկարը ցույց տվեց, թե մեր հանրության մեջ ինչ իրավիճակ է. իրավապաշտպաններ
««Մարաշլյան» ֆոտոստուդիայի լուսանկարի շուրջ ստեղծված քննարկումները լավ ինդիկատոր էին, որոնք ցույց տվեցին, թե մեր հանրության մեջ ինչ իրավիճակ է, ինչ անելիքներ կան, ինչ ուղղությամբ պետք է աշխատանքներ տարվեն»,- «Մեդիա կենտրոնում» «Խառն ամուսնությունները Հայաստանում և հանրության վերաբերմունքը. արձագանքներ Մարաշլյան ֆոտոստուդիայի լուսանկարի շուրջ» թեմայով քննարկմանն ասաց «Սինջար» ՀԿ-ի ղեկավար Բորիս Մուրազին:
Նշենք, որ օրեր առաջ «Մարաշլյան» ֆոտոստուդիան իր ֆեյսբուքյան էջում հրապարակել էր ընտանեկան լուսանկար, որտեղ պատկերված էր սպիտակամաշկ հայ կին և սևամաշկ տղամարդ իրենց երեխայի հետ՝ հայկական տարազային հագուստով։ Լուսանկարը դարձավ բուռն քննարկումների առարկա՝ ոմանք դեմ էին արտահայտվում խառնամուսնությանը, ոմանք էլ քննադատում վերջիններիս: Այնուհետ ֆոտոստուդիան տարածեց հայտարարություն. «Մեր ստուդիայի պատմության մեջ առաջին անգամ ընտանեկան լուսանկար տեղադրելուց հետո մենք ստիպված ենք հանել այն` մեր հյուրերի հասցեին հնչած անթիվ սպառնալիքների պատճառով։ Չնայած որ նկարը պատկանում է Ֆոտո ատելյե Մարաշլեան ստուդիային, և մենք, իհարկե, դեմ ենք նկարը էջից հանելուն, սակայն ընդառաջելով Տիգրանի ծնողներին,նրանց հասցեին հնչած սպառնալիքները և վիրավորանքները դադարեցնելու համար՝ նկարը հանել ենք էջից»:
Բ. Մուրազիի խոսքով՝ խտրականության դեմ պայքարում բավականին առաջխաղացում կա, սակայն դա ոչ թե պետության, իշխանության աշխատանքի արդյունքն է, այլ այն մարդկանց, ովքեր չեն վախենում ու բարձրաձայնում են այդ խնդիրների մասին:
«Խտրական հայտարարություն անող մարդիկ պատասխանատվության չեն ենթարկվում: Դա է պատճառը, որ նման մարդիկ իրենց շատ ազատ են զգում: Այստեղ պետությունը, իրավապահ մարմինները անելիք ունեն: Եթե այս անպատժելիության մթնոլորտը վերացվի, նման վերաբերմունքն էլ կփոխվի»,- հավելեց նա:
Բ. Մուրազին նշեց, որ իրենց համայնքում էլ խնդիր կա խառնամուսնությունների հետ կապված, բայց դա ավելի շատ դրված է կրոնական հողի վրա:
Ընդդեմ կանանց նկատմամբ բռնության կոալիցիայի համակարգող Զարուհի Հովհաննիսյանն ասաց, որ իրենք խտրական վերաբերմունք են դիտակել և նկատել ողջ տարվա ընթացքում:
«Հաճախ դա տեղի է ունենում հենց կանանց նկատմամբ, երբ դա վերաբերում է մարդու անձնական կյանքի իրավունքին, ընտրությանը, քանի որ կինը հասարակության մեջ միշտ ընկալվել է որպես համայնքի սեփականություն, տղամարդիկ են որոշում կայացնում, թե կինն ում հետ պետք է ամուսնանա: Այսինքն կնոջ անձնական կյանքի վերահսկողությունից բացի նաև անձնական կյանքի իրավունքի խախտում ենք նկատել»,- նշեց նա:
Զ.Հովհաննիսյանը նաև ասաց, որ պետական բարձր պաշտոնյաները ևս կրողն են բավական կարծրատիպային, խտրական վերաբերմունքի, իրենց հնչեցրած խտրական կարծիքների համար նրանք չեն պատժվում:
Խտրականության դեմ պայքարի և հանուն հավասարության կոալիցիայի համակարգող Անահիտ Չիլինգարյանն ասաց, որ օրենսդրության և քաղաքականության բացակայության խնդիր կա:
«Մենք հարցում ենք ուղարկել արդարադատության նախարարություն խտրականության դեմ պայքարի օրենսդրության հետ կապված: Մեզ ասել են, որ օրենսդրական կարգավորումները մշակման փուլում են: Առհասարակ քննարկում է՝ մեզ անհրաժեշտ է առանձին օրենք, թե ոչ: Բայց մենք ունենք միջազգային պարտավորություններ, որ ունենք պատշաճ օրենսդրական կարգավորումներ»,- ասաց նա՝ հավելելով, որ հստակ քաղաքականության, պետական մարմինների պատշաճ վերաբերմունքի բացակայությունը բերում է նրան, որ խտրականության զոհ հանդիսացող անձիք պատրաստ չեն լինում իրենց իրավունքների պաշտպանությամբ հանդես գալ:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին