Ձեր վստահելի աղբյուրը

«Հայաստանում նոր ստեղծվելիք մարմինը՝ Հայաստանի ճարտարապետների պալատը, լինելու է ներկայումս գործող  Ճարտարապետների միության ժառանգորդը: Եթե Ճարտարապետների միությունը հասարակական կազմակեպություն է, նոր մարմինը լինելու է ինքնակառավարվող կազմակերպություն՝ իր օրենքներով»,- լրագրողների հետ հանդիպմանն ասաց Ճարտարապետների միության նախագահ Մկրտիչ Մինասյանը:

Հիշեցնենք, որ 2016 թ. դեկտեմբերի 1-ին կառավարությունը հաստատել է «Ճարտարապետական գործունեության մասին» ՀՀ օրենքի նախագիծը, որով նախատեսվում է Հայաստանի ճարտարապետների պալատի ստեղծումը:

«Երբ շփվեցինք այլ երկրների հետ, հասկացանք, որ ունեն կառույցներ, որոնց գործառույթները բոլորովին այլ է այն գործառույթներից, որոնք կատարում է մեր միությունը: Երբ մեզ հարցնում են՝ ի՞նչ եք անում, մենք ասում ենք՝ կազմակերպում ենք ցուցահանդեսներ, մրցույթներ, սակայն հիմնական հարցին, թե ի՞նչ իրավական հիմքով են ձեր հարաբերությունները կարգավորվում պետության, կառուցապատողի հետ, ի՞նչ օրենքներով եք շարժվում, մենք չէինք կարողանում պատասխանել: Մենք 2005 թվականից աշխատում ենք, որպեսզի ունենանք նման օրենք, քանի որ հասարակական կազմակերպությունն այդ բեռն իր վրա չէր կարող վերցնել: Այս օրենքով  հստակեցված կլինեն այն բոլոր շրջանակները, որոնցով մենք կհարաբերվենք պետության, կառուցապատողի հետ, կպահպանենք մեր էթիկայի նորմերը»,- մանրամասնեց նա:

Ճարտարապետների միության վարչության անդամ Սաշուր Քալաշյանն ասաց, որ Հայաստանում ճարտարապետական ոլորտը մնացել է սովետական կարգերի օրենսդրական դաշտում:

«Մենք այս օրենքը մշակելու համար հիմք ենք ընդունել արտասահմանյան, մասնավորապես ֆրանսիական փորձն ու օրենսդրական դաշտը՝ օրենքի դրույթները տեղայնացնելով տեղական  պայմաններին, հարմարացնելով մեր չափին, ձևին, բովանդակությանը: Օրենքի թեզն ասում է՝  ճարտարապետությունն ազգային մշակույթի դիմագիծն է: Ճարտարապետը ճարտարապետական գործունեության ժամանակ ունի  չափազանց կարևոր դերակատարում, հետևաբար պետք է նրա գործունեությունը պաշտպանված լինի, որպեսզի որևէ խոչընդոտ  չլինի»,-  նշեց նա:

Ճարտարապետների միության պատասխանատու քարտուղար Բորիս Քոչարյանի խոսքով, այս օրենքով մասնագիտական գործունեության հիմքը դրվում է  մասնագետի վրա ի տարբերություն այսօրվա համակարգի, երբ իրավաբանական անձիք են լիցենզավորվում:

«Պատվիրատուն, ով փող տվողն է, ներդրողն է, կարող է շրջանցել նախապես  մշակված նախագիծը: Մեզ ավելի շատ անհանգստացնում է այն, որ պատվիրատուն դա անում է ճարտարապետի հետ միասին: Ճարտարապետն այս պայմաններում ակամա ենթարկվում է կառուցապատողին, քանի որ ուրիշ հենվելու, պաշտպանվելու տեղ չունի: Ունենալով այս կառույցը՝ ճարտարապետը կարող է  լինել պաշտպանված, կարող է իր իրավունքները պաշտպանել, սրանով մենք պաշտպանում ենք մեր կոլեգաներին կառուցապատողների կամայականություններից: Ճարտարապետությունը սոցիալական դեր ունի, ճարտարապետը դրա կարևորությունը պետք է ավելի շատ գիտակցի, քան այն, որ պետք է ենթարկվի իրեն վարձողին: Ճարտարապետը ծառայություն մատուցող է, բայց չպետք է դառնա պատվիրատուի ստրուկը»,- նշեց նա:

Բորիս Քոչարյանի խոսքով, պալատը բոլոր ճարտարապետների անունից իր վրա է վերցնում  պատասխանատվությունը շրջակա միջավայրի ստեղծման հարցերի  հետ կապված:

«Այսօր ճարտարապետները ինքնուրույն են, ազատ ու անկախ, հաճախ ավելի շատ ենթարկված են իրենց պատվիրատուի կամքին: Մենք համոզված ենք, որ այս պալատի ստեղծմամբ ճարտարապետության ոլորտում առկա շատ հարցեր կկարգավորվեն»,- ասաց ՃՄ պատասխանատու քարտուղարը: