Ադրբեջանը ամենամեծ տնտեսական անկում և գնաճ ունեցող երկիրն է ԱՊՀ-ում, հաջորդում է Բելառուսը
Նախորդ տարին բարենպաստ չէր ոչ միայն Հայաստանի, այնպես էլ հետխորհրդային մի շարք երկրների տնտեսությունների համար: ԱՊՀ երկրներից մի քանիսի վիճակագրական ծառայությունները արդեն ամփոփել են տնտեսական տարին, մի քանիսը դեռ ոչ, այնումենայնիվ նախնական պատկերը արդեն պարզ է:
Ադրբեջանում ՀՆԱ-ի անկումը 2016 թ.-ի հունվար-դեկտեմբեր ամիսներին ադրբեջանական մանաթով արտահայտված կազմել է 3.8%: Ոչ նավթային սեկտորի անկումը կազմել է 5.4%, իսկ մեկ շնչին ընկնող ՀՆԱ-ն նվազել է 4.9%-ով: Գնաճի մակարդակը շարունակում է բարձր մնալ Ադրբեջանում, որտեղ սպառողական գների ինդեքսը կազմել է 112.4%: Արդյունաբերությունը անկում է գրանցել 0,4%-ով, իսկ գյուղատնտեսության ոլորտը գրանցել է՝ 2,6% աճ: 1,5% աճ է գրանցվել առևտրի շրջանառության ծավալներում, իսկ ծառայությունների ոլորտը գրանցել է՝ 1.1% անկում:
26.1%-ով նվազել են ուղղակի ներդրումները ֆիքսված կապիտալում՝ հիմնականում շինարարության ոլորտում կատարված ներդրումների կրճատման հաշվին: Միաժամանակ, ըստ Ադրբեջանի պետական մաքսային կոմիտեի տվյալների` հունվար-նոյեմբեր ժամանակահատվածում արտաքին առևտրի ծավալները կրճատվել են 11%-ով, որտեղ արտահանման ծավալները նվազել են 13,1%-ով, իսկ ներմուծումը կրճատվել է 8 %-ով:
ԱՊՀ երկրներում, հաջորդ տնտեսական անկում գրանցած երկիրը Բելառուսն է: Ըստ Բելառուսի ազգային վիճակագրական կոմիտեի տվյալների, 2016 թ.-ին գրանցվել է 2,6% անկում՝ բելառուսական ռուբլով արտահայտված: 0,4% -ով նվազել է արդյունաբերական արտադրանքի ծավալը: Բելառուսում նույնպես 18% ներդրումների ծավալների անկում է գրանցվել հիմնական կապիտալում: Իսկ սպառողական գների ինդեքսը կազմել է՝ 111.8%: Ադրբեջանի նման, գրեթե նույն չափով նվազել են նաև արտահանման և ներմուծման ցուցանիշները՝ 10.4% և 9.9%-ով համապատասխանաբար:
Նախորդ տարին հավանաբար տնտեսական անկումով կամփոփի նաև Ռուսաստանը, որը ըստ տարբեր գնահատականների կկազմի 0,6%: Գնաճի մակարդակը տարեկան կտրվածքով Ռուսաստանում կազմել է՝ 5.38%:
Ինչ վերաբերվում է դեռևս ԱՊՀ-ն ամբողջովին չլքած Ուկրաինային, ապա բարձր տարեկան գնաճ է գրանցվել նաև այստեղ՝ 12.14%: Սակայն նախորդ տարի Ուկրաինայում ՀՆԱ-ն գրանցել է 1.1% աճ, որը 2 տարվա շարունակական անկումից հետո այնքան էլ վատ ցուցանիշ չէ: Որոշակիորեն աշխուժացել է արդյունաբերությունը, սակայն արտահանման ծավալները շարունակում են կրճատվել:
ԱՊՀ մյուս երկրներում, 2016թ.-ի տնտեսական ակտիվության կամ ՀՆԱ-ի աճի ցուցանիշները ըստ նախնական տվյալների՝ դրական են: Այսպիսով, կարող ենք ասել, որ ԱՊՀ երկրների ցանկում ամենածանր տարին ունեցել են Ադրբեջանը և Բելառուսը՝ տնտեսական անկումով և բարձր գնաճով:
Այսպես, տնտեսական աճի զրոյականից մի փոքր բարձր ցուցանիշներ են Հայաստանում և Ղազախստանում, որտեղ Ղազախստանում գնաճը կազմել է՝ 8.29%: Ղրղզստանում ՀՆԱ-ի աճը կազմել է՝ 3.8%, իսկ գնանկումը՝ 0.5%: Տաջիկստանում տնտեսական աճի ցուցանիշը համեմատաբար բարձր ՝ 6%, իսկ գնաճը՝ 5.8%: Մոլդովայում նույնպես տնտեսական աճը համեմատաբար բարձր տվյալներ ունենք՝ 6.3% և 0.5% գնաճ:
Եվս մեկ հետաքրքիր փաստ՝ բացի Հայաստանից, ԱՊՀ մյուս անդամ երկրներում արտահանման և ներմուծման ծավալների անկում է գրանցվել: Հայաստանում և Ղրղզստանում գրանցվել է գնանկում, իսկ մնացած ԱՊՀ երկրներում միջին և բարձր գնաճ, բացառությամբ Մոլդովայի ցածր մակարդակի գնաճի:
Երեկ հրապարակված ՀՀ ԱՎԾ տվյալների համաձայն՝ Հայաստանի տնտեսական ակտիվության ցուցանիշը կազմել է 0.5%, իսկ արդյունաբերական արտադրանքի ծավալի աճը կազմել է՝ 6.7%: Սպառողական գների ինդեսքը կազմել է՝ 98.6%, այսինքն գրանցվել է գնանկում: Արտահանումը գրանցել է՝ 20%, իսկ ներմուծումը՝ 1.6% աճ: