Ձեր վստահելի աղբյուրը

Հայաստանցի բնապահպաններն ահազանգում են՝ Երևանը կանգնած է ջրհեղեղի վտանգի առաջ: Խնդրի մասին բնապահապանության ոլորտի փորձագետները բարձրաձայնել են բնապահպանության նախարարին կից հասարակական խորհրդի նիստում, հարցը քննարկվել է հրատապ կարգով:

Խորհրդի անդամ, բնապահպան Ինգա Զարաֆյանը Panorama.am-ի հետ զրույցում նշեց, որ ջերմաստիճանի բարձրացումը կարող է մայրաքաղաքում հանգեցնել վտանգավոր իրավիճակի: Պատճառները մի քանիսն են՝ առատ տեղումներ, ջրատարների անմխիթար վիճակ և այլն:

«Գիտեք, վերջին տարիներին կառուցապատումն արագ տեմպերով է զարգացել, իսկ եղած կոմունալ ծառայությունները չեն համապատասխանեցվել դրան: Կոմունալ համակարգն այս պահին գերծանրաբեռնված է, շատ հին, հիմնանորոգում չի կատարվել»,-ասաց Ինգա Զարաֆյանը:

Նման մտահոգության պատճառներից մեկն էլ այն է, որ Գետառում բնական ջրհոսքը խախտված է, հունն առնված է մեծ խողավակի մեջ: Բացի այդ էլ Հրազդանն  ու Գետառ գետերը լի են աղբով:
«Եթե հանկարծ սելավ լինի, գետը փակ է, հետևանքները կարող են շատ լուրջ լինել»,-ասաց նա:

Զարաֆյանի խոսքով, քաղաքապետարանի ներկայացուցիչն ասել է, որ ամեն տարի ապրիլին մաքրում են գետերի հուները: Բնապահպանը վախենում է, որ ապրիլին արդեն ուշ կլինի:

«Երբ անձրևը շատ է լինում, մենք քաղաքի փողոցներում ունենում ենք ծանր ու կատաստրոֆիկ իրավիճակ, քանի որ ջրատարները փակ են լինում, չեն կարողանում նման ծանրաբեռնավածություն վերցնել իրենց վրա: Բայց մի ուրիշ պատճառ էլ կա: Երևանում հողային տարածքը կրճատվեց: Պարզ բան է, հողը ներծծում է  ջուրը, իսկ ասֆալտը չի կարող: Դրա համար միանգամից ստեղծվում են լճակներ»,-ասաց բնապահպանը:

Նա ահազանգում է, Երևանում  առկա է ձյան հաստ ծածկ, եթե այն սկսեց միանգամից հալվել, ապա ջրի հոսքը շատ ուժեղ կլինի ու արագ:

«Միանգամից կլինի ուժեղ ծանրաբեռնվածություն՝ հղի վտանգներով»,-ասաց նա:
Հրազդան գետի ափերին ու վրա կառուցված օբյեկտներն էլ մի կողմից են բարդացնում խնդիրը: Խորհրդի նիստում անդամները Երևանի քաղաքապետարանի ներկայացուցչից հարցրել են՝ գնահատվա՞ծ են արդյոք ռիսկերը:

«Ասեց, դե գիտեք, ըստ երևույթին ոչ մի բան չկա: Ասում է, իհարկե չեն գնահատվել»,-փոխանցեց Զարաֆյանը:

Բնապահպանի խոսքով, միայն ռիսկերը գնահատելուց հետո կարելի է խնդրին լուծում տալ, իսկ լուծումը պետք է լինի կոնցեպտուալ:

«Շատ շտապ հետազոտություններ պետք է արվեն, որպեսզի գնահատվեն ռիսկերը, դրանց հիման վրա արվեն առաջարկություններ: Հակառակ դեպքում մենք կարող ենք հայտնվել շատ վտանգավոր իրավիճակում»,-ասաց նա:

Բնապահպանի խոսքով, նույն խնդիրն առկա է նաև Սյունիքի մարզի Կապան քաղաքում:

Նախարարությունում խնդիրը ներկայացրել է  ԵՊՀ Ֆիզիկական աշխարհագրության և ջրաօդերևութաբանության ամբիոն  Թրահել Վարդանյանը: Նա մասնագիտական փաստարկներով մտահոգություն է հայտնել Երևանի սելավատարների և սելավընդունիչների համակարգի անբավարար հզորությունների և ենթակառուցվածքների վերաբերյալ: Բանախոսը նշել է, որ մեծ են ռիսկերը, որ սելավի դեպքում էական վնասներ կհասցվեն մայրաքաղաքին:
Նախարար Արծվիկ Մինասյանն առաջարկել է Հասարակական խորհրդի հաջորդ նիստի օրակարգ կրկին ընդգրկել քննարկվող հարցը, հրավիրել մասնագետներ նաև ՀՀ արտակարգ իրավիճակների նախարարությունից և այլ լիազոր մարմիններից, մշակել և ներկայացնել լուծումների մեխանիզմներ:

Երևանի քաղաքապետարանի «Բարև Երևան» խմբակցության անդամ Անահիտ Բախշյանն այսօր բաց նամակ է հղել քաղաքապետ Տարոն Մարգարյանին՝ հարցնելով, թե ինչ է արվում Երևանում սպասվելիք ջրհեղեղի դեմն առնելու ուղղությամբ: