Ձեր վստահելի աղբյուրը

Գոլդեն Սթեյթ  բանկն ու Ամերիաբանկը ստորագրեցին  համագործակցության հուշագիր, որի նպատակն է նպաստել  երկու հեղինակավոր հաստատությունների միջև սերտ համագործակցությանը և հնարավորություն տալ երկու բանկերի ներկա և ապագա հաճախորդներին օգտվելու մյուս բանկի ծառայություններից և միմյանց շուկաներից:

Համագործակցության հուշագիրը ստորագրեցին Ամերիաբանկի գլխավոր տնօրեն Արտակ Հանեսյանը և Գոլդեն Սթեյթ  բանկի փոխնախագահ Վիգեն Ալեքս Հովսեփյանը:

Հուշագրի շնորհիվ ՀՀ քաղաքացիներին հնարավորություն է ընձեռվում ձեռք բերել անշարժ գույք Կալիֆորնիայում և օգտվել բանկային ծառայությունների լայն տեսականուց Գոլդեն Սթեյթ բանկից ֆինանսավորում ստանալու միջոցով՝ նախապես դիմելով Ամերիաբանկին: ԱՄՆ-ի ընկերությունները և ֆիզիկական անձինք հնարավորություն կստանան Գոլդեն Սթեյթ բանկի միջնորդությամբ ֆինանսավորում ստանալ Ամերիաբանկից՝ բիզնես գործունեություն ծավալելու կամ անշարժ գույք ձեռք բերելու նպատակով, օգտվել բանկի այլ բազմաթիվ պրոդուկտներից և ծառայություններից (հաշիվների հեռահար բացում, քարտերի թողարկում, ավանդների ձևակերպում և այլն):

Հուշագրի ստորագրումից հետո լրագրողներին Վիգեն Ալեքս Հովսեփյանն ասաց, հպարտ ու ոգևորված են, որ համագործակցում են Ամերիաբանկի հետ երեք պատճառով. «Առաջին՝ այսօրվանից համագործակցում ենք Հայաստանի ամենախոշոր և հարգված բանկերից մեկի՝ Ամերիաբանկի  հետ: Երկրորդ՝ մեր երկու հաստատությունների հաճախորդների համար նոր հնարավորություններ են ստեղծվում, որպեսզի միմյանց շուկաներում կարողանան ավելի հեշտ ու վստահ գործեն: Երրորդ՝ աննախադեպ երևույթ է, նոր էջ կբացվի հայ-ամերիկյան  բանկային գործակցության համար: Սա հայկական և ամերիկյան բանկերի միջև նմանատիպ համագործակցության առաջին փորձն է»:

Համագործակցությունը, նրա խոսքով, առիթ է, որպեսզի Կալիֆորնիայի բազմամարդ հայկական համայնքի միջոցները գան ու հասնեն Հայաստան, ներդրումներ անեն, ինչը կնպաստի նաև Հայաստանի տնտեսությանը:

«Ռազմավարական արժեք ներկայացնող համագործակցություն է այն իմաստով, որ այսօր սկսում ենք զրոյական կետից, բայց, ըստ անհրաժեշտության, փորձի, շատ հավանական է, որ այս համագործակցությունը ծավալվի նաև այլ բնագավառներում: Համագործակցությունը մեր հաճախորդներին և հանրությանը մեծ նպաստ կբերի»,- ասաց Գոլդեն Սթեյթ  բանկի փոխնախագահը:

Ամերիաբանկի տնօրինության անդամ, Զարգացման գծով տնօրեն Տիգրան Ջրբաշյանն ասաց, որ Ամերիաբանկի համար բավական պատմական զարգացում է՝ հաշվի առնելով, որ բավական երկար ժամանակ հետազոտում են ամերիկյան շուկան,  ուզում են հասկանալ այնտեղի հնարավորությունները, գործառույթների իրականացումը:

«Մենք ոգևորված ենք, որ մեզ հնարավորություն ընձեռվեց նմանատիպ համագործակցության հիմք ստեղծել Գոլդեն Սթեյթ բանկի հետ: Կարծում ենք, որ դրա արդյունքում մեր գործառույթները, որոնք առաջարկում ենք հայաստանյան հաճախորդներին, սփյուռքի համայնքներին, հիմնականում Կալիֆորնիային, կկարողանանք իրականացնել  էլ ավելի մեծ ծավալով՝ ապահովելու մեր հաճախորդների  բավարարվածությունը թե ԱՄՆ-ում, թե Հայաստանում: Եզակի համագործակցության ֆորմատ է ստեղծում Հայաստանի և Կալիֆորնիայի հաճախորդների համար: Կարծում եմ՝ այս առաջարկությունը պահանջարկ կունենա թե Կալիֆորնիայում, թե Հայաստանում»,- նշեց նա:

Հարցին, թե այսօր այդքան էլ հեշտ չէ ՀՀ ներգրավել օտարերկյա ներդրումներ, ինչպե՞ս եք փորձելու դա իրականացնել Կալիֆորնիայից, Վիգեն Ալեքս Հովսեփյանն ասաց, որ այս համագործակցությամբ դժվարությունների մի մասը կարող է լուծվել, հավելյալ վստահություն  ստեղծի:

«Կան ոմանք, ովքեր հարազատներ ունեն այստեղ, կամ որպես զբոսաշրջիկներ այցելում են, սակայն կան շատերն էլ, ովքեր ուզում են ինչ-որ ձևով առնչվել, բայց անմիջական կապ չունեն: Նմանօրինակ իրավիճակում հեշտացման փորձը, վստահաբար, կքաջալերվի»,- ասաց ամերիկյան առևտրային բանկի փոխնախագահը: 

Տ. Ջրբաշյանը նշեց, որ Կալիֆորնիայի հայկական համայնքն ամենավճարունակ համայնքն է, պահանջարկի տեսակետից ամենամեծ շուկաներից մեկն է:

«Հնարավորությունների զանգվածը, որ կստանան մեր հաճախորդներն այս համագործակցության շրջանակում, բավականին մեծ են»,- ասաց նա: