Ձեր վստահելի աղբյուրը

Քաղաքացի Կարեն Բարսեղյանը դատարանում հաղթել է Ճանապարհային ոստիկանությանը. Վարչական դատարանը անվավեր է ճանաչել հոծ գիծը հատելու համար նշանակված 10 հազար դրամ վարչական տուգանք նշանակելու մասին որոշումը:

Դատական տեղեկատվական համակարգից Panorama.am-ը տեղեկանում է, որ Կարեն Բարսեղյանն իր ներկայացրած հայցում ընդգծել է, որ վարչական տուգանք նշանակելու մասին որոշումն անօրինական է, չի բխում գործող օրենսդրության պահանջներից, քանի որ վազանց կատարելիս չէր կարող նկատել գծանշումը ոչ ճիշտ գծանշման, անբավարար տեսանելիության պայմանների անհնարինության պատճառով:

Մասնավորապես, քաղաքացին ներկայացրել է, որ չեն պահպանվել կառավարության թիվ Ն-113 որոշումից բխող պահանջները՝ 5 մ երկարությամբ յուրաքանչյուր վերահսկվող տեղամասում գծանշման մակերեսի մաշվածքը չի գերազանցում 50%-ը՝ գծանշումը ներկով կատարելու դեպքում, իսկ գծանշումը ջերմապլաստիկով կամ երկարակյաց այլ նյութերով կատարելու դեպքում` 25%-ը պահանջները:

Դատարանը քաղաքացու հայցը քննելիս նկատել է, որ պատասխանող կողմ հանդիսացող ՀՀ ոստիկանությունը չի ներկայացրել Կարեն Բարսեղյանի կողմից իրավախախտում կատարելու վերաբերյալ որևէ ապացույց:

Եվ դատարանը գտել է, որ վիճելի է մնում Կարեն Բարսեղյանի կողմից իրավախախտում կատարելու փաստը ու վճռել հօգուտ քաղաքացու լուծել հարցը՝ անվավեր ճանաչելով վարչական տույժ նշանակելու մասին Ճանապարհային ոստիկանության որոշումը: Ավելին, դատարանը իր վճռով պարտադրել է պատասխանող կողմին (ՃՈ-ին) որպես պետական տուրք վճարել 4000 դրամ:

«Վճիռը կամովին չկատարելու դեպքում այն կկատարվի դատական ակտերի հարկադիր կատարման ծառայության միջոցով` պարտապանի հաշվին», -նշված է դատական ակտի մեջ: Դատական ակտը կայացվել է ուղիղ մեկ ամիս առաջ և մեկամսյա ժամկետում դրա վերաբերյալ Վարչական վերաքննիչ դատարան բողոք չի ներկայացվել:

Կարեն Բարսեղյանին Վարչական դատարան հայց ներկայացնելու հարցում օգնել են «Վարորդի ընկեր» իրավապաշտպան հասարակական կազմակերպության իրավաբանները: Կազմակերպության ներկայացուցիչ Սերգեյ Ղահրամանյանի խոսքով, տվյալ խախտումը եղել է Կոմիտաս-Գրիբոյեդով խաչմերուկում, որտեղ գծանշումները շատ թերի են, մաշված և  երթևեկության ընթացքում կողմնորոշվելը չափազանց դժվար է վարորդների համար:

«Նման դեպքերում, երբ առկա է գծանշման ակնհայտ մաշվածություն ու այն հատելու համար տուգանվում են, ապա վարորդները անպայման պետք է պաշտպանեն իրենց իրավունքները ու բողոքարկեն տուգանելու մասին որոշումները», -Panorama.am-ի թղթակցի հետ զրույցում ասաց Ղահրամանյանը:

Նրա խոսքով, հնարավոր է այդ հարցով բողոքարկումների թիվը ստիպի Ճանապարհային ոստիկանությանը կամ Երևանի քաղաքապետարանին թարմացնել գծանշումները և չկենտրոնանալ միայն մարդկանց տուգանելու վրա:

Բացի այդ, Ղահրամանյանը մեկ այլ խնդիր էլ մատնանշեց. մայրաքաղաքի շատ հատվածներում ու հատկապես ծայրամասերում գծանշումները այնքան մաշված են, որ պարզ չէ՝ դրանք կետագծե՞ր են, թե՞ հոծ գիծ, թե՞ այլ բան:

«Վարորդի ընկեր»-ի ներկայացուցիչը դրանք ծուղակ է համարում վարորդների համար, քանի որ վարորդները կարող են չկողմնորոշվել երթևեկության ժամանակ, սխալ թույլ տալ ու խոշոր հաշվով տուգանվել:

Եվ կազմակերպությունը պատրաստվում է բաց նամակով դիմել քաղաքապետարան և Ճանապարհային ոստիկանություն՝ դրա համար լուծում գտնելու բողոք-պահանջով: